Hatutan.com, (10 Janeiru 2024), Díli—Parlamentu Nasionál (PN) liuhosi membru Komisaun B ne’ebé trata assuntu Negosíu Estranjeiru no Seguransa, deputadu Natalino dos Santos husu bá deputada Sancha Paixaõ Bano atu halo uluk konfirmasaun ho parte Gabinete Negosiasaun Fronteira Terrestre, molok levanta kestaun ruma ho sira nia servisu tanba assuntu fronteira terrestre no maritima konklui hotu ona, hein asina akordu entre Governu Timor-Leste (TL) ho Repúblika Indonézia (RI).

Membru Komisaun B ne’ebé trata assuntu Negosíu Estranjeiru no Seguransa, deputadu Natalino dos Santos. Foto: Zita Menezes.

“Komisaun B tutela bá negosíu estranjeiru inkluí halo fiskalizasaun bá Gabinete Fronteira Terrestre ami iha informasaun katak informasaun ne’e la loos. Deputada ne’e bá foti informasaun ne’e iha ne’ebé. Ha’u hanoin deputada ne’e la to’o tán iha mota Noelbesi no Nunuana maibé rona de’it informasaun tanba nia mai iha ne’e ajenda laiha. Entaun naran ko’alia de’it,” deputadu Natalino dos Santos hateten bá jornalista Hatutan.com iha PN, Kuarta (10/01/24).

Lee Mós: PN Levanta Preokupasaun Povu Atoni Kona-bá Rai Hektares 200 Tama bá Indonézia

Deputadu ne’e mós husu bá média atu halo mós konfirmasaun ho Gabinete fronteira terrestre no maritima hodi bele iha informasaun klaru kona-bá assuntu ne’e.

Tuir akompañamentu Komisaun B katak, bainhira halo fiskalizasaun iha terenu haree kona-bá fronteira ne’e no tékniku sira espliká loloos katak, prossesu markasaun fronteira ne’e bazeia bá akordu tinan 1904, 1914 no 1915 nian iha mota ida naran Noelbesi no mós Nunuana.

“La sala bazeia bá ida-ne’e mak agora daudaun iha ona entendimentu final entre Governu rua no hein atu avansa bá iha asinatura akordu final,” nia hateten.

Antes ne’e deputada bankada FRETILIN, Sancha Paixaõ Bano levanta preokupasaun povu atoni, tanba ekipa téknika Negosiasaun Fronteira Terrestre TL-RI konklui ona servisu liuliu rezolve ona segmentu naun-rezolvidu entre TL ho RI hodi avansa bá asinatura akordu finál, maibé rai hektares 200 hosi suku Bene-Ufe, Sub Rejiaun Nitibe, Rejiaun Administrativa Espesiál Oecusse Ambeno (RAEOA) tama bá área Indonézia nian.

Antes ne’e Hatutan.com halo duni konfirmasaun ho Xefe Ekipa Téknika Negosiasaun Fronteira Terrestre bá Segmentu Naun-Rezolvidu TL-RI, Embaixadór Roberto Soares maibé seidauk iha tempu atu halo klarifikasaun tanba okupadu ho servisu.

Jornalista Estajiária: Zita Menezes