Hatutan.com, (27 Novembru 2023), Dili—Militár timoroan hamutuk na’in-tolu sai manán-na’in iha kompetisaun tiru ne’ebé hala’o iha área Robertson Barraks, Darwin, Austrália.

Komandu FALINTIL Forsa Defeza Timor-Leste (F-FDTL) fó sai rezultadu kompetisaun tiru ne’ebé hala’o iha área Robertson Barraks, Darwin, Austrália involve Militár timoroan sira no iha na’in-tolu sai manán-na’in, Segunda (27/11/2023). Foto: Tomé da Silva.

Komandu FALINTIL Forsa Defeza Timor-Leste (F-FDTL) husik membru na’in-17 bá Austrália iha Sexta (17/11/2023), hodi partisipa evenu kompetisaun tiru nian ne’ebé organiza hosi Forsa Australianu sira, hanaran “Tour Tiru Kompetisaun”.

Lee Mós: F-FDTL Manán Esperiénsia Hosi Ezersísiu “Harii Hamutuk”

Kompetisaun tiru ne’e involve de’it forsa país rua ne’e nian hanesan Timor-Leste ho Austrália, ne’ebé mak hala’o besik semana ida.

Iha atividade Tour tiru Kompetisaun ida-ne’e ho termu militár, sira hanaran “ADF 5RAR”, katak, nível selesaun ninian iha manán jerál, manán-na’in dahuluk (primeiru lugár) no manán-na’in daruak (segundu lugár) iha tiru grupu.

Durante tiru to’o rezultadu finál hatudu katak, Cabo Abrão hosi CN (Fuzileiros), manán iha kompetisaun “Tiru Kabuar sira bolu (best shootingoverall)”.

Soldadu, Albino Vicente Martins, hosi Unidade FALINTIL (UF) manán iha “Tiru Laís Liu”, no Soldadu Juvinal hosi Unidade Polisia Militár (PM) manán-na’in iha “Tiru Mudansa” durante treinamentu konjuntu to’o finaliza kompetisaun. Prémiu ne’ebé vensedór sira ne’e lori mai Timor-Leste maka osan-mutin ida, no taxa ki’ik rua.

Portavós Komandu F-FDTL, Capitão de Mar e Guerra João da Silva hateten, ekipa ida-ne’e bá tuir kompetisaun tiru ho mós atividade treinu operasionál no treinu tátika nian iha Austrália hamutuk ho forsa Austrália, hodi reforsa no hasa’e liután kapasidade operabilidade iha ámbitu forsas armadas ninian.

Komandante João informa, kompetisaun ne’e Timor-Leste partisipa ona bá dala-rua iha 2022 no 2023.

Komandu FALINTIL Forsa Defeza Timor-Leste (F-FDTL) fó sai rezultadu kompetisaun tiru ne’ebé hala’o iha área Robertson Barraks, Darwin, Austrália involve Militár timoroan sira no iha na’in-tolu sai manán-na’in, Segunda (27/11/2023). Foto: Tomé da Silva.

Membru F-FDTL sira ne’ebé partisipa, mai hosi Componente Terrestre (CT), Polícia Militár (PM), Unidade FALINTIL (UF), Komponente Naval (Fuzileiru sira), ne’ebé partisipa ho di’ak tebes, no kompetisaun ne’e la’o di’ak, to’o hetan mós rezultadu ne’ebé di’ak.

“Iha tiru ne’e modalidade barak mak hanesan halai tiru, hakneak, toba, depois modalidade ne’e oioin de’it. Ita iha kapasidade, kuandu sira lori medalla mai ne’e signifika rezultadu di’ak, maski forsas armadas mós foin ita harii no hanesan mós forsa foun. Maibé, ita bele kompete ona ho forsa ida ne’ebé mak harii ona tinan barak nia laran,” Capitão de Mar e Guerra, João da Silva informa liuhosi konferénsia imprénsa iha Kuartél Jenerál Fatuhada-Díli, Segunda (27/11/2023).

Kompetisaun tiru ida-ne’e ho modalidade oioin no distánsia tiru nian hahú hosi metru 50, metru 100, no to’o metru 300, halo tiru ho movimentu.  Ezemplu, iha alvu ne’e mak halo movimentu, depois maka sira tiru.

“Entaun, iha modalidade sira ne’e mak sira kualifika tiru iha área sira ne’e. Objetivu atu reforsa tán konfiansa entre forsa rua no reforsa kooperasaun ne’e ho di’ak iha ámbitu kooperasaun militár, nomós troka esperiénsia iha forsa rua ne’e,” nia tenik.

Hatán kona-bá partisipasaun feto militár timoroan menus iha kompetisaun sira ne’e, Capitão de Mar e Guerra João da Silva dehan, sira ne’ebé partisipa kompetisaun ne’e la’ós iha rai-laran de’it, maibé dala-ruma hosi páis barak.

Tanba ida ne’e maka, komandu F-FDTL presiza duni halo preparasaun ida di’ak liuhosi prosesu selesaun iha nível forsa armadas.

Hosi ne’ebá mak sei haree ida ne’ebé mak kualifikadu, ida ne’ebé mak di’ak, hafoin komandu haruka atu bele partisipa iha kompetisaun sira hanesan ne’e.

“La signifika, la involve feto sira maibé, ida-ne’e iha forsa armadas ne’e, liu-liu haree bá ita nia kualifikasaun iha áreas hotu-hotu,” nia hateten.

Jornalista: Rogério Pereira Cárceres