Hatutan.com, (30 Novembru 2023), Ermera—Autoridade lokál sira iha Postu Administrativu Letefoho, Munisipiu Ermera, fó apoiu totál bá Xefe Estadu José Ramos-Horta ne’ebé deklara ona atu veta projetu Dekretu-Lei kona-bá subsídiu transporte no saúde bá deputadu sira iha Parlamentu Nasionál (PN).

Xefe Suku Katrai-Kraik, Carlos da Conceição Soares dehan, deputadu sira kada fulan simu saláriu ho montante boot, maibé tanba saida mak sira hakarak aprova tán subsídiu bá transporte ho saúde nian.

Lee Mós: Prezidente Repúblika Sei Veta Subsídiu Transporte-Saúde bá Deputadu Sira

“Di’ak liu tau osan bá dezenvolvimentu, liu-liu bá iha ministériu importante sira. Ami hanesan lideransa komunitáriu apoia totál Prezidente Repúblika ne’ebé deklara ona atu veta tiha subsísiu ne’e. Ami povu  apoia tebes,” Carlos da Conceição Soares hateten bá Hatutan.com iha kna’ar fatin sede Suku Katrai-Kraik, Postu Administrativu Letefoho, Munisipiu Ermera, Kinta (30/11/2023).

Autoridade komunitáriu iha Katrai-Kraik ne’e dehan, maske seidauk haree ho matan, maibé liuhosi publikasaun média sira, membru Parlamentu Nasionál halo tiha aprovasaun bá projetu Dekretu-Lei ida kona-bá subsídu transporte no saúde nian bá deputadu sira.

Tuir nia, durante ukun-na’in sira aprova orsamentu oioin bá iha membru Governu no membru Parlamentu sira, osan oioin de’it hanesan osan bá transporte, osan bá tartamentu saúde nian, osan sira bá viájen nian, no iha buat lubuk ida mak sira aprova bá sira-ninian aan rasik.

Tuir loloos, Governu tenke hanoin lideransa komunitária sira hanesan Xefe suku sira ho Xefe aldeia sira iha baze, tanba sira mak besik liu povu no hatene liu problema povu nian.

Foin lalais mós Xefe suku sira rona hosi Ministru Administrasaun Estatál (MAE) rasik, hateten liuhosi média katak, sira nian mak hetan osan insentivu de’it.

“Ami nia insentivu nafatin ho xefe suku sira ho $250. Xefe aldeia sira $150, delegadu no delegada ho membru konsellu seluk ho de’it osan ida la’ós insentivu, mais sira hetan orsamentu ida ne’ebé fundu bá bolu naran seña de prezensa. Ne’e $40 pur-més. Ho ida-ne’e, ami lamenta tebtebes,” Xefe Suku re-eleitu ne’e lamenta.

Carlos da Conceição hatutan, xefe suku sira mak sai hanesan liman-ain Governu sentrál nian iha baze. Sira mak sai baze bá iha dezenvolvimentu, baze bá iha atividade hothotu, Ministériu ne’ebé de’it mak atu hala’o programa, nune’e mós ho ajénsia hosi ne’ebé de’it presiza duni sira iha baze.

“Maibé, ami nia direitu ne’e mak ami la satisfás, tanba ami hetan, la’ós saláriu, insentivu ida ne’ebé Governu insentiva bá ami ne’e ki’ik liu,” nia lamenta.

Nia husu bá PN atu aprova osan barak liu bá iha Ministériu Agrikultura, Ministériu Edukasaun, Saúde no aloka bá infra-estrutura bázika sira, tanba importante bá povu.

Nia mós relata katak, problema povu nian iha baze barak tebtebes, hanesan menus ai-han, bee-moos laiha, no menus bá produtu hothotu liuliu estrada aat hosi tinan ba tinan.

Xefe Suku Lauana, Miguel Gomes Maia. Foto: ROgerio Pereira Carceres.

Iha fatin hanesan, Xefe Suku Lauana, Miguel Gomes Maia sente la satisfas ho desizaun membru PN ne’ebé hakarak aprova tán osan hodi fó benefísiu de’it bá sira-nian an.

Reprezentante komunidade Suku Lauana ne’e sente la-satisfás, tanba deputadu sira seidauk hatene kondisaun moris povu kiak no mukit sira iha aldeia rurál. Tanba ne’e, sira halo ona aprovasaun bá projetu lei ne’e, ida-ne’e fó benefísiu de’it bá sira nia an.

“Ami xefe suku sira mak hatene di’ak kona-bá ema ne’e ki’ak, uma aat ne’e hanesan oinsá, fasilidade sira seidauk asesu bá povu ne’e hanesan ne’ebé, ami mak hatene klaru. Aprovasaun orsamentu ne’ebé mak bá ne’e, fó benefísiu liu bá sira iha ne’ebá,” nia dehan.

Tuir nian, kada fulan mak membru Parlamentu sira simu saláriu ho montante rihun $1 mai kraik, sira bele hetan tán subsídiu rua ne’e. Maibé, sé sira simu rihun $3 to’o rihun $6 bá leten no sira hetan tán subsídiu ida ne’e, konta bá mai, povu ne’e aat bá bebeik.

“Ida ne’e mak ami mós la simu. Nusá, la aumenta bá xefe suku sira, xefe aldeia sira, tanba ema ne’ebé mak hatene liu povu, duke hanesan Parlamentu sira deside iha ne’ebá. Ne’e veta duni. Tenke veta. Kuandu la veta, fó di’ak bá de’it Parlamentu, hatais di’ak, gravatadu, tuur iha AC laran, mais, povu ne’ebé mak habai loron, habai nafatin,” nia tenik.

Xefe Suku Miguel Gomes dehan, iha tempu kampaña eleitóral, lider Partidu Polítiku sira tun bá ko’alia mesak furak de’it, maibé bainhira iha ona osan, povu rona de’it nia montante, ukun-na’in sira mak uza hotu.

“Laiha benefísiu bá ida ne’e. Ida ne’e mak ami husu atu Prezidente Repúblika tenke veta duni,” nia apoia desizaun PR.

Foin lalais ne’e liuhosi diskusaun jeneralidade iha plenária PN, aprova tiha Projetu Dekretu-Lei ne’e ho votus a-favór 50, kontra 1, no abstensaun 6.

Benefísiu hosi Projetu Dekretu-Lei ne’e maka kada fulan deputadu ida sei simu subsídiu bá transporte ho valór $1.600, no subsídiu bá saúde $600 kada fulan.

Iha mandatu tinan-lima, PN sei gasta osan tokon $8-resin bá subsídiu transporte no saúde nian bá deputadu na’in-65.

Jornalista: Rogério Pereira Cárceres