Hatutan.com, (29 Novembru 2023), Díli—Membru Polísia Repúblika Indonézia hosi Malaka, Nusa Tenggara Timur (NTT) ho naran Ipda Albertus Fridus Bere simu kondekorasaun ho medalla méritu hosi Prezidente Repúblika Demokrátika Timor Leste, José Ramos-Horta.
Membru Polísia Repúblika Indonézia hosi Malaka, Nusa Tenggara Timur (NTT) ho naran Ipda Albertus Fridus Bere simu kondekorasaun ho medalla méritu hosi Prezidente Repúblika Demokrátika Timor Leste, José Ramos-Horta. Serimónia atribuisaun ne’ebé hala’o iha Palásiu Nobre Lahane, Díli, Segunda (27/11/2023). Foto: KBRI.
Tuir Komunikadu ne’ebé Hatutan.com asessu hosi Embaixada Indonézia iha Díli hateten katak, Ipda Fridus Bere hetan medalla méritu ne’e tanba ninia asaun sira kona-bá umanidade.
Lee Mós: Kondekorasaun bá Veteranu no Estranjeiru Iha Manatuto, Governadór NTT Konsidera Hanesan Prémiu
Kondekorasaun ne’e entrega direta hosi Ramos-Horta iha serimónia atribuisaun ne’ebé hala’o iha Palásiu Nobre Lahane, Díli, Segunda (27/11/2023).
“Kondekorasaun ne’e nu’udár rezultadu hosi apoiu no servisu hamutuk ne’ebé di’ak hosi entidade hotu-hotu, inklui Kapolri, Kapolda, Kapolres Malaka nune’e mós povu Malaka tomak,” Hatutan.com sita deklarasaun Ipda Albertus Fridus Bere iha komunikadu ne’e.
Kondekorasaun ne’e oferese hanesan apresaiasaun ida bá dedikasaun no presatasaun hosi Ipda Fridus Bere ne’ebé ajuda ona hodi salva Timoroan ida iha tinan ida liu bá.
Tanba ne’e, Parte Superiór Polri iha Embaixada Indonézia nian iha Díli, Komissáriu Polisia Don Da Costa konsidera, Ipda Fridus simu kondekorasaun ne’e tanba ninia asaun umaninade ne’ebé estraordinária.
Prezidente Timor Leste, José Manuel Ramos-Horta oferse kondekorasaun ne’e hafoin simu informasaun hodi parte Superiór Polri Embaixada Indonézia nian iha Díli ligadu ho assaun umanidade hosi Ipda Fridus Bere ba Timoroan ida iha tinan ida liu bá.
Ida-ne’e mak sai baze no razaun hodi oferese kondekorasaun espesiál ne’e bá Ipda Fridus Bere bá ninia dedikasaun durante hala’o ninia mandatu hanesan polísia iha fronteira ho espertu maibé nakonu ho umanizmu.
“Agradese bá Maromak no obrigadu bá Polri ne’ebé fó ona fiar atu bele delega ha’u mai hala’o knaar iha iha fronteira Timor Leste,” Hatutan.com sita tán liafuan agradese hosi Ipda Fridus Bere.
Jornalista Estajiária: Zita Menezes