Hatutan.com, (23 Novembru 2023), Díli—Banku Dezenvolvimentu Aziátiku (ADB) ho Organizasaun Nasoens Unidas bá Programa Alimentár Mundiál (WFP) asina onaaAkordu administrativu hodi kontribui bá projetu avaliasaun boot iha Timor-Leste (TL) ne’ebé foka liu bá seguransa ai-han to’o ohin loron, ho apoiu fundu hosi ADB liu hosi inisiativa Estudu Diagnóstiku Ekonómiku iha Ázia no Pasífiku.

Serimónia asinatura akordu administrative entre reprezentante Banku Dezenvolvimentu Aziátiku (ADB) ho Organizasaun Nasoens Unidas bá Programa Alimentár Mundiál (WFP). Foto: WFP.

Inisiativa hosi projetu peskiza ida-ne’e sei kobre uma-ka’in 9.000-resin, fasilita Governu Timor-Leste atu hetan dadus krusiál, hodi hatán bá preokupasaun nível falta seguransa ai-han.

Lee Mós: TL Alerta Seguransa Ai-han no Bailoron Naruk Kauza Hosi El Niño

WFP sei fornese apoiu tékniku bá Governu hodi halo avaliasaun ne’ebé foka liu bá seguransa ai-han iha eskala ne’e – ne’ebé mak boot liu hala’o iha rai laran.

Advertisement

“Ami kontente halo parseiru ho Governu ho WFP bá servisu importante ida-ne’e. Timor-Leste sei hasoru nafatin problema ho nível malnutrisaun ne’ebé aas iha mundu. Importante tebes atu tau atensaun bá problema falta seguransa ai-han atu asegura katak, populasaun iha asesu bá ai-han sufisiente no nutritive,” Hatutan.com sita deklerasaun Diretora ADB iha Timor-Leste, Stefania Dina iha komunikadu.

Avaliasaun ne’e sei estabelese análize kle’an kona-bá nível falta seguransa ai-han hosi populasaun iha munisípiu 14 no mós iha nível nasionál.

Ida-ne’e mós sei deside padraun konsumu ai-han bá uma-ka’in, tipu ai-han saida mak família sira konsumu no estratejia sobrevivénsia prinsipál ne’ebé mak família sira adopta hodi hatán bá problema atuál ho kustu ai-han aas loos no mudansa klimátika mai derrepenti durante tinan kotuk.

Nun’e mós Diretora no Reprezentante WFP iha Timor-Leste, Alba Cecilia Garzon Olivares hato’o pontu importante hosi projetu ne’e katak, avaliasaun ne’e la’ós de’it kona-bá númeru dadus; ida-ne’e kona-bá fornese dadus krusiál ho tempu ne’ebé loos hodi informa Governu Timor-Leste bá desizaun kona-bá preparasaun ai-han emerjénsia, alokasaun rekursu, no intervensaun protesaun sosial.

Deskobrimentu hirak ne’e mós sei kontribui bá planu klasifikasaun falta seguransa ai-han agudu IPC nian ba 2023/24 no sei uza hodi determina númeru ema falta seguransa ai-han ne’ebé aumenta desde análize ikus IPC ba 2022/23, hala’o iha Novembru 2022.

Advertisement

Rezultadu foun IPC nian sei publika iha inísiu 2024. Organizasaun Nasoens Unidas bá Programa Alimentár Mundiál hanesan organizasaun umanitáriu boot liu ne’ebé salva vida iha tempu emerjénsia no utiliza asisténsia alimentár hodi harii dalan ba dame, estabilidade no prosperiedade bá ema sira ne’ebé mak foin rekupera hosi konflitu, dezastre no impaktu mudansa klimátika.

Jornalista Estajiáriu: Lázaro Pereira Quefi