Hatutan.com, (13 Jullu 2023), Díli- Diretora Ezekutiva Judicial System Monitoring Program (JSMP), Ana Paula Marçal, husu bá Parlamentu Nasionál (PN) atu halo tradusaun bá konteúdu hosi lejizlasaun ka lei sira ne’ebé produz ona bá lian Tetum.

Lee Mós : JSMP Rekomenda Pontu Haat Bá Membru Lejislativa Foun

JSMP halo enkontru ho Prezidente Parlamentu Nasionál, Maria Fernanda Lay, Kinta (13/07/2023). Foto/Elio dos Santos da Costa

JSMP mós husu atu bainhira Parlamentu Nasionál ne’ebé hanesan orgaun lejislativa, bainhira halo lei ruma nia konteudu ne’e tenke halo mós tradusaun bá Tetum atu bele fasilita populasaun sira kompriende no bele mos kumpri.

“Kona-bá lei sira ne’ebé produz iha Parlamentu Nasionál maiória ho lian Portugés ne’e los katak hanesan sidadaun tenke hatene lian Portugés, maibé iha realidade ema barak mak ladun hatene Portugés, tamba ne’e lei sira ne’ebé iha presija muda nia konteúdu bá lian Tetum atu nune’e iha konsulta públiku sidadaun sira bele hatene no kompriende lei ne’e rasik,” Ana Paula Marçal ba jornalista sira iha Parlamentu Nasionál, Kinta (13/07/2023).

JSMP mós rekomenda bá iha Parlamentu Nasionál, liu-liu ba deputadu sira bainhira bá halo fiskalizasaun iha terrenu mak identifika erru ruma ka iha programa sira ne’ebé ninia implementasaun ne’e presija hadi’a bolu kedas atensaun bá Governu no husu bá ministériu relevante atu bá hatan imediata iha Parlamentu Nasionál nune’e labele dada naruk selae han tempu no hafoin fiskalizasaun la hetan objetivu ne’ebé iha.

Diretora Ezekutiva Judicial System Monitoring Program (JSMP), Ana Paula Marçal. Foto/Elio dos Santos da Costa

Prezidente Parlamentu Nasionál, Maria Fernanda Lay fó rekomendasaun atu JSMP kontínua halo monitorizasaun no observasaun bá iha área justisa no Parlamentu Nasionál sei nafatin presija JSMP nia observasaun sira hodi hadi’a di’ak liután servisu sira lejizlativa nian no mós justisa nian.

JSMP mós hato’o relatóriu sira monitorizasaun no observasaun nian bá PN hanesan relatóriu jeral monitorizasaun seitor lejislatura no justisa 2022, Peskiza kona-bá armonizasaun idade menor iha kódigu penal no Sivíl nian, relatoriu anual Parlamentu Nasionál 2022 no ikus liu mak sumário servisu no funsionamentu Parlamentu Nasionál iha lejislatura antes.

Jornalista: Vito Salvadór