Hatutan.com, (17 Novembru 2023), Díli– Komunidade Suku Kampu Alor,  Postu Administrativu Dom Aleixo, Munisípiu Díli, Sesta dadeer ne’e, hale’u tuku 09.00 Otl, hakfodak no halai sai hosi uma-laran hodi sai mai estrada laran hateke ahi-suar metan sa’e maka’as bá kalohan.

Uma ne’ebé ahi han iha área Kampu Alor, Díli, Sesta (17/11/2023). Foto/Tome da Silva 

Sira ho sira husu bá malu kona-bá ahi-suar ne’e no husu tuir kona-bá ne’e katak ahi mak han komunidade  nia uma ida besik kedas entre Sede Suku Kampu Alor nia oin ho SAMES nia oin.

Francisco Adibau Carvalho do Santos, nu’udár uma-na’in rasik la hatene motivu hosi ahi-han nia uma ne’e tanba nia toba hela.

“Ha’u lahatene oinsá mak ahi-han ha’u nia uma. Buat ne’ebé ha’u haree mak sasán sira iha uma-laran la salva,” Francisco Adibau Carvalho do Santos haktuir bá Hatutan.com.

Bainhira viziñu sira haree ahi-suar sa’e maka’as no sira hola inisiativa tebe-rahun oda-matan no hakilar. Nune’e,   Francisco Adibau Carvalho do Santos hakfodak hosi nia toba fatin halai bá de’it mak foti ka salva dokumentu sira ne’ebé nia rai iha pasta ida.

Uma ne’ebé ahi-han ne’e atu hanesan baraka ida no tuir informasaun hosi komunidade sira katak uma ka baraka ne’e uluk negosiante Indonéziu sira mak aluga hodi fa’an roupa no sapatu.  

Ekipa Bombeiru halo intervensaun bá ahi han uma ida iha Kampu Alor, Sesta (17/10/2o023). Foto/Gabriel dos Nascimento

Iha fatin hanesan, Komandante Korpu Bombeiru Muniípiu Dili,  Fernando da Costa haktuir, ekipa  hetan kontaktu hosi komunidade Kampu Alor katak, ahi han komunidade nia uma iha Kampi Alor, nunee direitamente tun halo intervensaun.

“Maizomenus  tuku 9:00otl, ami hetan kontaktu liu husi diresaun komunikasaun nian katak, ahi han uma iha Kampu Alor, nunee direitamente ami tun halo interevensaun, ami to’o halo mate kedas eletrisidade, no prepara bee hodi rega,”  nia hateten.

Deskonfia kauza hosi ahi han uma ne’e tanba sirkuitu hosi liña instalasaun  eletrisidade iha uma-laran ne’ebé la seguru.

Jornalista: Gloria Maia