Hatutan.com, (23 Novembru 2023), Díli- Prezidente Parlamentu Nasionál (PPN), Maria Fernanda Lay, klarifika, katak subsídiu transporte ho montante $1.600 kada fulan ne’ebé prevé bá deputadu sira ne’e la admite ona atu Deputadu sira  lori karreta Parlamentu Nasionál bá uma no sei lahetan mos regalia bá manutensaun no osan bá kombustivel nian.

Lee Mós: Subsídiu Transporte $1600 Kada Fulan bá Deputadu Sira Seidauk iha Aprovasaun Finál

Iha projetu Lei Nú. 4/VI (1″), ne’ebé prosede bá alterasaun datoluk bá Estatutu Deputadu tuir Lei Nú 5/2004, de 5 de Maio, ne’ebé altera pelas Leis nú. 7/2017, de 26 de abil e 4/2023, de 25 de janeiro iha artigu 12 ne’ebé ko’alia kona-bá subsídiu bá deputadu sira.

Advertisement

Prezidente PN, Maria Fernanda Lay. Foto/Elio dos Santos da Costa

Prezidente Parlamentu Nasionál (PPN), Maria Fernanda Lay hateten subsídiu bá deputadu sira nu’udar opsaun ida tanba hakarak ka lakohi iha estatutu deputadu hateten momoos katak deputadu sira tenke iha transporte hodi hala’o fiskalizasaun.

Nia esplika atu tau osan sosa transporte karreta labele, subsídiu transporte labele, agora mekanizmu ne’e bá oin oinsá, iha estatutu deputadu sira nian sei iha prosesu ba alterasaun no hein katak prosesu alterasaun ne’e bele hetan formula ida klaru hodi bele fó meius bá deputadu sira bele halo servisu.

“Bainhira subsídiu bá deputadu sira pasa ona, signifika deputadu sira sei la utiliza ona karreta Parlamentu Nasionál nian, subsídiu bá manutensaun  karreta mós sei la fó, subsídiu ba roda mós sei la fó, no sei domíniu. Sei dada fila karreta prado no pajero sport. Tanba  ho subsídiu ne’ebé iha deputadu sira bele hala’o sira nia servisu hanesan fiskalizadór no subsídiu ba kombustivel bele diskute no sei tau matan liu-liu bainhira deputadu sira halo dezlokasaun bá munisípiu, maibé iha Dili laran sei tetu, depende bá interpretasaun ba viatura sira ho subsídiu transporte ne’ebé sei fó,” PPN Maria Fernanda Lay esplika bá jornalista sira iha Palásiu Prezidensiál, Díli, Kinta (23/11/2023).

Klaru katak orsamentu ne’ebé tau tiha ona iha orsamentu parlamentu nasionál nian hanesan projesaun ida, bele ezekuta no bele la ezekuta, se bainhira laiha konkordánsia, klaru sei fila bá kofre estadu ka bele sofre alterasaun iha OJE.

Regalia  bá deputadu sira ne’e konsta iha lei, tanba lei ne’e tau tiha ona ema ida la reklama, no agora bainhira aloka orsamentu foin mak reklama pergunta mak ne’e iha OJE Parlamentu Nasionál mós aprova no tenke ba fiskaliza, agora ba halo kritika nusa.

“Dala barak kritika bele mas tenke krítika ho proporsionál tanba hola karreta bá deputadu sira, ba governu mós sosa tanba ne’e hein katak sosiedade sivil sira sei tetu atu haree katak problema foos la’ós sai difikuldade bá transporte bá deputadu sira atu bá halo fiskalizasaun,” Nia dehan.

Advertisement

Karreta prado ne’ebé agora deputadu sira utiliza liu tinan-12  ona no balun situasaun la di’ak ona, no PN labele arriska deputadu sira nia seguransa bainhira sa’e bá halo fiskalizasaun iha foho leten no área remota sira, no atividade sira seluk ne’ebé deputadu sira tenke bá buka tuir iha área izoladu no remota sira.

Ba karreta ida ho marka pajero sport barak hetan tiha dezastre, no labele rekoopera ho orsamentu manutensaun nune’e hakarak ka lakohi tenke troka.

Atu troka transporte ba deputadu sira ne’e ho subsídiu ka sosa karreta foun ne’e iha deputadu 65 nian desizaun no nia prosesu sei la’o hela bo’ot ka kiik buat hotu depende ba kapasidade Parlamentu Nasionál atu finansia akizasaun transporte ho meius oinsá deputadu sira mós tenke presta kontas ba kámara kontas, ne’ebé husik prosesu ne’e la’o, klaru katak iha diskordansia maibé fiar katak sosiédade sivil mós avalia estadu tomak uza fasilidade estadu nian la’ós de’it parlamentu nasionál.

Jornalista: Vito Salvadór

Advertisement