Hatutan.com, (04 Dezembru 2023), Díli-Komandante Task Force Munisípiu Ermera, Primeiru Sarjentu Almerio Salsinha, hetan kanek gráve iha parte ulun, tanba tuda ho fatuk hosi grupu deskoñesidu sira iha área Suku Fatukquero, Postu Administrativu Ermera Vila.

Lee Mós: Konfrontu iha Lourba, Na’in-Hitu Kanek no Sunu Uma Haat

Komandante Jerál PNTL, Komisáriu Polísia Henrique da Costa. Foto/Elio dos Santos da Costa.

Komandante Jerál Polísia Nasionál Timor-Leste (PNTL), Komisáriu Henrique da Costa, informa, iha Sábadu (02/12/2023), nia membru ne’e hetan duni konvite hosi família balu ne’ebé konvida  hodi bá partisipa iha seremónia agredesimentu nian ida bá sira ninian oan ne’ebé mak foin graduasaun ka remata estudu nivel universidade iha área Fatuquero.

Bainhira seremónia ne’e remata, membru ne’e atu fila ona bá nia uma, maibé iha dalan, mosu grupu rua asalta malu. Nune’e, membru PNTL ne’e halo kedas atuasaun no tenta hodi hapara, maibe  ema hirak ne’e fikla ataka fali nia.

“Tuda nia kanek gráve, depois informa mai komandu hodi komandante munisípiu ho ekipa sira bá ajuda, no evakua kedas ita-nia membru ne’e mai iha Ospitál Nasionál Guido Valadáres (HNGV),” Komisáriu Jerál Polísia Henrique da Costa, informa bá jornalista sira, hafoin partisipa iha seremináriu internasionál kona-bá dezastre nian iha Suai Room, Timor Plaza, Díli, Segunda (04/11/2023).

Hafoin evakua membru Polísia ne’e fila, iha kalan ne’e kedas, komandu PNTL Munisípiu Ermera halo operasaun hodi buka tuir autór sira, no iha Domingu (03/12/2023), konsege kaptura suspeitu  sira hamutuk na’in-10 resin, tanba deskonfia envolve direta iha kazu ne’e.

Bá suspeitu sira ne’ebé sei subar aan hosi polísia husu atu kolabora ho polísia tanba  ekipa investigasaun kriminál identifika hotu ona.  Nune’e, komandu PNTL sei hato’o pedidu bá Ministériu Públiku (MP) hodi husu mandadu kapturasaun no detensaun.

“Ema na’in-10-resin mak ita bolu ona, sira ne’e agora dadauk iha hela komandu Munisípiu Ermera, no hanesan ohin ha’u hatete, sei falta autór ida mak ita identifika, maibé, nia halai sees hosi fatin,” Henrique da Costa hateten.

Membru PNTL ne’ebé hetan kanek gráve dadaun ne’e médiku sira halo hela tratamentu bá nia kondisaun saúde iha  iha Sala ICU-HNGV. PNTL mós deskonfia ona katak, kazu konfrontu ne’e envolve hosi membru sira iha grupu arte rituál (GAR) na’in-rua.   

Jornalista: Rogério Pereira Cárceres