Hatutan.com, (06 Dezembru 2023), Díli—Embaixada Korea Súl iha Timor-Leste (TL) oferese ekipamentu informátika hamutuk 90 bá Sekretária Estadu Formasaun Profisionál no Empregu (SEFOPE), hodi fasilita joven Timor oan sira ne’ebé oras ne’e daudaun partisipa hela iha kursu Lian Korea nian.

Embaixada Korea Súl iha Timor-Leste (TL) oferese ekipamentu informátika hamutuk 90 bá Sekretária Estadu Formasaun Profisionál no Empregu (SEFOPE), hodi fasilita joven Timor oan sira ne’ebé oras ne’e daudaun partisipa hela iha kursu Lian Korea nian, Kuarta (06/12/2023). Foto: Leopoldina de Carvalho.

Ekipamentu informátika ne’ebé oferese hosi embaixada Korea Súl ne’e kompostu hosi Laptop ho marka Acer 50, projetór marka HP hamutuk 20 no Screen hamutuk 20.

Lee Mós: Governu TL Ho Korea Súl Investe Millaun $8 Iha Projetu YEES

Embaixadór Korea Súl iha Timor Leste, Jinum Hong hateten, apoiu ida-ne’e importante ne’ebé nia rasik  promete ona dezde fulan hirak liu bá tanba haree mós bá esforsu Timor Leste nian hodi adere bá Assosiation South East Asean Nation (ASEAN) no OMK.

“TL iha hela preparasaun atu adere bá ASEAN no iha Fevereiru tinan oin atu tama OMK. Nune’e, espera ho apoiu hirak ne’e bele ajuda SEFOPE nia servisu hodi prepara rekursu umanu ne’ebé di’ak,” Jinum Hong hateten iha serimónia asina Nota Entendimentu ho SEFOPE, iha sala DNEE, Caicoli, Kuarta (06/12/2023).

Nune’e mós Sekretáriu Estadu Formasaun Profisionál Empregu (SEFOPE), Rogério Araújo Mendonça agradese bá Embaixadór Korea Súl tanba ho apoiu ida-ne’e bele ajuda tán SEFOPE nia servisu hodi harii Sentru Formasaun iha munisípiu sira.

Munisípiu ne’ebé identifikadu atu esbelese sentru formasaun Lian Korea mak hanesan Díli, Ermera, Lospalos, Suai, Bobonaro no RAEOA.

Jornalista: Leopoldina de Carvalho