Hatutan.com, (21 Novembru 2023), Díli—Atuál Assesór Polítika bá Prezidénsia Repúblika, Tito Cristóvão da Costa “Lere Anan Timur” hamutuk ho atuál Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek” bá vizita ona ró Haksolok iha Estaleiru Figuera de Voz Portugál hodi haree direta konstrusaun ne’ebé atinje ona 80%, no konfirma katak iha tinan 2024 ró ne’e sei to’o Timor Leste.

Atuál Assesór Polítika bá Prezidénsia Repúblika, Tito Cristóvão da Costa “Lere Anan Timur” hamutuk ho atuál Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl “Falur Rate Laek”. Foto: Tome da Silva.

Lere ho Falur aproveita vizita ró ne’e bainhira reprezenta Prezidente Repúblika, José Ramos-Horta partisipa iha serimónia aniversáriu Independénsia país amigu Guiné-Bissau nian.

Lee Mós: Auditoria TR: Timor-Leste Gasta Ona Millaun $24 Bá Konstrusaun Ró Haksolok

Inisiativa hosi vizita ne’e tanba antes ne’e mosu informasaun oioin ne’ebé espalla iha povu Timor-Leste nia leet katak, ró Haksolok ne’ebé Autoridade Rejiaun Administratitiva Espesiál Oecusse Ambeno (RAEOA) sosa iha Portugál, ferújin ona.

“Ami bá to’o Guiné-Bissau, ha’u ko’alia ho Xefe Estadu Maiór Jenerál, Komandante Falur, ami mós bá halo vizita ida pur-kuriozidade atu hasai dúvidas iha Timor kona-bá Ró Haksolok. Ohin, ami nia entrevista ida ne’e, halo Timor haksolok duni, la’os boatus sira ne’ebé ita rona dehan ró ne’e laiha, ferújen, ró ne’e atu di’ak ona. Ha’u bele dehan katak, 2024 ró prontu ona,” Lere Anan Timur hateten iha Aeroportu Internasional Nicolau Lobato, Comoro,  hafoin fila hosi Guiné-Bissau, Tersa (21/11/2023).

Lere haktuir, durante vizita iha fatin estaleiru nian, fábrika na’in informa katak, progresu konstrusaun bá kondisaun ró ne’e atinje ona 80% no hela tán de’it 20% atu konklui.

“Ne’e di’ak ona, agora ita hein atu labele espekula katak ró ne’e motór laiha, ferújen. Entaun, ami na’in-rua bá haree ho matan. Katak, afinál ró ne’e di’ak ona. Ne’e mak Haksolok bá Timor, haksolok mós bá ita nia inan-aman sira iha Oecusse,” nia hateten.

Funu na’in ne’e mós preokupa katak, maski kontente tanba ró ne’e besik atu mai ona iha tinan oin, maibé Governu tenke haruka ekipa ida, ekipa tékniku bá hodi haree, oinsa abitua ho ró ne’e nune’e aban bainrua ró ne’e to’o mai bele oha ona esperiénsia atu kuidadu, halo manuntensaun liuliu oinsa lori ró ne’e ho di’ak.

Jornalista: Rogério Pereira Cárceres