Hatutan.com, (21 Novembru 2023), Díli—Ministériu Defeza (MD) hamutuk ho Komandu FALINTIL Forsa Defeza Timor-Leste (F-FDTL) identifika ona membru F-FDTL na’in 500-resin involve iha Grupu Artes Marsiais (GAM) ho Grupu Artes Rituais (GAR) no fó opsaun rua, entre hili serbi Estadu ou Serbi Arte.

Ministru Defeza, Donanciano da Costa Gomes Pedro “Klamar Fuik”. Foto: Tome da Silva.

Prossesu identifikasaun ne’e ho baze bá Rezolusuan Governu númeru 45/2023, loron 10 fulan Novembru, ne’ebé determina suspensaun kona-bá ensinu, aprendijazen no prátika sira artes marsiais nian ho adosaun medidas hodi asegura órden públika.

Lee Mós: MI Hatún Despaxu Identifika Membru PNTL Envolve iha GAM-GAR

Ministru Defeza, Donanciano da Costa Gomes Pedro “Klamar Fuik” hateten, nia parte simu ona lista hosi Komandu F-FDTL, kona-bá naran membru sira ne’ebé mak durante involve iha atividade arte marsál no arte rituál.

“Lista ne’e ami iha tiha ona. Identifikadu hotu ona, Sé ha’u la sala, ha’u iha dadus sira ne’e hotu hosi komandu F-FDTL pasa tiha bá ha’u, 500-resin,” Ministru Defeza hateten hafoin fila hosi enkontru entre Ministru Defeza sira nível ASEAN nian, iha Aeroportu Internasionál Nicolau Lobato, Comoro-Dili, Tersa (21/11/2023).

Desizaun ida-ne’e sai hanesan kompromísiu Governu nian liuhosi rezolusaun Konsellu Ministru nian, ne’ebé molok ne’e determina ona katak, sei suspende atividade sira artes marsiais hotu, atu halo avaliasaun.

Liuhosi avaliasaun ne’e mak atu haree artes marsiais ida ne’ebé mak kontribui bá desportu, bá arte, ne’ebé mak konstitui iha Governu nian objetivu.

Artes marsiais ida ne’ebé mak la kontribui, artes marsiais ida ne’ebé mak nia individuais, ate la kria kondisoens bá Timor-Leste nia dezenvolvimentu.

Hosi ne’ebá maka, Komisaun Reguladora bá Artes Marsiais (KRAM) ne’ebé mak tau matan, halo akompañamentu, sei halo avaliasaun, depois haree oinsá mak bele haree sira nia estatutu, sira iha kondisoens atu kontinua hanesan organizasoens desportivas arte nian ka la’e.

Relativamente pozisaun Forsas Armadas ho Polisia Nasional nian, ne’e klaru tebtebes. Kompromísiu ida ne’ebé mak halo kedan iha tinan 2009 kuandu Governu anteriór hateten katak, F-FDTL ho PNTL sei la partisipa iha kualkér atividade sira artes marsiais nian, ho atividade polítika sira no atividade sira seluk ida-ne’e, define tuir Lei.

Iha artes marsiais nian, kompromísiu ida ne’ebé mak membru sira halo tiha ona iha 2009, F-FDTL kumpri hela rezolusaun ida ne’e to’o ohin loron, no identifika iha membru sira partisipa duni.

“Komandu F-FDTL rasik a-lista no bolu hodi hateten, eskolla. Hakarak atu kontinua artes marsiais ka hakarak atu serve F-FDTL hodi serve interese Estadu nian, nasaun nian. Ida ne’e klaru bá F-FDTL,” nia dehan.

Tanba ida ne’e, Pedro Klamar-Fuik, hakarak ho pozisoens ne’ebé mak sira iha, halo pozisaun ida ne’e bele sai referénsia bá nasaun tomak, tanba bainhira servídor Estadu nian liu-liu hanesan Forsas Armadas no Polisia Nasional la halo parte bá organizasoens ne’ebé mak iha interese sira ne’ebé mak la hanesan ho interesse Estadu no nasaun nian.

Nia hatutan, instituisoens sira seluk bele halo tuir saida mak komandu F-FDTL oras ne’e halo hela. Tanba Primeiru Ministru rasik deklara ona katak, identifika membru Forsa Armada no Polisia Nasional sira ne’ebé mak involve iha GAM-GAR, tenke halo juramentu iha 28 Novembru tinan ne’e, iha ámbitu Komemorasaun loron Proklamasaun Independénsia RDTL nian.

“Naturalmente iha 28 Novembru, serimónia nasionál ida, depois ita haree tempu ida ne’ebé mak di’ak atu ita bele espressa ita nia kompromísiu ita nia militár sira ne’e ninian, perante Bandeira nasional, perante Repúblika Demokátika Timor-Leste,” nia hateten tán.

Iha fatin hanesan, Xefe Estadu Maiór Jenerál F-FDTL, Tenente Jenerál Domingos Raul “Falur Rate Laek”, hatutan, kona-bá atu halo tán juramentu bá Bandeira, uluk ne’e komandu F-FDTL kombate tiha ona. Membru sira ne’ebá ne’e, komandu fó opsaun rua.

“Ami identifika sira hothotu, ó hili hela iha instituisaun F-FDTL, entaun sai. Sé hakarak servisu iha instituisaun F-FDTL, entaun dezvinkula ninia relasaun ho ninia artes marsiais. Ne’e ami halo ona ida ne’e,” Falur Rate Laek afirma.

Komandante Falur dehan, durante ne’e, membru sira ne’ebé inkorpora ona iha instituisaun F-FDTL, komandu halo identifikasaun hotu kedan.

“Data baze iha ne’ebá ne’e iha. Kada komponente mós iha. Kuartél Jenerál mós iha. Kuandu identifikadu, bolu ona sira mai. Irmaun maka tenke eskolla, hakarak servi instituisaun, entaun dezvinkula, ka sai hosi ó nia artes marsiais. Mais, sé ó hakarak bá tama iha ne’ebá, entaun sai hosi Forsa bá iha ne’ebá,” Falur alerta tán.

Jornalista: Rogério Pereira Cárceres