Hatutan.com, (15 Janeiru 2024), Díli— Pessoál Saúde sira ne’ebé IX Governu liu hosi Ministériu Saúde (MS) halo rekrutamentu iha fulan Dezembru tinan kotuk, sei hahú hala’o servisu iha semana ne’e.

Ministra Saúde, Elia dos Reis Amaral. Foto: Elio dos Santos da Costa.

Ministra Saúde, Elia dos Reis Amaral hateten assuntu ne’e iha aeroportu internasionál Nicolau Lobato, Comoro, Díli, Segunda (15/01/2024).

Lee Mós: Komisaun F Kontinua Fó Atensaun bá Atendimentu iha HNGV

“Pessoál saúde sira ne’ebé aplika bá vaga ne’ebé Ministériu Saúde fó-sai iha Dezembru tinan kotuk, faze dahuluk nian remata ona no hahú aban ba oin bele hala’o ona servisu liu-liu sira ne’ebé kolokadu bá iha Hospitál Nasionál Guido Valadares,” Elia dos Reis Amaral hateten. 

Ministra ne’e argumenta katak, Governu la hapara pessoál saúde sira nia kontratu hanesan públiku nia preokupasaun, maibé sira nia kontratu mak termina duni.

Tanba ne’e, Governu iha planu ba kualkér atividade ne’ebé iha ho programa sira ne’ebé relevante iha área saúde nian maka Governu rasik halo hikas rekrutamentu no aviza bá sidadaun hotu-hotu inklui sira ne’ebé kontratu foin remata bele halo hikas aplikasaun hodi kompete bá vaga ne’e.

MS loke vaga ne’e iha loron 5 to’o 18 Dezembru 2023, aplikante besik 6.000 mak konkorre no rezultadu bá primeira faze konklui ona. 

FRETILIN Preokupa ho Falta Pessoál Saúde iha HNGV

Iha plenária Segunda (15/01/2024) iha Parlamentu Nasionál, deklarasaun polítika Bankada FRETILIN liu hosi deputada Helena Martins preokupa katak, durante periudu falta pesoál saúde iha pasiente na’in 30 liu mak hakotu-iis iha HNGV deskonfia kauza hosi falta atendimentu no falta médikamentu.

“Ita nia servisu saúde agora daudauk iha ona situasaun grave. FRETILIN hakarak husu responsabilidade hosi IX Govenu Konstituisional liu-liu Ministeriu Saúde bá situasaun ida-ne’e,” Helena Martins iha deklarasaun politíka.

Nia konta tuir katak, iha semana kotuk bankada FRETILIN bá halo fiskalizasaun iha HNGV no simu lia-halerik sira ne’ebé profisionál saúde sira hato’o katak iha servisu emerjénsia doutór sira serbisu kada turnu ema na’in 10, maibé derrepenti hapara funsionáriu kontratadu sira agora turnu ida hela de’it ema na’in 3 mak servisu, nune’e pasiente sira mai ekipa la iha biban atu atende.

Antes ne’e iha loron 12 Janeiru 2024, bainhira Komisaun F bá halo fiskalizasaun iha HNGV detekta katak, deskonfia laiha liña koordenasaun di’ak entre pessoál saúde sira no fó impaktu la di’ak ba servisu atendimentu iha ospitál ne’e.

Tanba ne’e, Prezidente komisaun F, Maria Gorumali Barreto rekomenda bá Ministra Saúde atu halo investigasaun bá situasaun ne’e hodi labele prezudika pasiente sira.

“Hafoin rona informasaun ne’e ha’u liga diretamente bá diretora ezekutiva HNGV husu mai haree lalais, iha ne’ebá klarifika katak iha pasiente na’in 5 de’it no rekursu na’in 7, hatudu mós ho foto katak loos duni.  Hafoin  diretora klarifika, ha’u diskonfia katak buat ruma la loos iha HNGV no ha’u husu  Ministra Saúde atu loke investigasaun iha HNGV,” nia hateten.

Nia fó atensaun bá pessoál saúde sira atu keta halimar ho servisu, tanba ne’e trata povu nia moris.

Kona-bá ne’e, diretora ezekutiva HNGV, Cecilia Barros Mendonça konsidera situasaun iha HNGV hasoru problema barak, nune’e nia husu bá pessoál saúde sira atu servisu ho onestu.

Cecilia Haktuir katak, problem stock out ai-moruk la’ós foin akontese maibé desde kedan Oitevu Governu Konstitusionál maibé agora daudaun stock aimoruk iha fali ona hodi hatan urjente bá komunidade sira no ai-moruk balun tán iha hela prossesu atu to’o mai.

Jornalista: Vito/Leopoldina/Zita