Hatutan.com, (22 Juñu 2023), Díli-Prezidente Parlamentu Nasionál (PPN),  Maria Fernanda Lay, konsidera iha Lejislatura da-neen ne’e Parlamentu Nasionál simu naha-todan tanba tenke konsolida hirkas instrumentu legál sira atu bele responde bá ezijénsia povu Timor-Leste nian. 

Lee Mós : Deputada Maria Fernanda Lay Eleita Nu’udár Prezidente PN Períudu 2023-2028

Prezidente Parlamentu Nasionál, Maria Fernanda Lay. Foto/Elio dos Santos da Costa

Konsiderasaun ida-ne’e, Fernanda Lay hato’o durante diskursu dahuluk ho kualidade nu’udár PPN eleita iha seremónia abertura Lejislatura da-neen nian iha plenária PN, Kinta (22/06/2023).

Ema hotu orgullu, hanesan Timor oan, tanba kontribui ona bá prosesu demokrátiku ho matenek, no maduru hodi jere diferensa sira, partidu  polítiku sira hothotu mantein pás, no Timor oan nia unidade, metin, no forte bá bebeik.

Advertisement

Iha faze foun ne’e, halo Estadu Timor-Leste no povu bele hiit-ulun, hateke dook bá oin, ho fiar aan, sai orgullu nu’udár Estadu ida ne’ebé independente no demokrátiku, hodi dignifika mártires da pátria sira-nia mehi hodi lori povu Timor-Leste bá moris di’ak iha estadu direitu demokáriku.

“Hanesan segundu órgaun Estadu, Parlamentu Nasionál iha Lejislatura da-neen, simu naha-todan, tanba tenke konsolida hikas ita-nia instrumentu legál sira, atu responde ezijénsia povu nian, tanba iha tempu naruk, ita hotu haree no rona, povu lakohi atu hein kleur tán,” PPN Eleita, Deputada Maria Fernanda Lay hateten iha diskursu.

Fernanda Lay  partilla ninia agradesimentu u’ain bá konfiansa no fiar ne’ebé mai hosi prezidente partidu CNRT, Maun-boot Kay Rala Xanana Gusmão ho Sekretáriu jerál Francisco Kalbuadi Lay, no bá Partidu Demokrátiku.

“Ha’u haku’uk bá estrutura tomak partidu CNRT no PD, militantes, aliadu sira , simpatizante sira no povu tomak, ne’ebé fó ona fiar bá partidu CNRT, hodi lidera parlamentu nasionál,” Deputada Fernanda Lay agradese.

Membru PN hosi Bankada CNRT ne’e dehan, konfiansa ne’e sei la monu bá rai, konta mós destintu deputadu no deputada sira hotu, nia apoiu, iha altu plenáriu VI Lejislatura ida ne’e, halo nia fiar metin, sira-hotu sei hamutuk, hala’o mandatu tui lei konstituisaun haruka, nu’udár lejisladór, fiskalizadór, no desizisaun politika sira.

Advertisement

“Ha’u komprometidu, sei fó kontinuidade bá servisu  hirak ne’ebé la’o hosi prezidente parlamentu sesante, sei mantein komunikasaun ho sira, ha’u mós sei dere bankada ida-idak nia odamatan, no deputadu sira ida-idak, hodi konsolida di’ak liután funsionamentu, órgaun lejislativu ida ne’e,” Maria Fernanda Lay promete.

Parlamentu nasionál, alende tenke sai orgaun povu nian, iha fatin ne’e duni, sei hotu sei dignifika órgaun leljislativu ida ne’e, ho produtu lejislasaun no politika ne’ebé apósta bá dezenvolvimentu inkluzivu.

Deputada Fernanda Lay afirma, dalan loos liu mak sira hotu sei hamutuk, hamutuk bá mudansa, hametin relasaun orgaun estadu sira seluk, liu-liu ho governu, no instituisaun sira seluk, hodi serví di’ak liután povu ida ne’e.

“Ha’u fiar metin, hamutuk distintu deputadu na’in-64, iha parlamentu ida ne’e, servisu komisaun sira espesiázadas parlamentár nian  sei funsiona di’ak liután. Ita sei mantein relasaun di’ak ho partidu hothotu, hametin relasaun ho mídia no ONG sira,” Fernanda Lay tenik.

La’ós ne’e de’it, PPN eleita ne’e komprometidu katak, iha ninia prezidénsia ne’e, sira sei fortalese relasionamentu ho grupu sira  amizade parlamentáres ho País sira seluk, ho País ASEAN nian, Comunidade dos Paises da Lingua Portuguêsa (CPLP), to’o CPLP rasik, inklui organizasaun sira seluk hanesan, IPO, APA, ALFA no  País membru sira organizasaun mundial G7+ nian, no selseluk tán, ne’ebé mak tuir PN ninia konkordata, sei iha kompromísiu barak ho organizasaun sira ne’e.

Advertisement

Jornalista: Rogério Pereira Cárceres