Hatutan.com, (07 Dezembru 2023), Díli—Membru FALINTIL Forsa Defeza Timor-Leste (F-FDTL) na’in 833 no Polísia Nasionál Timor-Leste (PNTL) na’in-272, ofisialmente entrega atributu, deklara sai hosi Grupu Arte Marsiál (GAM) ho Grupu Arte Rituál (GAR) no jura atu serbí loos de’it Estadu RDTL, iha Palásiu Governu, Díli, Kinta (07/12/2023).

Membru FALINTIL Forsa Defeza Timor-Leste (F-FDTL) na’in 833 no Polísia Nasionál Timor-Leste (PNTL) na’in-272, ofisialmente entrega atributu, deklara sai hosi Grupu Arte Marsiál (GAM) ho Grupu Arte Rituál (GAR) no jura atu serbí loos de’it Estadu RDTL, iha Palásiu Governu, Díli, Kinta (07/12/2023).Foto: Elio dos Santos da Costa.

Serimónia juramentu ne’e, monu kedan iha loron 07 fulan-dezembru, ne’ebé sai hanesan loron istóriku no nakukun tebes bá povu Timor-Leste tomak, tanba militár Repúblika Indonézia nian ho naran Tentara Nasionál Indonézia (TNI) halo invazaun mai Timor-Leste.

Lee Mós: Falur Alerta Ikus bá Membru F-FDTL Ne’ebé Involve GAM-GAR

Deklarasaun kona-bá kompromísu bá ónra ne’ebé lee direta hosi Primeiru-Ministru (PM), Kay Rala Xanana Gusmão no membru instituisaun rua ne’e halo tuir;

“Ohin, loron hitu, fulan-dezembru, loron ne’ebé marka bá istória nu’udár loron invazaun. Tentara Nasionál Indonézia, hodi lori Bandeira merah-putih, mai oho Timoroan, liu rihun atus-rua, iha tinan rua-nulu resin-haat nia laran.

Tanba haree katak, artes marsiais oioin ne’ebé barak ona iha Timor-Leste, bá jura bá Bandeira merah-putih, hodi fila mai Timor, kria klima kriminalidade, oho-malu, estraga valóres família nian no valóres morais sarani nian.

Membru FALINTIL Forsa Defeza Timor-Leste (F-FDTL) na’in 833 no Polísia Nasionál Timor-Leste (PNTL) na’in-272, ofisialmente entrega atributu, deklara sai hosi Grupu Arte Marsiál (GAM) ho Grupu Arte Rituál (GAR) no jura atu serbí loos de’it Estadu RDTL, iha Palásiu Governu, Díli, Kinta (07/12/2023).Foto: Elio dos Santos da Costa.

No hodi mós haree katak, iha PNTL no F-FDTL rasik, hosi komandantes no ajentes, ami balun, tama iha artes marsiais, tuir juramentu bá Bandeira merah-putih, ne’ebé ami tenke hala’o, hodi halakon tiha ami nia konsiénsia no tau bá kotuk.

Ami nia kna’ar sagradu, atu defende pás no estabilidade, iha komunidade sira nia leet, no liu-liu, iha juventude nia leet, mak ami mai iha ne’e, hodi jura bá Maromak, bá rai lulik ida ne’e, bá erois no mártires sira, bá beiala sira, bá estadu RDTL, no bá povu Timor tomak, katak, ami hakotu, ho juramentu ida ne’e, lasus no relasaun hothotu, ho grupus artes marsiais, iha ne’ebé, ami ida-idak halo parte.

Nu’udár, ajentes bá PNTL no F-FDTL, ami kompromete aan, atu serbí de’it, rai lulik ida ne’e, hodi defende de’it, interreses povu timor-leste nian.

Ami jura atu partisipa, ho neon no laran tomak, bá estabilidade nasionál, no ami sei esforsa aan, atu konvense no lori jovens timoroan sira, ne’ebé pertense bá grupus artes marsiais oioin, atu husik kedas grupu sira ne’e, tanba hatudu ona katak, juramentu ne’ebé halo bá Bandeira merah-putih, halakon tiha kedas, konsiénsia nasionalista, no konsiénsia bá domin no dame, nu’udár valóres, husi kedas beiala sira, no nu’udár mós baze fundamentál bá dezenvolvimentu nasaun ne’e.

Membru FALINTIL Forsa Defeza Timor-Leste (F-FDTL) na’in 833 no Polísia Nasionál Timor-Leste (PNTL) na’in-272, ofisialmente entrega atributu, deklara sai hosi Grupu Arte Marsiál (GAM) ho Grupu Arte Rituál (GAR) no jura atu serbí loos de’it Estadu RDTL, iha Palásiu Governu, Díli, Kinta (07/12/2023).Foto: Elio dos Santos da Costa.

Ami mós kompromete aan, katak, karik ami, ida-idak, la hatudu iha prátika, kata kami husik ona grupu arte marsial ida-idak, no halo tuir halo tuir nafatin hahalok aat no foer, hosi artes marsais sira, ami ida-idak, prontu atu simu desizaun governu nian, atu sai hosi instituisoens rua estadu nian, PNTL ka F-FDTL.

Juramentu ida ne’e, ami halo, ho konsiénsia tomak, kona-bá nesesidade, atu harri sosiedade ida, ne’ebé bele respeita malu, ne’ebé bele hakuak malu, hodi kria ambiente, pás no estabilidade nian, iha ita nia rai doben timor-leste, nu’udár, kondisaun fundamentál, bá dezenvolvimentu nasionál, hahú hosi komunidade, iha aldeias no sukus, postus administrativus, to’o munisipius”.

Ikus liu Xanana hato’o mensajen katak, ho domin no konfiansa tomak katak saida mak idaidak temi ona iha ne’e, husu tenke hala’o hodi hamutuk serbí rai ida ne’e no povu ida ne’e.

Hafoin lee tiha deklarasaun sira kona-bá kompromísiu bá ónra nian, iha mós reprezentante membru PNTL na’in-rua, ida hosi Unidade Espesiál Polisia (UEP), entrega kedan ninia atributu GAM Kera Sakti, no ida seluk hosi Servisu Informasaun Polisia (SIP), entre atributu GAM Persaudaraan Setia Hati Terate (PSHT).

Serimónia juramentu ne’e akompaña hosi komandante jerál PNTL, Komisáriu jerál Polisia Henrique da Costa ho Xefe Estadu Maior Jenerál F-FDTL, Tenente Jenerál Domingos Raúl “Falur Rate Laek”, inklui ofisial superiór sira, nune’e mós ho membru IX Governu konstitusionál nian balun.

Jornalista: Rogério Pereira Cárceres