Hatutan.com, (27 Novembru 2023), Díli—Prezidente Repúblika (PR) Guiné Bissau, General Umaro Sissoco Embalo hateten, Guiné Bissau ho Timor-Leste hanesan país amigu ne’ebé sei kontinua hametin kooperasaunbilaterál ihakonjuntura polítikainternasionálne’ebé sei konsentra iha organizasaun Comunidade dos Países de Língua Portuguesa (CPLP), no iha Organizasaun Nasaoens Unidas (ONU).

Prezidente Repúblika (PR) Guiné Bissau, General Umaro Sissoco Embalo ho Prezidente Repúblika Timor Leste, José Ramos-Horta. Foto: Elio dos Santos da Costa.

“Guiné Bissau ho povu Timor-Leste hanesan povu maun-alin ne’ebé halo luta hanesan bá ida-idak nia independénsia, no ohin loron hanesan país ne’ebé livre no independente,” General Umaro Sissoco Embalo hateten hafoin hasoru-malu ho Prezidente Repúblika (PR), José Ramos-Horta, iha Palásiu Prezidensiál Nicolau Lobato Bairru-Pité, Segunda (27/11/2023).

Lee Mós: Lere-Falur Reprezenta Estadu TL Partisipa Selebrasaun Independénsia Guiné-Bissau bá Dala-50

Guiné Bissau ho Timor-Leste kontinua iha relasaun di’ak iha polítika diplomátika, konserta ba Estadu ne’ebé iha forum sira konsertasaun hamutuk iha CPLP no iha organizasaun Nasaoens Unidas.

“Guiné Bissau no Timor-Leste mostra faktu sira bá prosimidade entre país rua no ko’alia bá situasaun oin-oin liga ho konjuntura internasionál hanesan hotu-hotu hatene problema iha Gaza, no situasaun entre Ukránia no Rúsia ne’ebé afeita ba situasaun mundiál,” Prezidente Guiné Bissau, General Umaro Sissoco Embalo hateten.

Xefe Estadu Guiné Bissau hatutan, Prezidente Repúblika Timor-Leste hanesan Pessoa Premiadu Nobel da Pás, preokupa liu no preokupa barak tebes ba pás iha mundu, tanba ne’e hanoin katak país rua bele iha konjuntura polítika internasionál ida di’ak bá pás iha mundu.

Iha enkontru ne’e Xefe Estadu rua ko’alia mós kona-bá oportunidade bá abertura embaixada Timor-Leste iha Guiné Bissau no ko’alia mós assuntu oin-oin kona-bá situasaun internasionál liu-liu kona-bá CPLP.

Prezidente Repúblika (PR) Guiné Bissau, General Umaro Sissoco Embalo. Foto: Elio dos Santos da Costa.

“Ha’u iha ne’e mós atu partisipa iha loron proklamasaun unilaterál independência Timor-Leste nian no Guiné Bissau foin komemora ami nia independência ba dala-50 no Timor-Leste reprezenta hosi Xefe Estadu Maior Jenerál F-FDTL Tenente-Jeneral Domingos Raul Falur Rate Laek no Líder nasionál Lere Anan Timur,” nia informa.

Prezidente Repúblika, José Rarnos-Horta hateten, Xefe Estadu Guiné Bissau hetan konvite atu mai iha Timor-Leste no ida-ne’e hanesan nia vizita bá dahuluk iha país ne’e.

Prezidente Repúblika Guiné Bissau hanesan ema dahuluk ne’ebé rekoñese proklamasaun unilaterál independência Timor-Leste nian iha 1975.

“Bainhira kestaun sira kona-bá Timor-Leste to’o iha assembleia Jerál Nasoens Unidas nian iha Konsellu Seguransa emisaun permanente Guiné Bissau nian sempre apoia Timor-Leste,” Ramos-Horta hateten.

Xefe Estadu konsidera Guiné Bissau hanesan país ida ne’ebé espesiál tebes bá istória Timor-Leste nian, tanba ne’e sai hanesan onra bo’ot ida hodi simu Xefe Estadu Guiné Bissau ka kualkér personalidade govermentál hosi Guiné Bissau ka personalidade privadu sira Guiné Bissau nian ne’ebé mai vizita país ida-ne’e.

Jornalista: Vito Salvadór