Hatutan.com, (14 Marsu 2024), Díli- Prezidente Parlamentu Nasionál (PPN), Maria Fernanda Lay, fó tempu fulan-ida bá Komisaun Funsaun Públiku (CFP, sigla portugés) ho Ministériu Edukasaun (ME) atu rezolve eis-profesór kontratadu sira-nia problema.   

Lee Mós: PN Sei Buka Solusaun bá Problema Eis-Profesór Kontratadu

Prezidente CFP, Agostinho Letêncio de Deus. Foto/Zita Menezes

Iha Kinta, 14 fulan-Marsu 2024, Komisaun G Parlamentu Nasionál ne’ebe trata asuntu Edukasaun, Joventude, Sidadania no Kultura, halo audiénsia ho CFP atu oinsá mak buka solusaun bá problema eis-profesór kontratadu sira-nian.

“Ami hetan konvite hosi Komisaun G entaun ami nian prezensa  hanesan CFP atu hato’o de’it informasaun balu liga ho prosesu ingresu ne’ebé mak durante ne’e hamutuk ho Ministériu Edukasaun hala’o tiha ona. Liga mós ho teste bolsa kandidatu ne’ebé mak  sei hahu Sesta aban (15/03/2024)  iha CFP no mós liga ho eis-profesór kontratadu sira ne’ebé ita hotu akompaña iha média liuliu sira ne’ebé la konsegé tama bá prosesu ingresu,” Prezidente CFP, Agostinho Letêncio de Deus  hateten bá jornalista hafoin audiénsia ho Komisaun G PN.

CFP ne’ebé responsavél mós bá iha prosesu ida-ne’e espera iha fulan ida nian CFP, PN ho ME bele iha ona solusaun bá  eis-profesór kontratadu sira-nia problema.

“Ami nian hanoin katak iha momentu balu hanesan horisehik ita rona hosi Prezidente Parlamentu Nasional Maria Fernanda Lay orienta CFP ho Ministeriu Edukasaun atu bele  iha fulan-ida nia laran atu buka solusaun. Entaun, ida-ne’e mak  ami ko’alia hamutuk inisia para atu bele ko’alia ona no ami espera katak durante fulan-ida nia laran ami buka informasaun no idea sira atu nune’e ikus mai iha fulan ida-ne’e nian laran ita bele iha ona prosesu no iha ona solusaun bá problema sira ne’e,” Nia subliña .

Prezidente CFP ne’e espliká iha buat rua ne’ebé presiza destingi mak ida bá sira ne’ebé la tama bá ingresu mak sira ne’ebé kontratu to’o Dezembru 2022.

“Ha’u hanoin ita akompaña beibeik Ministra Edukasaun Dulce de Jesus espliká bei-beik iha posibilidade lubuk ida mak sira bele asina bá kontratu determinadu ka ida mak indeminasaun fulan ida bá sira ne’ebé mak kontratu ona fulan ida bá sira ne’ebé mak kontratu tinan tolu ida-ne’e to’o 2022 agora iha 2023 mak agora ita buka hela solusaun no halo hela diskusaun ne’e mak CFP hamutuk ho Parlamentu Nasionál no mós Ministériu Edukasaun sei buka solusaun iha fulan ida nian hanesan orientasaun hosi PPN,” Nia hateten.

Jornalista Estajiária: Zita Menezes