Hatutan.com (16 Novembru 2023) Ermera—Postu saúde haat iha suku izoladu haat hanesan Taraso, Samalete, Railaco Leten no Matata ne’ebé pertense bá Sentru Saúde Komunitária Railaco, munisípiu Ermera, presiza tebes médiku.

Xefe Sentru Saúde Komunitária Railaco, Médiku Virgíllio N. da Crus Soares hala’o konsulta jerál bá pasiente iha suku Taraso 27 Setembru 2023. Foto: Cipriano Colo.

Xefe Sentru Saúde Komunitária Railaco, Médiku Virgíllio N. da Crus Soares hato’o preokupasaun ne’e tanba suku hirak ne’e ho populasaun barak mak hela iha área izoladu, difísil atu assesu bá estrada, dook hosi kapitál Railaco.

Lee Mós: Problema Sériu Iha Ministériu Saúde, Lian Hosi Médiku Espesialista Ne’ebé Lian Laek

Nia preokupa tanba bainhira iha kazu emerjénsia ruma médiku iha Sentru saúde limitadu tebes no difísil atu halo atendimentu ho lalais, liu liu iha tempu udan tahu makaas, motór ho karreta labele assesu.

Nune’e, médiku ne’e husu bá Governu liu hosi Ministériu Saúde atu konsidera assuntu ne’e tanba bainhira ko’alia kona-bá liberta povu hosi moras oioin, presiza tebes rekursu umanu liuliu koloka médiku  iha suku sira atu bele halo atendimentu ho lalais liu.

Pessoál saúde hosi Sentru Saúde Komunitária Railaco, hala’o konsulta jerál bá pasiente iha suku Taraso 27 Setembru 2023. Foto: Cipriano Colo.

“Iha postu saúde sira agora fasilidade iha ona, bee moos iha, iha mós espasu bá pessoál saúde sira atu hela. Maibé, problema maka médiku laiha. To’o oras ne’e iha postu saúde haat mak presiza tebes médiku,” nia hateten bá Hatutan.com iha postu Saúde Tarasu foin lalais ne’e.

Ho situasaun ne’e, parte Sentru Saúde Komunitária halo de’it oráriu iha suku sira kada fulan halo konsulta jerál dal aida no hetan apoiu mós hosi Organizasaun Naun Governamentál sira hanesan Front Line no seluk tán. Maibé, ida ne’e Xefe Sentru Saúde konsidera atendimentu la efetivu tanba komunidade barak la assesu ho di’ak.  

Hatán kona-bá preokupasaun ne’e iha loron 15 fulan Novembru tinan 2023 Ministra Saúde, Elia dos Reis Amaral hateten, Ministériu Saúde halo ona mapamentu, levanta ona dadus durante fulan Jullu to’o Agostu 2023 oinsa bele destka pessoál saúde sira bá iha área sira ne’ebé mais nesesidade liu-liu área remotas.

Iha tempu badak Ministériu Saúde sei loke vaga ka halo rekrutamentu bá médiku atu bele destaka  bá postu saúde sira ne’ebé sei mamaku tuir fatin ne’ebé Ministériu rasik identifika ona.

Ministra Saúde Elia Amaral. Foto/Tome da Silva

“Ita identifika ona no halo ona mapamentu bá fatin sira ne’ebé mak falta médiku liuliu área izoladu sira. Ita sei loke vaga hodi halo rekrutamentu atu bele prienxe fatin hirak ne’e iha tempu badak,” Elia dos Reis Amaral hateten hafoin reuniaun Konsellu Ministru, iha Palásiu Governu, Kuarta (15/11/2023).

Railaco nu’udár postu administrativu ida hosi postu adminitsrativu Lima ne’ebé pertense bá munsípiu Ermera.

Postu administrativu Railaco kompsotu hosi suku sia (9) mak hanesan suku Lihu, Matata, Tokoluli, Fatuquero, Railaco Leten, Samalete, Deleso, Railaco Craic, no Taraso.

Maioria populasaun iha suku sira ne’ebé pertense bá postu administrativu Railaco maka agrikultura ka agrikultór kafé.

Suku Lihu, Matata, no Fatuquero mak ninia populasaun barak liu kompara ho suku neen sira seluk. Kapital Railaco ho nia área 1.706 km² ho nia populasaun 39.580.

Jornalista: Gloria Maia