Hatutan.com, (15 Janeiru 2024), Díli—Empreza fornesedór  produtu farmaséutika ka produtu medikamentu, Sali-Magu Unipesoal, Lda, submete ona karta informativu bá Ministériu Saúde (MS) ho mós Institutu Nasionál Farmásia no Produtu Médiku (INFPM) kona-bá fornesimentu faze daruak ho ai-moruk total item sia (9) ho nia kuantidade 1.394.347.

Lee Mós:Kompañia Sali-Magu Garante Fó Servisu Kualidade iha Fornesimentu Ai-Moruk

Ai-moruk Paracetamol Bottle 1500 ho Miravon Bottle 5000 ne’ebé entrega ona bá Ministériu Saúde, Segunda (15/01/2024). Foto/Elio dos Santos da Costa

Iha Segunda (15/01/2023), empreza Sali-Magu hatama tan ona ai-moruk  paracetamol  1500 Bottle  ho Miravon  5000 Bottle. Ai-moruk item rua (2) ne’e  ho kuantidade  6.500  hatama ho aviaun to’o iha Timor-Leste iha Sábadu, 13 fulan-Janeiru 2024.

Iha loron, 17 fulan-Janeiru ne’e, ai-moruk kontentór 40 feet ho total kontentór  haat (4)  sai hosi Surabaya-Indonézia mai Timor-Leste atu bele kompleta fornesimentu produtu farmaséutika ka produtu medikamentu faze daruak nian bá Ministériu Saúde  (MS).

Lista ai-moruk ne’ebé atu hatama iha faze daruak;

Iha faze dahuluk, Sali-Magu hatama produtu   Farmaséutika ka produtu medikamentu konsumovies  atu bele responde daudaun stoke out ne’ebé akontese iha ospitál, sentru saúde, klínika ho postu saúde sira iha territóriu nasionál.

Ministra Saúde (MS), Elia A.A dos Reis Amaral, Segunda (15/01/2023), informa  estoke  ai-moruk primeira faze tama ona atu bele halo atendimentu bá pasiente sira iha ospitál, sentru saúde, postu saúde no klinika sira.

Ministra Saúde Elia A.A dos Reis Amaral halo entrevista ho jornalista Hatutan.com iha Aeroportu Internasionál Prezidente Nicolau Lobato, Segunda (15/01/2024). Foto/Elio dos Santos da Costa

Ministra Saúde hato’o deklarasaun ne’e ba Hatutan.com iha Aeroportu Internasionál Prezidente Nicolau Lobato, Comoro, Díli, hodi hatan bá preokupasaun sidadaun sira-nian kona-bá  stoke out ai-moruk  dezde tinan 2023 to’o mai ohin loron.

Ministra Saúde Elia A.A dos Reis Amaral hateten, ai-moruk ne’e importante no sai mós hanesan preokupasaun ne’ebé Governu ida-ne’e liu husi Ministériu Saúde iha tanba ida-ne’e iha ligasaun direita ho populasaun sira nia vida.

Nia afirma Ministériu Saúde halo ona esforsu lubuk ida no oras ne’e ai-moruk primeira faze nian tama ona no iha buat tolu mak hanesan ai-moruk, konsumoves no reazentes.

Ai-moruk tama ho paleta ida kompletu no konsumoves sira hanesan adezivu, mangeira, no fasilidade seluk ne’ebé iha atu kompleta servisu atendimentu saúde bá populasaun no moras sira mós hahu tama dauaun ona no empreza mós halo ona oráriu no termu entrega bá Ministeriu atu nune’e bele halo ona distribuisaun bá iha ospitál no klinika sira hodi halo atendimentu bá pasiente sira no populasaun sira ne’ebé moras.

“Ai-moruk sira ne’e ohin tama husi kargo no balun sei tuir mai iha prosesu nia laran no akizasaun bá ai-moruk husi kompañia manan nain sei kontínua hatama ai-moruk too iha meiadu fulan-Marsu hodi kompleta ai-moruk hotu tuir kontratu ne’ebé Governu halo ho empreza,” Ministra Saúde Elia dos Reis Amaral.

Ministra Saúde hatutan Empreza Sali-Magu nia kontratu ho Governu nia validade too fulan-Marsu no ai-moruk hotu ne’ebé empreza ne’e fornese tuir kontratu ne’ebé iha sei kompleta iha fulan-Marsu molok kontratu remata.

Governu Haklean Investigasaun bá Empreza 22 Ne’ebé Hatama Ai-moruk iha 2022

Ministra Saúde Elia dos Reis Amaral mós informa kona-bá empreza 22 ne’ebé hatama ai-moruk iha tinan  2022 ne’ebé deskonfia iha iregularidade no empreza balun ne’ebé fornese ai-moruk la tuir prosedimentu legal ne’ebé iha no Ministériu Saúde sei buka hatene liu hosi investigasaun iha tempu tuir mai.

“Ita hotu iha Repúblika Demokrátika Timor-Leste nia laran tanba ne’e hotu-hotu sei hakruk bá lei no regulamentu ne’ebé mak iha, tanba ne’e Ministériu Saúde sei halo investigasaun atu hatene klean problema ai-moruk ne’e ho lolos,” Ministra Saúde Elia dos Reis Amaral afirma.

Pasiénte Liu 30 Mate iha HNGV

Ospitál Nasionál Guido Valadares (HNGV).

Parlamentu Nasionál liohosi deklrasaun politíka Bankada FRETILIN haktuir pasiénte 30 liu maka hakotu iis iha Ospitál Nasionál Guido Valadares (HNGV) durante iha situasaun falta atendementu no médikamentu.

“Ita nia servisu saúde agora dadauk iha ona situasaun grave hein atu kolapsu, FRETILIN hakarak husu reponsabilidade husi IX Govenu Konstituisional liu-liu Ministeriu Saúde bá situasaun ida-ne’e,” membru PN hosi Bankada  FRETILIN, Helena Martins haktuir deklarasaun  politíka Bankada FRETILIN iha plenária,  Segunda (15/01/2024).

Iha semana kotuk Bankada FRETILIN bá halo fiskalizasaun bá HNGV no agora hato’o lia-halerik sira ne’ebé  profesionál saúde sira hato’o bá Bankada FRETILIN  nune’e Governu sira bele rona preokupasaun hirak ne’e

“Iha Servisu emerjénsia doutór dehan nune’e durante ne’e, ami kada turnu ema na’in-10 ka 11 maka tama servisu, derepenti hapara funsionáriu kontratadu, agora turnu ida hela de’it ami na’in-tolu (3) maka servisu, nune’e pasiénte sira mai ami la iha biban (kewalahan) atu atende,” Helana Martins haktuir.

Tuir dadus ne’ebé Bankada FRETILIN asesu liuhosi HNGV  katak pasiénte liu 30 maka hakotu iis iha situasaun ida-ne’e

“Iha Ospitál Nasionál, pasiénte 30 liu maka mate iha periodu krizé atendimentu ida-ne’e, balun mate tanba destinu duni karik, maibé balun mate tanba duni falta atendimentu no médikamentu, ida-ne’e dadus husi HNGV. Ita seidauk hatene hosi Ospitál referál no Munisípiu sira,” Deputada Helana Martins hateten.

Jornalista: Vito Salvadór/Estajiária: Zita Menezes