Hatutan.com, (19 Dezembru 2023), Díli—Prezidente Repúblika (PR), José Ramos-Horta husu IX Governu Konstitusionál atu tau orsamentu bo’ot ba Hospitál Nasionál Guido Valadares (HNGV), hodi mellora liután servisu sira, liuliu atendimentu saúde bá komunidade iha ospitál ne’e.

Prezidente Repúblika (PR), José Ramos-Horta fahe parselas Natál ba pasiente vulnerável sira ne’ebé mai hosi Munisípiu no hala’o tratamentu iha Hospitál Nasionál Guido Valadares (HNGV), Segunda (19/12/2023). Foto: Elio dos Santos da Costa.

Prezidente Repúblika husu ne’e bainhira hala’o vizita hodi haree direta kondisaun no situasaun reál iha HNGV no mós fahe parsela Natál bá pasiente vulnerável sira.

Lee Mós: Pasiente Vulnerável Iha HNGV Simu Parsela Natál Hosi Prezidente Repúblika

“Uluk buat ne’ebé hetan krítika barak ne’ebé ha’u rasik mós sempre rona maka ekipamentu fase ran nian iha ne’ebé mákina la sufisiente, mákina balun la funsióna, bee laiha, tanba mákina ne’e rasik presiza bee moos maibé ohin ha’u haree mákina ne’e iha 14 ne’ebé funsióna hotu ho di’ak no ema lubuk ida ne’ebé fase ran bele fase ran ona,” Ramos-Horta hateten iha HNGV, Bidau, Tersa (19/12/2023).

Prezidente Repúblika dehan, la’ós Natál de’it mak nia mai vizita moras sira iha HNGV, maibé iha tinan sira nia laran ne’e, sempre mai beibeik.

Uluk liu iha Governu anteriór iha momentu moras dengue no Covid-19 ataka mundu Ramos-Horta pessoalmente oferese bee bá pasiente sira ho apoiu hosi empreza Gota no kada loron rua ka tolu sempre entrega bee ba ema moras sira.

Iha vizita ohin mai HNGV espesiál tanba hetan mós akompañamentu hosi Ministra Saúde hodi haree ema moras sira no hetan esplikasaun barak kona-bá situasaun iha HNGV.

Xefe Estadu konsidera seitór saúde nu’udár seitór importante tebtebes hanesan mós seitór edukasaun, ne’ebé importante ba rai ida-ne’e, ne’e duni Ministra Saúde matenek ho ideia, estudu hosi li’ur ho kualifikasaun akadémiku ne’ebé bo’ot, ho profisionalidade di’ak no iha nia lideransa, hein katak seitór saúde sei di’ak liu tán ba oin.

Ramos-Horta observa katak, kondisaun iha HNGV di’ak ona kompara ho tinan 10 bá kotuk, maibé Estadu no Governu tenke tau orsamentu bo’ot liu atu halo ospitál ne’ebé ho nível hanesan ospitál sira iha Bali no Singapura.

“Timor Leste hanesan nasaun indepedente no soberanu tinan 20 resin ona no atu tama ASEAN tenke iha ospitál modernu ho atendimentu ne’ebé kuliadade di’ak no aas,” nia hateten.

Kona-bá stock ai-moruk ka falta ai-moruk nia  sempre rona dala barak, tanba ne’e hein katak Ministra Saúde mak bele esplika kona-bá ida-ne’e.

Iha fatin hanesan, Ministra Saúde, Elia dos Reis Amaral hateten kona-bá stock ai-moruk antes ne’e aprezenta ona iha Parlamentu Nasionál katak, bainhira assume responsablidade hanesan Ministra Saúde ai-moruk ne’e stock out ona no stock out ne’e liu tiha estandarizasaun normál ne’ebé iha, entaun ho ida-ne’e mak IX Governu Konstituisionál la nonook no hamriik hodi propoin bá sosa ai-moruk ho karaktér urjente ne’ebé tau iha OR ho montante millaun $6 no koopera ho Tribunál das Kontas no Tribunál das Kontas fó apoiu ba ida-ne’e, tanba ne’e kestaun nasionál ne’ebé presiza apoiu urjente.

“Aimoruk ne’ebé empreza hatama ba primeira faze nian iha ona armajen no tékniku sira hosi Ministériu Saúde sei halo indentifikasaun molok distribui bá kada fasilidade saúde,” Ministra Saúde Elia dos Reis Amaral hateten.

Ministra Saúde hatutan, kona-bá atu hasa’e kualidade HNGV, Governu sei halo estudu viabilidade ne’ebé di’ak ho dezeñu ne’ebé iha no la’ós de’it atu harii bá tinan ida ka rua, maibé oinsa halo ospitál ne’e sai kualidade di’ak liu.

“Atu kualidade di’ak presiza iha planu adekuadu atu ba futuru ospitál ne’e bele sai kualidade duni,” nia subliña.

Kona-bá sala TBC ne’e manas, Ministériu Saúde rekoñese ida-ne’e tanba iha tempu naruk nia laran sala iha parte kotuk ba izolamentu ba moras TB nian ho pasiente internadu 20-resin no la’ós de’it ba TB maibé ba mós sira ne’ebé ho nutrisaun grave.

Ba oin Ministériu Saúde propoin atu hadi’a sala ne’e no iha mós planu atu harii ospitál ne’ebé kualidade di’ak maibé entermus ida-ne’e sei iha dezeñu no planu no estuda didi’ak atu haree sasán sira ne’e ho di’ak.

Jornalista: Vito Salvadór