Hatutan.com, (30 Novembru 2023), Díli—Sosiedade Sivíl liu hosi Forum Organizasaun Naun Governamentál Timor Leste (FONGTIL) la konkorda ho legalizasaun prostituisaun tanba sei lori ema monu bá nakukun liu hosi Servisu Sex Komersiál iha Timor-Leste (TL).

Diretór Ezekutivu FONGTIL, Valentim da Costa.

Tanba ne’e sosiedade husu de’it atu Governu no parte relevante sira haforsa de’it iha edukasaun ka konsiensializaun públiku nune’e elimina risku moras HIVE/SIDA.

Lee Mós: Servisu Sex Komersiál Eziste, INKSIDA Esforsu Legaliza no Lokaliza

“Ami la konkorda ho ida-ne’e. Iha fatin balun ami kontinua esplika katak, la konkorda atu legaliza prostituisaun ka sex livre iha ita nia rain. Tanba iha faktores barak ne’ebé implika valores kulturais no iha tempu naruk bele afeta bá dekadénsia morál sei akontese,” Diretór Ezekutivu FONGTIL, Valentim da Costa hateten iha serbisu fatin Caicoli, Kuarta (29/11/2023).

Diretór FONGTIL husu ema hotu-hotu akompaña nafatin kona-bá kapaña atu hamenus  moras HIV/SIDA ne’ebé mak akontese dadaun, nune’e ema ida-idak konsiente eduka nia an hodi labele tama iha prátika bá faktus ne’ebé mak fó risku ba sira nia an no nia familia.

FONGTIL rekomenda bebeik ona bá Governu atu tenke hanoin ona tanba ne’e problema sosiais atu bele rezolve assaun ida-ne’e, liu hosi kriasaun kampu traballu hanesan dalan ida ne’ebé di’ak liu, nune’e joven sira tenki halo buat ruma no iha rendimentu ruma atu evita ema  foti dalan ne’ebé mak la loos ka nakukun ninian hodi tama iha vida servisu sex komersiál.

“Ita Iha tempu barak ona, akontese no la’ós foin mosu. Dezde tempu Indonézia nian atu halo legalizasaun ba servisu sex komersiál ne’e rasik, maibé hosi Igreja, sosiedade sivíl no entidade sira firme katak, la aseita atu komersializa servisu sex livre iha ita nia rain,” nia hateten.

Jornalista Estajiáriu: Lazaro Pereira Quefi