Hatutan.com, (05 Dezembru 2023), Baucau—Xefe Estadu Maior Jenerál FALINTIL Forsa Defeza Timor-Leste (F-FDTL), Tenente Jenerál, Domingos Raúl “Falur Rate Laek” fó ópsaun no alerta ikus bá membru sira atu hili bá serbí iha Grupu Arte Marsiál (GAM) no Grupu Arte Rituál (GAR), ou hakarak kontinua iha militár hodi serbí de’it Estadu ho instituisaun Defeza.

Xefe Estadu Maiór FALINTIL Forsa Defeza Timor-Leste (F-FDTL), Tenente Jenerál Domingos Raúl ‘Falur Rate Laek’.

Komandante Falur alerta ida-ne’e durante diskursu serimónia komemorasaun aniversáriu ezisténsia Komponente Terrestre nian bá dala-XXI, iha kampu aviasaun baze komponente Terrestre, Lanud-Baucau, Tersa (05/12/2023).

Lee Mós: Opsaun Rua bá Membru F-FDTL 500-resin Ne’ebé Identifikadu Involve GAM-GAR  

Tenente Jenerál F-FDTL ne’e aproveita oportunidade hodi apela bá militar hotu-hotu atu halo tuir valór FALINTIL nian, tenke serbi ho lealdade bá Estadu no Instituisaun, la’ós bá organizasaun arte marsiál no arte rituál sira.

Instituisaun ida-ne’e hanesan F-FDTL no ninia militár sira tenke hatene sira-nia responsabilidade atu serbi sira-nia nasaun ho forma apartidáriu ka labele inklina aan iha partidu polítiku ruma, maibé, tenke hala’o de’it kna’ar ho imparsiál.

“Ita-boot sira to’o ona momentu sertu atu deside ita-boot sira nia an. Hili rua de’it. Hakarak hela iha instituisaun, konvida imi nia lider sira arte marsiais, arte rituais sira tuur iha oin, entrega sira nia atributu. Sé imi hakarak hili sira, entaun prepara farda bá entrega iha instituisaun F-FDTL. Imi rona ka lae!,” Falur Rate Laek, alerta ho lian makaas.

Komandante Falur informa katak, iha loron 07 fulan-dezembru tinan ne’e sei iha serimónia juramentu ida bá membru sira hotu ne’ebé komandu F-FFDTL identifika ona no rejistadu atu deklara ho loloos, hodi jura bá Bandeira lulik RDTL no serbí de’it Estadu ho instituisaun ida-ne’e.

Sira ne’ebé iha Komponente Terrestre sei halo juramentu iha sira ninia baze komponente Terrestre nian. Komponente Navál, sei halo iha komponente navál. Unidade Apoiu Servisu (UAS) ho Formasaun no Treinu, sei halo iha Sentru Instrusaun no Treinu, Komandanre Nicolau Lobato, iha Metinaro. Bá sira ne’ebé iha Kuartel jenerál, unidade Polísia Militár, Unidade Espesiais, sira sei halo iha Palásiu Governu, hamutuk ho membru PNTL sira.

“Loron ida tán ita atu halo serimónia ida kona-bá deklarasaun de kompromísu. Husu bá militár sira hothotu, ofisiais, sarjentus, no prasas, sira ne’ebé envolve iha arte marsiais, arte rituais, ita-boot sira maka, ho tempu ona, to’o ona hola desizaun,” Falur dehan.

Kona-bá Aniversáriu Komponente Terrestre bá dala-XXI

Serimónia aniversáriu ezisténsia Komponente Navál nian bá dala-XXI, iha kampu aviasaun baze komponente Terrestre, Lanud-Baucau, Tersa (05/12/2023). Foto: Rogério Pereira Cárceres.

Tenente Jenerál Falur konsidera, asaun sira hosi Komponente Terrestre ne’e fundamentál tebes bá afirmasaun soberania, bá konstrusaun sosiedade ida ne’ebé seguru no estável, ne’ebé kontribui bá dezenvolvimentu nasaun nian.

“Imi ida-idak, hosi komandante to’o soldadus, iha responsábilidade boot atu hari’i no mantein konfiansa ne’ebé ita-nia povu iha ita nia forsa armada sira. Ho serbisu maka’as, dedikasaun no dixiplina, sei bele posível hari’i Komponente Terrestre no Forsa Defeza ne’ebé forte no prontu atu asume sira-nia responsábilidade no misaun konstitusionál importante sira,” Falur Rate Laek, fó-hanoin.

Tropa Forsa Terrestre nian, ne’ebé prontu permanente, nu’udár garantia nesesáriu bá defeza nasaun nian. Nasaun ida-ne’ebé iha vokasaun pasífika no demokrátiku, ne’ebé valór diálogu, justisa, respeitu bá direitus amamus ne’ebé konsolida ona nia aan nu’udár sosiedade ida-ne’ebé prósperu no fraternal, ne’ebé buka oportunidade hanesan bá ema hotu.

Komandante Falur dehan, sosiedade Timor-Leste iha konfiansa tomak bá membru Forsa Terrestre nia efisiensia. Valór hirak-ne’ebé hanesan patriótizmu, profisionalizmu no dedikasan. Husu membru sira iha komponente ne’e, atu halo instituisaun ida-ne’e sai nu’udár fonte orgullu permanente bá nasaun.

“Nu’udár Xefe Estadu-Maior-Jeneral F-FDTL nian, ha’u-to omenajen ida- ne’ebe justa no sinsera ba mane no feto sira ne’ebé hola parte iha Komponente Terrestre. Serbisu maka’as no la iha hanoin ba aan rasik, ita nia militar sira hala’o misaun nobre hodi kontribui ba dezenvolvimentu nasam nian no asegura defeza soberania nasional,” Falur Rate Laek hateten.

Jornalista: Rogério Pereira Cárceres