Hatutan.com, (16 Janeiru 2024), Díli— Vise-Primeiru Ministru, Ministru Koordenador Asuntus Sosiais no Ministru Dezenvolvimentu Rural no Habitasaun Komunitáriu, Mariano Assanami Sabino tun hodi haree diretamente situasaun reál iha Hospital Nasional Guido Valadares (HNGV) no sei buka atu tulun Ministra Saúde hodi bele rezolve dezafiu sira mak akontese iha ospitál ne’e.

Vise-Primeiru Ministru, Ministru Koordenador Asuntus Sosiais no Ministru Dezenvolvimentu Rural no Habitasaun Komunitáriu, Mariano Assanami Sabino akompaña hosi Ministra Saúde, Elia Amarla haree diretamente situasaun reál iha Hospital Nasional Guido Valadares (HNGV), Tersa (16/01/2024). Foto: Elio dos Santos da Costa.

“Ohin mai iha ne’e atu fó apoiu bá difikuldade ida ne’ebé mak Ministra Saúde rasik enfrenta, tanba ohin haree ona ho matan, nune’e presiza apoiu no loke dalan bá malu atu iha aban no bairua bele iha ospitál no armazen ne’ebé kualidade,” Assanami hateten iha HNGV, Bidau, Tersa (16/01/2024).

Lee Mós: Komisaun F Kontinua Fó Atensaun bá Atendimentu iha HNGV

Tuir observasaun Assanami katak, prinsípiu ai-moruk ne’e 10 to’o 15% iha hela no iha problema balun ne’ebé mak iha nanis ona bainhira Ministra mai assume responsabilidade, nune’e presiza hodi hadi’a.

Tanba ne’e, Governante ne’e hatutan, hanesan Ministru Koordenadór ne’ebé mak haree liu no tau matan bá assuntu sosiais, kuandu hahú hosi planu mak tenke akompaña planeamentu, sinkroniza no armoniza ba Ministériu sira ne’ebé mak iha Ministeriu Koordenadór nia okos atu kontinua halo asaun monitorizasaun, avaliasaun no akompañamentu bá servisu sira.

Vise Primeiru Ministru Ministeriu konsidera Ministériu Saúde hanesan Ministériu ne’ebé vitál tebes tanba ne’e mak hanesan Ministeriu Koordenadór hakarak fó apoiu bá sira hodi bele foti desizaun ne’ebe mak ho nessesáriu hodi bele ai-moruk ne’e labele falta ka tenke iha hodi funsiona ospitál ho normál ho estoke ai-moruk ne’ebé mak iha kategoria tolu hanesan vitál, essensiál no nessesáriu.

Aproveita mós iha oportunidade ida-ne’e Assnami hakarak fó parabens ba estrutura foun HNGV nian ne’ebé ohin simu ona pose atu hala’o knaar ho loloos, husu ema hotu-hotu ne’ebé mak servisu iha elementu rua hanesan Saude no edukasaun iha Timor Leste atu servisu ho loloos no servi duni ho fuan.

Husu bá sira ne’ebé kaer pasta Estadu tenke servisu didi’ak hodi servi Estadu ida-ne’e tanba lideransa ne’e la’ós de’it órden, tanba ne’e iha legalidade no lejitimidade hodi fó orientasaun de’it maibé mai ko’alia, haree sasan sira no haku’ak ema hotu atu halo oinsa mak servisu ne’e la’o ho di’ak ba dezenvolvimentu Estadu Timor Leste nian.

“Elementu seluk maka ekipa ne’e importante. O bele mai hosi parte ka grupu ne’ebé de’it maibé bainhira iha ona funsionáriu públiku, dedikasaun ne’e atu servi povu. Ita ekipa ida hodi halo servisu ne’e másimu ba rai ida-ne’e,” nia dehan.

Nia apela, Timoroan hotu-hotu tenki hatene katak kria atmosfera politiku ida ne’ebé fó espasu no dedikasaun bá ema hotu-hotu atu servi rai ida-ne’e, tanba ne’e bele partidu lakon maibé sidadaun la lakon.

Assanami subliña katak, patidu hanesan instrumentu ki’ik ida hodi bele hakat liu hosi ne’e hodi ba kaer Estadu, tanba ne’e nasaun demokratiku dalan úniku maka liu hosi partidu, maibé atu partidu ne’e mak volante fali Estadu hodi tuir partidu nia hakarak ne’e labele, nune’e Estadu nafatin atu servi bá ema hotu.

Nia mós husu bá sira ne’ebé kaer ukun mós tenke fó espasu bá malu hodi ema hotu-hotu senti orgullu, dedika no iha integridade hodi halo dedikasaun ba Estadu ida ne’e tanba ema hotu nian.

Jornalista Estajiáriu:  Lazaro Pereira Quefi