Hatutan.com, (10 Janeiru 2024), Díli—Parlamentu Nasionál (PN) fó solidariedade bá vítima sira no husu bá entidade  hotu-hotu atu hamutuk ajuda Governu hodi buka solusaun bá fukun problema ne’ebé sempre hamosu inundasaun iha Díli kada tinan bainhira tempu udan.

Inundasaun ne’ebé akontese iha Tersa (09/01/2024), estraga komunidade nia uma iha Dili. Foto: Elio dos Santos da Costa.

Deputada Maria Teresa Gusmão hosi bandaka Partidu Demokrátiku (PD) konsidera inundasaun ne’e la’ós foin mak akontese maibé akontese bebeik kada tinan bainhira mosu udan boot no sempre iha vítima, no situasaun ne’e hamosu tristeza boot.

Lee Mós: Inundasaun iha Díli, APC Assegura Vítima 100-resin

“Ita hotu triste haree situasaun liuliu iha Díli, udan boot ne’ebé afeita bá populasaun tanba inundasaun estraga uma, estrada no ema. Ida ne’e la’ós responsabilidade Governu nian mesak maibé responsabilidade ema hotu nian no mós Governu,” Maria Teresa hateten iha PN, Kuarta (10/01/24).

Nia dehan, parte Governu nia responsabilidade maka tenki haree oinsa kanaliza valeta sira ne’e no tenke iha ona planu ordenamentu territoriál, nune’e bee dalan ne’e labele intupidu no husu ema hotu-hotu atu ho konsiénsia so’e foer iha fatin.

“Ha’u hakarak hato’o Solidariedade bá maluk vítima sira. Ita hotu nian tristeza boot bá situasaun ida-ne’e ne’ebé estraga buat barak tebes,” nia solidariza.

Deputada ne’e mós apela bá loja boot sira ne’ebé iha lixu barak no kaixa barak tenki jere rasik sira nia lixu tanba dalaruma sira so’e arbiru de’it, no tenke tula rasik bá so’e iha lixeira Tibar nian.

Nia husu bá komunidade iha foho leten no mota ninin sira atu kuidadu oan sira hodi labele halimar iha mota ninin no tasi ibun iha tempu udan.

Iha fatin hanesan deputadu Bankada FRETILIN, Oscar Lima konsidera inundasaun ne’ebé akontese tanba udan ne’e natureza no labele konsidera ida-ne’e pekadu, maibé bainhira udan tau tenke halo prevensaun nune’e husu bá Governu atu bele iha mós prevensaun liuhosi hadi’a ona sidade Dili ninia ordenamentu.

“Inundasaun horisehik ne’e akontese iha fatin barak tebes. Se bele Governu buka halo rehabilitasaun ho imediata, no mós lixu ne’ebé ita so’e arbiru de’it, ita sira ne’ebé hela iha Díli atu halo kontribuisaun hodi bele rezolve problema inundasaun,” nia hateten.

Deputadu ne’e husu Governu tenke iha polítika ida atu kontrola kona-bá ema ne’ebé halo uma iha valeta leten, foer so’e fali bá valeta laran bainhira udan mai hakarak ka lakohi sempre akontese inundasaun.

Jornalista Estajiária: Zita Menezes