Hatutan.com, (31 Dezembru 2023), Viqueque– Konsellu Pastoral Parókia Nossa Señora do Rosário de Fátima Uatolari Antigu, Dioseze Baucau, hamutuk ho Pároku Padre Heriberto Soares Pedro, SVD, hasai ona karta aberta bá sarani hotu ne’ebé pertense iha Estasaun Misionáriu Uatolari Antigu, kona-bá desizaun la iha selebrasaun misa kalan 31 Dezembru 2023 no misa tinan foun, 01 Janeiru 2024.     

Oda-matan Igreja Parokia Nossa Señora do Rosário de Fátima Uatolari, taka metin no la bele halo selebrasaun misa iha laran. Foto/Zita Menezes

Liuhosi karta aberta ho númeru referénsia 01/DB/PNSR-CPPU/1/2023 ne’ebé asina hosi Pároku Padre Heriberto Soares Pedro, SVD ho  Xefe Konsellu Pastoral, Flavio Joaquim, iha loron 28 fulan-Dezembru 2023, fó hatene abertamente bá sarani sira hotu iha Parókia Nossa Señora do Rosário de Fátima Uatolari, katak temporariamente sei la iha selebrasaun misa, la hetan sakramentu no atendimentu bá dokumentu sira bainhira problema konfrontu entre juventude ne’ebé akontese iha misa kalan 24 fulan-Dezembru 2023, seidauk rezolve.

“Liu hosi karta aberta ida-ne’e, hakarak deklara katak ha’u nu’udár padre pároku iha Parókia Nossa Señora do Rosário de Fátima Uatolari, katak  akontesimentu iha kalan 24 fulan-Dezembru 2023 entre grupu juventude sira bainhira remata misa Natal kalan, prejudika sarani balun hetan kanek no Igreja hetan tuda no estragu. Tanba ne’e, Igreja nu’udár  instituisaun divina no umana ne’ebé iha mós nia dignidade no ita hotu hatene katak Igreja fatin Santu, fatin ne’ebé halibur sarani hotu hodi adora no hahí Maromak, no Igreja la’ós sai fatin bá kriminozu sira atu estraga malu. Igreja mak Jesus Nia Isin Lolon, bainhira hetan tuda no baku konserteza nia sente moras no kanek, tanba ne’e, Igreja nu’udár vítima nune’e estrutura Parókia nian deside temporariamente sarani sira ne’ebé   pertense bá Estasaun Misionáriu Uatolari Antigu sei la hetan misa, sakramentu no atendimentu bá dokumentu sira bainhira problema ne’e seidauk bele rezolve,” sita deklarasaun Pároku Pe. Heriberto Soares Pedro, SVD iha karta aberta ne’ebé Hatutan.com asesu, Domingu (31/12/2023).

Karta Aberta. Foto/Repro

Relasiona ho desizaun ne’e, Martinha Ximenes nu’udár sarani hosi Afaloicai espresa nia triste tanba tuir nia bele situasaun oinsá mós presiza buka solusaun no la bele prejudika sarani sira seluk atu partisipa iha misa tinan tuan fahe malu no simu tinan foun nian; kalan  31 Dezembru 2023 ho 01 Janeiru 2024.     

Iha fatin hanesan Agostinho Fernandes hateten tuir loloos autoridade lokál tenke tuur hamutuk hodi buka solusaun lalais bá problema refére, liuliu hosu deskulpa bá sarani hotu iha Igreja Nossa Señora do Rosário de Fátima atu bele iha fali selebrasaun misa iha Igreja laran.

Jornalista Estajiária:  Zita Menezes