Hatutan.com (5 Dezembru 2023), Lautém—Sentru Saúde iha Postu Administrativu Iliomar, Munisípiu Lautém presiza tebes rekursu umanu hodi bele funsiona ho di’ak.

Xefe Sentru Saúde Iliomar, Aniceto Amaral. Foto: Lazaro Pereira Quefi.

Xefe Sentru Saúde Iliomar, Aniceto Amaral haktuir kona-bá kondisaun reál iha Sentru Saúde ne’e katak, rekursu umanu limitadu tebes tanba funsionáriu ka pessoál saúde sira kuaze internatu ka kontratadu iha tinan 2021 no termina iha 31 Dezembru 2023.

Lee Mós: Sentru Saúde Quelicai Enfrenta Problema Barak-liu

Aniceto Amaral espera katak Ministériu Saúde sei estende kontratadu sira nune’e bele apoia servisu iha sentru saúde ne’e.

“Maski sira ne’e internatu hela maibé sira bele atende inan isin-rua, ema partus, pasiente moras sira no seluk tán. Ami iha ne’e ema menus tebes no espera sira nia kontratu ne’e estende,” Aniceto Amaral hateten bá Hatutan.com iha servisu fatin aldeia Arara, Suku Iliomar Primeiru, Postu Administrativu Iliomar, Munisipiu Lautém, Tersa (05/12/2023).

Sentru Saúde iha Postu Administrativu Iliomar, Munisípiu Lautém. Foto: Lazaro Pereira Quefi.

Diretór ne’e dehan, infermeiru sufisiente hela tanba sira ema na’in-lima maibé postu saúde hotu-hotu iha iliomar rasik laiha, nune’e bá fali médiku iha sentru saúde iha na’in-tolu de’it, no postu sira médiku laiha. Analista laboratóriu ema na’in-ida, farmasista iha na’in-rua no pesoál ambulánsia na’in-ida ho motorista na’in-ida.

“Ami atu halo oráriu servisu lorloron ne’e difísil. Tuir loloos servisu ne’e iha off ka folga maibé tanba la iha médiku entaun tenki kontinua tanba programa barak henesan SISKA, movel klinika no mós sira seluk,” nia hateten.

Sentru saúde ne’e mós enfrenta problema kona-bá bee moos, inklui postu saúde sira hitu, tanba ne’e iha sentru saúde uza mekanizmu hodi tau hela tanki ka profile ida hodi enxe bee moos atu bele utiliza atu atende nesesidade pasiente sira durante loron rua to’o tolu.

Seluk fali maka, ambulánsia foin dadaun avaria duni no kestaun ne’e  informa ona bá  Diretór Servisu Saúde Munisipiu nian.

Jornalista Hatutan.com Lazaro Pereira Quefi hala’o entrevista ho Xefe Sentru Saúde Iliomar, Aniceto Amaral iha servisu fatin aldeia Arara, Suku Iliomar Primeiru, Postu Administrativu Iliomar, Munisipiu Lautém, Tersa (05/12/2023).

Kondisaun edifisiu liuliu maternidade ne’e aat hela tanba instalasaun eletrisidade mos la di’ak no to’o ohin loron seidauk hadi’a.

Ida seluk maka, sala observasaun bá pasiente mós laiha, nune’e tau hamutuk de’it ho sala konsultasaun jerál nian.

Tanba ne’e rekomenda bá Governu liuliu parte relevante sira atu halo netik sala observasaun nian hodi bele utiliza tuir kbiit.

Funsionáriu permanente iha sentru saúde Iliomar hamutuk na’in 13, kompostu hosi tékniku 1, infermeiru 6, farmasista 3, médiku 3 no funsionariu internatu hamutuk na’in 13 iha saude publiku 5, parteira 4, nutrisaun 1, malaria 1, infermeiru kontratadu 1, infermeiru internatu 2, ba Pessoál hirak ne’e balun koloka iha postu saude sira no balun iha sentru saúde. Sentru Saude iha Iliomar iha 1 no postu saude hamutuk 5.

Jornalista Estajiáriu: Lazaro Pereira Quefi