Hatutan.com, (15 Dezembru 2021), Bobonaro–Atu lori  moris di’ak ba populasaun  iha Munisípiu Bobonaro, maka Prezidente Autoridade (PA)  Munisípiu Bobonaro, Ernesto de Oliveira Barreto, husu  ba Governu sentrál atu tau atensaun másimu ba iha área infraestrutura no setór produtivu sira, hanesan agrikultura no  turizmu,  inklui hadi’a fasilidade edukasaun, saúde, bee-moos.  

Notísia iha Relasaun: PR Lú Olo Husu Komunidade Balibo Kuida Fatin Balibo Five

Prezidente Autoridade Munisípiu Bobonaro, Ernesto Oliveira Barreto, ho populasuan Bobonaro simu prezensa Prezidente Repúblika, Francisco Guterres “Lú Olo” iha Bobonaro, 14 Dezembru 2021. Foto/Mídia PR

“Rekomenda ba governu sentrál atu bele tau atensaun masímu ba servisu delegasaun territorial sira iha nia kondisaun servisu no ekipamentu moves no imoves iha nivel Munisípiu tuir idak-idak nia área no responsavel,” Ernesto de Oliveira Barreto iha nia diskursu abertura diálogu ho Prezidente Repúblika, Francisco Guterres “Lú Olo” iha Jináziu Maliana, Kuarta (15/12/2021).

Autoridade munisipál ne’e hateten Lei Poder Lokál no Lei Eleisaun Munisipál ne’ebé  mak hetan ona promulgasaun hosi Prezidente Repúblika husu atu Governu sentrál tenke foku iha programa dezenvolvimentu rekursu umanu iha nivel munisipál iha territóriu Timor-Leste.

Munisípiu Bobonaro ho  pozisaun jeográfika iha fronteira ho nia luan hamutuk 1,368 km²  no astronomikamente Bobonaro fonteira iha parte norte ho Munisípiu Liquiça, parte súl ho Munisípiu Covalima, parte leste ho Ermera no Ainaro, nune’e parte oeste fronteira ho  Atambua, Indonézia.

Munisípiu Bobonaro iha nia dialétiku tolu, maka hanesan Bekais, Bunak no Kemak.  Etimologia no orijen do Munisípiu ne’e naran “Bobonaro” tempu kolónia Portugeza mak tau naran Bobonaro. Molok Portugeza tama iha Timor hanaran Bobonaro uza lian Bunak ho Kemak, lian-rua ne’e domina iha Munisı́piu Bobonaro.

Autoridade Munisipál Bobonaro kompostu hosi Postos Administrativu neen (6), Suku 50 no Aldeias 194. Ho total populasaun hamutuk 92,049 tuir Sensu 2010. 

Sensu População Munisípiu  Bobonaro, 2015

Progresu  

Servisu Saúde Munisipal Bobonaro halo kampaña protokolu Organizasaun Mundial  Saúde kontra Covid-19 hamutuk ho entidade sira iha Munisipiu Bobonaro  no  kampaña hasa’e tasa vasinasaun Covid- 19.

Iha parte Administrasaun Autoridade Munisipál  instala servisu setores sira iha Administrasaun Munisípiu Bobonaro haktuir enkuadramentu legal Dekretu Lei N^o. 54/2020 alterasaun daruak hosi Dekretu Lei N^o. 3/2016, halo manutensaun edifísiu Postu Administrativu neen (6) iha Munisípiu Bobonaro, konstrusaun foun edifísiu Posto Administrativu Maliana, Bobonaro, Armazén STAE, sosa transporte karreta lima (5) ho motorizada 42 no sosa ekipamentu mobiliáriu no ekipamentu Administrasaun Postu Administrativu.  

Dezafiu

Administrasaun Autoridade Munisipál Bonaro enfrenta dezafiu hanesan dezenvolvimentu rekursu umanu, tanba ne’e to’o oras ne’e, númeru rekursu umanu sei mínimu tebes.

 Jornalista: Vito Salvadór