Hatutan.com, (20 Novembru 2023), Díli—Empreza SACOMTL halo lansamentu Trial bá ligagasaun Internet liu hosi investimentu Cross-Border Fibra Óptika hosi Indonézia, ne’ebé ho baze iha Batugade atu bele oferese Internet bá operadór telekomunikasaun no kliente sira ne’ebé iha kontratu ho SACOMTL.

Diretór no na’in bá empreza SACOMTL, Abílio de Araújo. Foto: Elio dos Santos da Costa.

Diretór no na’in bá empreza SACOMTL, Abílio de Araújo hateten, ohin hamutuk ho Prezidente Repúblika (PR), José Ramos-Horta halo lansamentu Trial bá iha kabu Fibra Óptika ne’ebé nu’udár investimentu Cross-Border hamutuk ho parseiru sira SACOMTL nian hosi Indonézia.

Lee Mós: Sacom no Enligo Network Sei Dada Fibra Óptika husi Singapura ho Investimentu Millaun $800

Investimentu Cross-Border Fibra Óptika SACOMTL nian ne’ebé ohin lansa Triál ne’e ho nia terminál iha Batugade ne’ebé hanaran Batugade International Gate Way no hosi ne’ebá iha Router ne’ebé sei fa’an ka fahe bá operadór no kliente sira ne’ebé sosa.

“SACOMTL halo investimentu Cross-Border Fibra Óptika ne’ebé hetan lisensa hotu-hotu hosi autoridade kompetente sira, liu-liu Autoridade Nasionál Komunikasaun (ANC), Ministériu Justisa kona-bá rai, Ministériu ambientál kona-bá lisensamentu ambientál no sira seluk,”  Abílio Araújo hateten iha Palásiu Prezidensiál Bairru-Pité, Segunda (20/11/2023).

Hahú ohin bá oin, SACOMTL servisu hamutuk ho Timor Telekom atu oferese servisu Internet bá operadór ne’e hodi bele fornese Internet ho kualidade bá kliente sira.

Nia hatutan, SACOMTL halo ona Trial ka koko ona halo ligasaun Internet liu hosi Fibra Óptika ne’ebé iha ho terminál iha Batugade no rezultadu di’ak.

Durante ne’e SACOMTL hahú tiha ona nia servisu operasionál sira no ohin mak ofisializa ninia lansamentu bá públiku maski sei iha faze Trial ninian.

SACOMTL simu ligasaun fibra Óptika bá to’o área fronteira ho Indonézia no bá tau The Markation Point iha área Atambua.

“Ohin halo lansamentu bá fibra Óptika nu’udár mós enkorazamentu bo’ot ida bá atinjimentu ne’ebé empreza SACOMTL iha, hodi kontribui bá dezenvolvimentu ekonómiku dizitál iha Timor-Leste,” nia hateten.

Tinan oin SACOMTL sei iha mós investimentu bá iha kabu submariñu, tanba Timor-Leste presiza iha konetividade ida di’ak no kualidade aas atu garante no sai hanesan preparasaun Timor-Leste nia adezaun bá iha Organizasaun Sudeste Aziátiku ASEAN.

Empreza SACOMTL mós sei oferese LapTop hamutuk 50 bá iha Palásiu Prezidensiál hodi apoia Prezidente Repúblika nia atividade sira atu tulun estudante no eskola sira ne’ebé presiza.

Jornalista: Vito Salvadór