Hatutan.com (21 Novembru 2023), Díli—Komisaun Anti Korrupsaun (KAK) liu hosi Diresaun Jerál Investigasaun labele halo investigasaun bá kazu krime korrupsaun hamutuk 49 no oras-ne’e daudaun  pendente hela tanba to’o ohin loron seidauk iha Komisáriu.

Diretór Jerál Investigasaun KAK, José Verdial Magno. Foto/Elio dos Santos da Costa.

Diretór Jerál Investigasaun KAK, José de Araújo Verdiál hateten, hahú kedan iha fulan Abril 2023, bainhira mandatu Komisáriu KAK nian termina, prossesu hotu pendente ho totál kazu 49.

Lee Mós: CAC Submete Kazu Korrupsaun 16 bá MP Inklui Kazu eis-Ministru MAPKOMS

“Ita hein bainhira iha Komisáriu foun mak foin bele kontinua halo investigasaun, inklui mós kazu Ró Haksolok. Ho Komisáriu ne’ebé laiha, automatikamente fó impaktu boot tebes bá iha KAK enjerál, liu-liu bá servisu investigasaun, tanba ita labele halo servisu investigasaun hanesan babain. Entaun, prossesu sira ita suspende hela,” José Verdial hateten iha knaar fatin, Faról, Tersa (21/11/2023).

José Verdiál preokupa tanba tuir Lei númeru 8/2009 kriasaun KAK nian, iha artigu 7 hateten katak, Komisáriu mak iha knaar atu dirize Komisaun ne’e, Komisáriu mak iha knaar atu kontrola legalidade bá iha asaun prevensaun no asaun investigasaun nian.

“Tanba ne’e maka alende kazu sira seluk, kazu Ró-Haksolok neebé KAK kontinua pendente, ne’e la’ós tanba ami nia hakarak. Nia prossesu mak hanesan ne’e duni. Lei mak hateten nune’e. Tanba ne’e mak hanesan tékniku ida hala’o servisu tuir de’it saída mak Lei Haruka. La’ós la’o tuir pessoál ida nia hakarak,” nia hateten.

Maski kazu Ró-Haksolok investigasaun seidauk termina, maibé nia realata, daudaun ne’e to’o ona iha faze atu konklui, maibé tanba kauza hosi Komisáriu KAK to’o ohin loron seidauk iha, entaun prossesu sira hotu seidauk bele finaliza.

Tuir dadus, hahú hosi fulan Janeiru to’o 21 Novembru 2023, kazu sira ne’ebé liga ho denunsia públiku hamutuk 83, hosi númeru ne’e iha kazu 35 mak kabe bá kompeténsia KAK nian, kontinua halo averiguasaun, restu refere bá instituisaun sira hanesan, PDHJ ho Inspesaun Jerál Estadu.

Hosi kazu sira ne’e mós iha kazu korrupsaun hamutuk 17 mak KAK konsege konklui ona nia averiguasaun no haruka ona bá Ministriu Públiku, hanesan auto partisipasaun.

Jornalista: Gloria Maia