Hatutan.com (17 Novembru 2023) Díli— Funsionáriu sira iha Banco Central Timor Leste (BCTL) konstrui uma bá vitima dezastre naturál 4 fulan Abril 2021, ho naran Francisco Ribeiro iha aldeia Lesibutak, suku Manleuana, Postu Admistrativu Dom Aleixo, munisípiu Díli.

Serimónia inaugurasaun bá uma ne’ebé konstrui hosi Funsionáriu sira iha Banco Central Timor Leste (BCTL) bá vitima dezastre naturál 4 fulan Abril 2021, ho naran Francisco Ribeiro iha aldeia Lesibutak, suku Manleuana, Postu Admistrativu Dom Aleixo, munisípiu Díli, Sesta (17/11/2023). Foto: Tome da Silva.

Vise Governadór BCTL, Venâncio Alves haktuir, apoiu ne’ebé fó bá vítima ne’e la’ós mai hosi konta BCTL maibé direitamente mai hosi funsionáriu sira BCTL nian.

Lee Mós: Governu Kontinua Abandona Vítima Dezastre Naturál 04 Abríl 2021

Venâncio esplika, tuir Lei, BCTL la permite atu organiza ajudu institusionál, tanba ne’e BCTL hili dalan organiza nia funsionáriu sira, parseiru institusionál no individu balun hodi halibur fundu umanitáriu oitoan bá apoiu vítima dezastre naturál.

“BCTL estabele konta ida iha BNU ho naran konta fundu umaritária hosi ita nia funsionáriu sira ho totál $16,492,90,” Venâncio Alves hateten iha serimónia entrega uma, iha aldeia Lesibutak, Sesta (17/11/2023).

Antes ne’e ekipa BCTL mós halo survey bá fatin dezlokasaun vítima dezastre naturál sira hahu iha Díli, Hera no Maubisse, hodi bele fó apoiu no BCTL konsege konstrui uma simples rua iha Maubisse no hetan inaugurasaun iha loron 12 fulan Agostu tinan 2022.

Uma ne’ebé konstrui hosi Funsionáriu sira iha Banco Central Timor Leste (BCTL) bá vitima dezastre naturál 4 fulan Abril 2021, ho naran Francisco Ribeiro iha aldeia Lesibutak, suku Manleuana, Postu Admistrativu Dom Aleixo, munisípiu Díli, Sesta (17/11/2023). Foto: Tome da Silva.

Hafoin ne’e, ekipa BCTL mós koordena ho autoridade lokál aldeia Lesibutak hodi konstrui mós uma simples ho medida 9×7 metru kuadradu bá vítima ho naran Francisco Ribeiro.

Uma ne’e konstrui ho montante osan $6.141,40 kompostu hosi kuartu haat no sala bainaka ida, ne’ebé ohin ofisialmente entrega ona bá Francisco Ribeiro.

Apoiu ne’e BCTL la fó osan cash maibé sosa kedan materiál konstrusaun hodi entrega diretamente bá vítima rasik liu hosi koñesimentu autoridade lokál Lesibutak nian, no vítima mak responsabiliza rasik bá konstrusaun ne’e ne’ebé hetan monitorizasaun hosi ekipa BCTL.

Iha fatin hanesan vítima dezastre naturál, Francisco Ribeiro agradese tebes bá apoiu ne’e tanba bele fó mahon ona bá nia ho familia.

“Ha’u hakarak agradese bá ajudu ne’e, maski uma ne’e simples maibé bele tahan ona ha’u ho familia hosi udan no anin. Dala ida tan agradese tebes bá Governadór BCTL ho funsionáriu sira nia laran luak no domin,” nia agradese.

Xefe Suku Manleuana, Jacob Soares. Foto: Tome da Silva.

Nune’e mós Xefe Suku Manleuana, Jacob Soares senti kontente tanba apoiu ida ne’e bele ajuda ona nia komunidade ne’ebé seidauk hetan apoiu hosi Governu.

“Uma ne’e bele hakmaan ona nia susar no terus ne’ebé durante ne’e sente tanba depois de dezastre naturál iha 4 Abril vítima ne’e hela de’it iha fatin ne’ebé la dignu,” Jacob Soares hateten.

Jacob haktuir, durante dezastre naturál iha 4 Abril, rai taka tomak vitima nia uma no durante ne’e vítima rasik seidauk hetan apoiu ruma hosi Governu.

Jornalista: Leopoldina de Carvalho