Hatutan.com, (22 Dezembru 2023), Díli—Prezidente Repúblika (PR), José Ramos-Horta promulga ona Orsamentu Jerál Estadu (OJE) ba tinan 2024 ho montante billaun $1,95.

Dollar Amerika. Foto/google

Xefe Estadu simu proposta ne’e iha loron 21 fulan Dezembru 2023 tuir dekretu Parlamentu Nasionál númeru 5/VI-OJE bá 2024.

Lee Mós: Redasaun Finál bá Proposta Lei OJE 2024, Mudansa Iha Rúbrika Tolu

“Hafoin promulgasaun, Prezidente Repúblika entrega kedan ba Prezidente Parlamentu Nasionál, Fernanda Lay,” Hatutan.com sita Komunikadu.

Iha Proposta OJE 2024 aprezeta hosi Governu da-IX ne’ebé lidera hosi Primeiru-Ministru Kay Rala Xanana Gusmão ba Parlamentu Nasionaál iha loron 12 fulan ne’e no hetan aprovosaun iha final global iha loron 20 fulan ne’e ho totál orsamentu billiaun $ 1,95.

Proposta OJE ne’ebe aprovadu ho totál konsolidadu millaun rihun US$ 1,95 ba Administrasaun Sentrál, RAEOA no Seguransa Sosiál, sein Fundu Rezerva Seguransa Sosiál.

Valór ida-ne’e inklui dotasaun millaun rihun US$ 1,83 ba Administrasaun Sentrál no millaun US$ 60 uza ba RAEOA.

Husi montante totál despeza ne’ebé prevee ba Administrasaun Sentrál no RAEOA, millaun US$ 468,8 uza ba saláriu no vensimentu, millaun US$ 386,3 ba bens no servisu, millaun US$ 589,7 ba transferénsias públikas, millaun US$ 34,2 ba kapitál menór no millaun US$ 411 ba kapitál dezenvolvimentu.

Orsamentu Seguransa Sosiál, inklui Fundu Rezerva Seguransa Sosiál, iha montante millaun US$ 347,6. Presiza nota katak, OJE tinan 2024 prevee ho valór millaun US$ 788,2 ba asuntu ekonómiku, millaun US$ 467,1 ba protesaun sosiál, millaun US$ 140,9 ba edukasaun, millaun US$ 66,2 ba saúde no millaun US$ 45,2 ba abitasaun no infraestruturas koletivas.

Jornalista: Vito Salvadór