Hatutan.com, (28 Novembru 2023), Díli—Prezidente Repúblika (PR), José Ramos-Horta kondekora Prezidente Repúblika, Guiné-Bissau, General Umaro Sissoco Embalo ho medalla grande Colar Ordem de Timor-Leste (TL).

Ramos-Horta kondekora Eis Prezidente Parlamentu Nasionál no atual Deputadu bankada CNRT, Arão Noé de Jesus Amaral, Ministru Prezidénsia Konsellu Ministru, Agio Pereira, Deputadu Bankada FRETELIN David Dias Ximenes Mandati no Vise-Primeiru Ministru, Mariano Assanami Sabino ho Medalla grande Colar Ordem de Timor-Leste. Foto: Elio dos Santos da Costa.

Ramos-Horta agradese bá prezensa hosi altu dignitáriu internasionál ida iha komemorasaun loron proklamasaun unilaterál independénsia Timor-Leste nian bá dala-XLVIII.

Lee Mós: TL-Guiné Bissau Nu’udár Maun-Alin Dezde Tempu Funu

“Ha’u aproveita oportunidade atu estende votu no felisitasaun ne’ebé sinseru bá povu nobre Guiné Bissau ba Komemorasaun ba 50º Aniversáriu Independénsia Nasional Guiné-Bissau nian, ne’ebé selebra iha loron 24 Setembru 2023. Ha’u hanoin ho respeitu ba proklamasaun unilateral ba feitu históriku ida ne’e no aprovasaun ba Konstituisaun Repúblika nian ne’ebé primeiru desizaun deliberada hosi Assembleia Nacional Popular, ne’ebé halibur iha Matas de Madina de Boé,” Ramos-Horta hateten iha diskursu ne’ebé hala’o iha Palásiu Prezidensiál Nicolau Lobato Bairru-Pité, Tersa (28/11/2023).

Selebrasaun sira ne’e la’ós de’it omenajen ba Aman Fundadór Nasional Guiné-Bissau nian, inklui Líder Saudozu ba Luta Armada, Señor Amílcar Cabral, maibé mós destaka prosesu libertadór ne’ebé inspira Proklamasaun Independénsia Nasional Timor-Leste nian iha loron 28 Novembru 1975.

Iha okaziaun ne’e mós Ramos-Horta kondekora Eis Prezidente Parlamentu Nasionál no atual Deputadu bankada CNRT, Arão Noé de Jesus Amaral, Ministru Prezidénsia Konsellu Ministru, Agio Pereira, Deputadu Bankada FRETELIN David Dias Ximenes Mandati no Vise-Primeiru Ministru, Mariano Assanami Sabino ho Medalla grande Colar Ordem de Timor-Leste.

Jornalista: Vito Salvadór