Hatutan.com, (21 Novembru 2023), Díli— Veteranu Custódio Belo ho naran kódigu rezisténsia nian Alin Laek, husu bá Hatutan.com atu hadi’a konteúdu notísia ho títulu “Asesór 24 iha Ministériu Interiór ho Remunerasaun $1.000-$10.000, Inklui Custódio Belo ho Gastão Salsinha.”

Lee Mós: Asesór 24 iha Ministériu Interiór ho Remunerasaun $1.000-$10.000, Inklui Custódio Belo ho Gastão Salsinha

Vetaranu Custódio Belo “Alin Laek” (klaran) ho asesór ida hosi Ministériu Interiór foto hamutuk ho Xefe Redasaun Francisco Belo Simões no Koordinadór Kobertura, Cipriano Kolo. Foto/Tome da Silva

Notísia ne’ebé  publika iha loron 17 fulan-Novembru 2023 ne’e, Komandante FALINTIL, Alin Laek konsidera notísia la loos, tendénsia,  ofende nia naran di’ak no integridade hanesan veteranu ne’ebé kontribui bá prosessu libertasaun nasionál durante tinan-24 nia laran.

Liuhosi sorumutuk ho Xefe Redasaun Hatutan.com, Francisco Belo Simões ne’ebé akompaña hosi Koordenadór Kobertura, Cipriano Kolo iha sala reuniaun Hatutan.com, Tersa loraik (21/11/20223),  Veteranu Alin Laek ne’ebé akompaña mós hosi asesór ida hosi Ministériu Interiór, husu atu Hatutan.com halo servisu ho profisionál no  ho objetividade atu labele ofende ema nia integridade pesoál no onra.

Veteranu Alin Laek konsidera notísia Hatutan.com nian ne’e ofende nia integridade umana no integridade hanesan veteranu ne’ebé  dedika aan tomak bá luta libertasaun nasionál. Nia mós kestiona notísia ne’ebé publika tau nia naran iha titulu notísia la husu konfirmasaun ho nia no la husu autorizasaun hosi nia. 

Veteranu Custódio Belo “Alin Laek” dehan, servisu ne’ebé nia hala’o iha Ministériu Interiór  (MI) la’ós tanba hakarak pozisaun no osan, maibé tanba dedikasaun bá rai ida-ne’e no kontínua kontribui bá dezenvolvimentu rai ida-ne’e nian.

“Rai ida-ne’e nakfilak sai nasaun, ita hotu mak terus no ita-nia família barak mak mate hodi soi rai ida-ne’e sai nasaun. Tanba ne’e, favor ida, Hatutan.com hadi’a notísia ne’e tanba notísia ne’e akuzativu no la respeita bá ha’u nia integridade pesoál, onra no la respeita bá ami hanesan veteranu,” Alin Laek afirma.

Veteranu Alin Laek husu bá redasaun Hatutan.com atu hadi’a notísia ne’e no la presiza temi nia naran tanba iha ema balun hetan priviléjiu barak liu hanesan saida mak nia hetan.

Tuir nia, kontratu ne’ebé nia hetan iha Ministériu Interiór ne’e tanba konfiansa hosi Primeiru-Ministru (PM), Kay Rala Xanana Gusmão no konfiansa hosi Ministru Interiór, Francisco da Costa Guterres, tanba kapasidade no koñesimentu bá  servisu  sensibilizasaun sívika. 

“Ha’u bá iha ne’ebá ne’e tanba maun Xanana mak bolu ha’u atu kontinua fó kontribuisaun bá dezenvolvimentu rai ida-ne’e nian,” Alin Laek hateten.

Veteranu Alin Laek dezmente mós informasaun ne’ebé publika dehan Ministériu Interiór kontrata asesór  na’in-24. Tuir nia, asesór iha Ministériu Interiór  na’in-ualu (8) ka na’in-sia (9) tuir idaidak ninia espesialidade.

Veteranu Alin Laek  enkoraza jornalista sira hotu, liuliu jornalista sira iha Hatutan.com atu kontinua serbisu ho profisionál hodi kontribui bá dezenvolvimentu rai ida-ne’e nian hosi idaidak ninia knaar.

“Favor, respeita ema nia integridade pesoál no hala’o imi jornalista sira-nia servisu ho objetividade atu tane interese komún no kontribui bá Timor-Leste nia prosperidade, liuhosi notísia sira ne’ebé imi elabora no publika iha imi sira-nia mídia ida-idak,”  Veteranu Alin Laek hateten.   

Jornalista: Rogério Pereira Cárceres