Hatutan.com (20 Novembru 2023), Díli—IX Governu Konstitusionál liuhosi Ministériu Koordenadór bá Asuntu Ekonómiku no Ministru Turizmu no Ambiente, ho apoiu hosi Câmara Comercio no Indústria Timor-Leste (CCI-TL), sei halo promosaun bá turizmu Timor-Leste (TL) nian iha “Forum Internasionál Ekonomia” durante loron-tolu iha Díli.
Vise-PM Francisco Kalbuadi Lay. Foto/Elio dos Santos da Costa.
Forum internasionál ne’e, inisia hosi Vise Primeiru-Ministru, Ministru Koordenadór bá Asuntu Ekonómiku no Ministru Turizmu no Ambiente, Francisco Kalbuadi Lay, servisu hamutuk ho Prezidente CCI-TL, Jorge Manuel Serrano, no preprasaun oras ne’e la’o namanas, tuir oráriu sei realiza iha 23 to’o 25 fulan-novembru, tinan ne’e.
Lee Mós: MCI Lansa Award 2023 bá Micro-Media-Pequena Empreza
“Objetivu atu promove ita nia rain liu-liu iha área Turizmu no seitór sira seluk, maibé emprezáriu sira ne’ebé mai, sira mai hosi área oioin hanesan agrikultura, eletrisidade, enerjia, peskas, liu-liu iha área turizmu,” Vise Primeiru-Ministru, Francisco Kalbuadi Lay hateten liuhosi konferénsia imprensa iha salaun PCM-Palásiu Governu, Díli, Segunda (20/11/2023).
Forum ne’e realiza bazeia bá programa IX Governu nian liuhosi orientasaun ne’ebé sempre mai hosi Primeiru-Ministru, Kay Rala Xanana Gusmão katak, agora Governu tenke dudu seitór privádu sira, liu-liu iha seitór ekonomia.
“Iha pquena no média emprezáriu sira tenke bá oin. Maibé, ita labele atu dudu ekonomia ne’e la’o, sein iha apoiu liu-liu investór sira mai hosi liur. Tanba ida-ne’e, agradese tebes bá Primeiru Ministru mós fó apoiu boot tebtebes mai iha eventu ida-ne’e, nomós membru Governu lubuk ida no hetan orientasaun hosi Prezidente Repúblika,” Kalbuadi hateten.
Forum ne’e sei hetan partisipasaun hosi grupu boboot sira ne’ebé mai ho intensaun atu haree ho intensaun ida katak, depois observa karik bele hetan mós akordu liu-liu seitór privádu ho Governu nune’e sira bele investe iha área oioin.
“Ida-ne’e hanesan promosaun ida mós di’ak tebtebes bá ita nia rain, liu-liu seitór privadu sira, bele mós hahú ona sira nia konetividade, sira bele hahú sira nian relasaun nomós ho investór sira ka emprezáriu sira mai hosi rai oioin,” nia esplika.
Iha fatin hanesan, Prezidente Cámara Comérçio e Indústria Timor-Leste (CCI-TL), Jorge Manuel Serrano, hatutan partisipante iha forum ne’e ho númeru ne’ebé boot tebtebes, signifika ema barak entuziazmu hakarak mai haree Timor.
Ida ne’e, momentu ida importante tebes, primeira vez iha TL nia istória, organiza forum internasionál bisnis no dala-barak, TL bá partisipa de’it forum oioin iha rai liur.
“Agora ho lideransa Vise PM nian, hakarak tenta atu halo buat ruma iha rai-laran, nune’e atu halo sai mós kultura ida, aban bainrua ita bele halo tinan ida, tinan rua, ita bele halo nafatin forum sira ne’e, hodi lori ema mai koñese ita nia rain, nomós ema balun mai gasta hela osan iha ita nia rain, nune’e sirkulasaun osan bele iha liuliu bá otél sira, restaurante no kompañia sira,” nia fundamenta.
Bainaka sira ne’e mai hosi membru organizasaun rejionál ASEAN hanesan Singapura, Indonezia, Malázia, Indo China, Cambodia, Myanmar, Vietname, Tailándia, inkluzivamente Xina, Honkong, Brazil, Austrália, Korea, Japaun ho rai selseluk tán hamutuk 300-resin.
Jornalista: Rogério Pereira Cárceres