Hatutan.com, (06 Dezembru 2023), Díli— Hahú hosi fulan Janeriu to’o Outubru 2023, Hospital Nasionál Guido Valadares (HNGV) lio hosi Departmentu Psikiatria rejista pasiente ho moras mentál 1.448, no kada loron rejista na’in-20 ne’ebé maioria mai hosi munisípiu Baucau, Viqueque, Covalima, Liquiça no Ermera.

Xefe Departamentu Psikiatria, Boaventura Jose A da Costa observa hela pasiente ho moras mentál iha Departmentu Psikiatria HNGV,Kuarta (06/12/23). Foto: Tomé da Silva.

Xefe Departamentu Psikiatria, Boaventura Jose A da Costa informa, kada loron bele rejista pasiente na’in-20 hahaú hosi Segunda to’o Sesta.

Lee Mós: Autoridade Lokál Ermera Ezije PN-Governu Regula Lia-Mate no Lia-Moris

“Kada fulan pasiente mai iha internamentu. Sira ne’ebé mai ne’e maiória ho kazu depresaun no halo sira tenta oho an,” Boaventura Jose A da Costa hateten bá Jornalista Hatutan.com iha knaar fatin HNGV, Kuarta (06/12/23).

Tuir dadus hosi Departmentu Psikiatria ne’e mós rejista katak, kauza hosi moras mentál ne’e tanba ema stres ho problema família, problema ekonomia inklui problema ho estudu.

“Durante ne’e pasiente ne’ebé ita simu maioria mai hosi munisípiu Baucau, Viqueque, Covalima, Liquiça no Ermera,” Boaventura Jose A da Costa

Xefe Departamentu Psikiatria, Boaventura Jose A da Costa. Foto: Tomé da Silva.

HNGV laiha dadus konkreta kona-bá pasiénte ne’ebé rekopera, maibé durante sira mai konsulta ne’e iha balun rekopera no fila-fali no mós balun mak la konsege rekopera hanesan pasiente ne’ebé mai ho kondisaun agresivu liu to’o fila de’it.

Tanba ne’e, buat ne’ebé presiza reforsa iha HNGV mak hanesan presiza tán atu aumenta rekursu umanu, tanba oras ne’e daudaun iha de’it médiku espesialista na’in-tolu, Timoroan na’in-rua no mós apoia hosi doutór Kubanu na’in-ida inklui infermeira jerál de’it.

Situasaun ne’e prezudika atendimentu tanba pasiente barak liu fali passoál saúde sira, nune’e rekomenda atu Governu oferese tán bolsu estudu bá Timor oan sira iha área espelidade Psikiatria nian.

Tuir dadus, pasiente Psikiatria OPD hanesan kategoria depresaun ne’ebé rejistadu hahú hosi fulan Janeriu to’o Outubru 2023 ho totál 1.448.

Alende ne’e, pasiente hosi internamentu baixa hahú fulan Janeiru to’o fulan Outubru 2023 ho totál 261, nune’e fulan Novembru no Dezembru seidauk iha dadus finál nomós pasiente sira ne’ebé mai halo tratamentu maioria idade produtivu hahú hosi idade 18 bá leten.

Jornalista Estajiária: Zita Menezes