Hatutan.com, (18 Novembru 2023), Bobonaro-Ministériu Obras Públikas (MOP) muda projetu reabilitasaun estrada urbana Postu Administrativu Maliana Vila, Munisípiu Bobonaro  bá tinan 2024.

Lee Mós: Prezidente Autoridade Bobonaro Husu Governu Reativa Merkadu Tradisionál Iha Fronteira

Prezidente Autoridade Munisípiu (PAM) Bobonaro, Ernesto de Oliveira Barreto. Foto/Rogério Pereira Cárceres

Desizaun ne’e tanba problema iha dezeñu no bill of quantity (BoQ) ne’ebé molok ne’e tékniku sira MOP nian iha madantu VIII Governu nian katak, estrada urbana Maliana sei reabilita ho kilómetru 22, no nia luan metru ho totál 24.

“Dezeñu ida uluk VIII Governu iha metru 24, signifika ita labele halo servisu barak. Entaun, IX Governu halo fali mudansa, sé la sala iha  metru 9 de’it, estrada ne’e, la’os metru 24,” Prezidente Autoridade Munisípiu (PAM) Bobonaro, Ernesto de Oliveira Barreto, hateten bá jornalista sira hafoin partisipa iha semináriu nasionál ho tema “Interkulturál” iha Jinájiu Munisipál Maliana, Sábadu (18/11/2023).

Nia dehan, sé IX Governu ne’e kontinua ho BoQ hosi Governu anteriór nian, ho metro 24 maka sira tenke fó indemnizasaun bá komunidade afetadu sira, tanba sira nian estrada sorin-sorin, eskerda, direita, povu sira nia uma ne’e, tenke fó imdemnizasaun. Entaun, osan la to’o tanba ne’e maka,  IX Governu halo mudansa bá ida ne’e. Tuir enkontru ne’ebé mak iha Díli ami halo ho MOP iha de’it metru 9 no total  estrada urbana iha Maliana kilómetru  23,” Ernesto Barreto hateten.

OJE 2024 bá Bobonaro  Millaun $2

Iha tetu Orsamentu Jerál Estadu (OJE) tinan 2024 nian, Governu liuhosi Ministériu Finansas (MF) atribui tetu orsamentu ho totál millaun $9 bá Munisípiu Bobonaro, atu nune’e autoridade sira bele ezekuta tuir Planu Asaun Anuál (PAA) munisípiu nian.

Iha reuniaun Komisaun Revizaun Orsamentu Polítika (KROP) ho Primeiru-Ministru  bá parte autoridade Munisípiu Bobonaro aprezenta planu dezenvolvimentu munisípiu nian, ho totál projetu 35, no presiza millaun $7, atu bele ezekuta tuir planu sira ne’ebé mak iha ona. Realidade orsamentu ida ne’ebé aloka bá planu dezenvolvimentu nian hatun tiha bá millaun $2 de’it.

“Ho millaun $2 ne’e, ha’u ho diretór munisipál sira halo ona ezersísiu, ami diskute postu ida-ida. Ne’ebé, postu ida, hetan projetu rua. Kobre de’it iha  millaun $2,” Administradór Ernesto hateten.

Dadaun ne’e, parte autoridade Munisípiu Bobonaro, liuhosi nia ekipa tékniku sira, identifika ona kada postu administrativu ho ninia projetu rua de’it ne’ebé sei fó prioridade liu ne’e ospitál ho bee-moos.

Jornalista: Rogério Pereira Cárceres