Hatutan.com, (05 Dezembru 2023), Dili—Primeiru Ministru (PM), Kay Rala Xanana Gusmão informa katak, iha Kuarta 10 janeiru 2024, governu liu hosi sorumutu ordináriu Konsellu Ministru (KM) sei nomeia no aprova estrutura foun atu lidera Rejiaun Administrativa Espesiál Oecusse Ambeno (RAEOA), hodi troka estrutura atuál ne’ebé lidera hela hosi Arsénio Paixão Bano.

Ekipa tranzisaun bá RAEOA aprezenta relatóriu bá Primeiru Ministru, Kay Rala Xanana Gusmão iha sala Gabinéte Fronteira Marítima, Palásiu Governu, Díli, Sesta (05/01/2024). Foto: Tome da Silva.

Primeiru Ministru informa assuntu ne’e hafoin enkontru ho ekipa Tranzisaun RAEOA nian ne’ebé molok ne’e nia rasik nomeia.

Lee Mós: Arsénio Bano ho Estrutura Rejigna-Aan Hodi Fó Fatin bá Estrutura Foun

Xefe Governu ne’e saliente, ekipa sira iha komisaun ne’e nia rasik mak haruka bá Oecusse atu haree kona-bá termu entrega bá buat hotu-hotu hanesan motór, uma, estrutura, osan no seluk tán.

Advertisement

“Sira halo tiha ona relatóriu ida, ohin ami mai ko’alia hanesan tama liu bá iha assuntu barak ne’ebé dala-ruma la tau iha relatóriu, karik no atu dehan katak ami halo planu oin nusá atu semana mai ne’e iha Konsellu Ministru atu harii estrutura foun iha Oecusse hodi hala’o servisu. Kuandu to’o ona Kuarta, imi hatene oinsá, estrutura, sé, saida, buat sira ne’e hotu,” Xanana Gusmão hateten iha sala Gabinéte Fronteira Marítima, Palásiu Governu, Díli, Sesta (05/01/2024).

Hatán kona-bá figura foun ne’ebé Governu sei nomeia hodi sai hanesan Prezidente Autoriade bá RAEOA, PM Xanana dehan seidauk hatene.

Governu komprometidu atu bá oin servisu nafatin tanba iha tinan-lima ne’e ema hotu-hotu hakarak kria kondisoens foun ne’ebé di’ak, hodi la’ós de’it iha Oecusse maibé iha mós munisípiu sira seluk.

Ekipa tranzisaun bá RAEOA aprezenta relatóriu bá Primeiru Ministru, Kay Rala Xanana Gusmão iha sala Gabinéte Fronteira Marítima, Palásiu Governu, Díli, Sesta (05/01/2024). Foto: Tome da Silva.

Iha fatin hanesan, Koordenadór ekipa Tranzisaun Komisaun RAEOA, Sebastião Pereira hateten, sorumutu ohin ho PM Xanana Gusmão hodi hato’o relatóriu finál ne’ebé komisaun ne’e hala’o servisu iha terrenu, durante fulan-dezembru nia laran.

“Ami aprezenta ami nia relatóriu ne’e bá Primeiru-Ministru, atu bele hetan apresiasaun bá servisu ne’ebé ami hala’o no hato’o relatóriu finál,” nia informa.

Servisu sira ne’ebé mak durante fulan-ida ekipa halo iha terrenu maka, halo levantamentu dadus tanba molok ne’e estrutura RAEOA hato’o tiha ona sira-nia relatóriu finál bá Primeiru-Ministru no ho orientasaun xefe Governu nian, haruka sira bá fali halo verifikasaun, análiza bá relatóriu ne’ebé ekipa ne’e simu.

Advertisement

Pontus relatóriu ne’e, iha prossesu hira kedan maka komisaun ne’e hala’o iha Oecusse, foka kona-bá finansas, aprovizionamentu, patrimóniu Estadu, nomós assuntu sira administrasaun ka administrativu ninian.

“Iha rekomendasaun hirak ne’ebé ami hato’o iha relatóriu ne’e. Ha’u foti liu pontu prinsipál ne’e maka iha tempu badak, tenke estabelese ona estrutura foun iha RAEOA, tanba iha 22 novembru sira halo tiha ona sira nia karta rezignasaun mai Primeiru-Ministru, no ida ne’e mak prinsipál bá komisaun,” nia dehan.

Durante halo avaliasaun bá servisu sira iha RAEOA, ekipa ne’e mós konsege identifika buat balun ne’ebé mak konsidera hanesan todan maibé ida ne’e ligadu liu ho kestoens sensitivus no jurídiku.

Nia fó ezemplu katak, ekipa ne’e husu atu estrutura RAEOA fornese saldo konta bankária, maibé sira labele fó no ne’e dala-ruma tanba liga ho kestoens jurídika. Nune’e, ekipa ne’e bá halo konfirmasaun to’o iha banku, maibé banku mós labele fornese.

“Tanba ida-ne’e, ita labele foti ema ida nia konta bankária arbiru, sein autorizasaun hosi ita nia superiór sira. Ne’ebé, prontu ida ne’e mak sai hanesan difikuldades oitoan bá ami iha Oecusse. Ne’e kestoens jurídiku,” Sebastião subliña.

Advertisement

Tuir komisaun ne’e ninia preferénsia bá figura foun ne’ebé atu lidera RAEOA, rekomenda bá Governu atu buka took Oecusse oan sira ne’ebé potensiál.

“Primeiru-Ministru ko’alia rasik katak, iha tempu badak sei halibur Oecusse oan sira. Maibé ida-ne’e, kompeténsia hosi Primeiru-Ministru nian atu deside,” Sebastião subliña.

Lee Mós: Primeiru Ministru Estabelese Komisaun Tranzisaun bá RAEOA

Jornalista: Rogério Pereira Cárceres

Advertisement