Hatutan.com, (21 Novembru 2023), Díli—Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM) Timor-Leste, Arsénio Paixão bano ho estrutura deklara publikamente hodi rejigna-aan liu hosi konferénsia imprensa iha edifísiu autoridade nian iha Oebau, Tersa (21/11/2023) hodi fó fatin bá estrutura foun.

Prezidente Autoridade Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM) Timor-Leste, Arsénio Paixão Bano ho estrutura deklara publikamente hodi rejigna-aan liu hosi konferénsia imprensa iha edifísiu autoridade nian iha Oebau, Tersa (21/11/2023). Foto: Média RAEOA-ZEESM.

Iha konferensia imprensa ne’e, Arsénio relata, ekipa liderada hosi Prezidente Autoridade halo komunikasaun dahuluk ho Primeiru Ministru (PM), Kay Rala Xanana Gusmão iha 1 Jullu 2023, no hahú hosi loron tomada de pose bá atuál Primeiru-Ministru, Autoridade disponibiliza pozisaun Prezidente Autoridade no membru autoridade hotu, hodi fasilita tranzisaun no fasilita diskusaun bá tomada desizaun kona-bá futuru lideransa bá RAEOA-ZEESM.

Lee Mós: Proposta Alterasaun Lei Kriasaun RAEOA-ZEESM Aprovadu Iha Finál Globál, FRETILIN “Walk Out”

“Biar seidauk iha resposta, ekipa kontinua espresa vontade no interesse bá Primeiru-Ministru, Kay Rala Xanana Gusmão ho ninia Ministru hotu-hotu kona-bá vontade atuál Autoridade atu transfere kna’ar tuir dalan ne’ebé loos no permite pasazen testemuñu di’ak, kontinuidade iha implementasaun programa nasionál no mós permite futura administrasaun hala’o kna’ar ho di’ak,” Hatutan.com sita komunikadu.

Autoridade assegura funsionamentu RAEOA no ZEESM-TL durante loron 120, liu tiha tomada de posse hosi Primeiru Ministru ho membru IX Governu.

“Primeiru-Ministru halo kompromisu bá povu Timor-Leste tomak katak, iha loron 120 nia laran sei aprezenta bá povu tomak no atoni sira em espesiál Administrasaun foun bá RAEOA no ZEESM-TL, loron 24 liu tiha data promessa hosi Primeiru-Ministru no to’o ohin loron ita sasin katak Primeiru Ministru seidauk biban atu foti desizaun kona-bá futura lideransa bá RAEOA no ZEESM,” komunikadu ne’e hateten.

Maski Prezidente Autoridade (PA) kompreende no sensibilizadu bá difikuldade ne’ebé Governu ne’e hasoru hodi kria konsensu iha koligasaun ne’ebé nia lidera kona-bá futura lideransa RAEOA no ZEESM-TL, Autoridade hein katak ho autoridade nia desizaun atu rezigna em bloku, desizaun ne’e bele hakmaan servisu Primeiru Ministru nian no fasilita konsensu iha koligasaun nia laran no halais prossesu ne’e.

Desizaun atu rezigna a’an mak desizaun atu ajuda Governu bele foti desizaun kona-bá futura lideransa, no mós permite futura lideransa estuda no aprende kona-bá orsamentu ne’ebé Governu sentrál impoin mai lideransa foun, ne’ebé tuir loloos iha semana oin presiza bá defende orsamentu ne’e iha Parlamentu Nasionál (PN).

Prezidente Autoridade (PA) empresta alegoria hosi Primeiru-Ministru, Kay Rala Xanana Gusmão no hato’o katak “iha dapur, sana lian ona, be’e nakali tiha ona, karik ita la tein, dala-ruma be’e sem maran, sana sei a’at, ai-maran ita sunu saugate deit”.

Jornalista: Vito Salvadór