Hatutan.com, (16 Janeiru 2024), Díli– Comissão Anti Corrupção (CAC) halo hela  averiguasaun bá keixa hosi fonte anónimu sira  hasoru Ministériu Saúde (MS) ligadu ho prosesu adjudikasaun bá Empreza Sali-Magu Unipesoal, Lda, hodi fornese produtu farmaséutika ka produtu medikamentu bá  Institutu Nasionál Farmásia no Produtu Médiku (INFPM).

Lee Mós: Fonte Anónimu Hatama Keixa bá CAC Kona-bá Projetu Sosa Produtu Medikamentu

Diretór Jerál Investigasaun CAC, José de Araújo Verdial. Foto/Elio dos Santos da Costa

Diretór Jerál Investigasaun CAC, José de Araújo Verdial, informa, keixa ida ne’e ligadu ho prosesu adjudikasaun direta ne’ebé Ministériu Saúde halo ho Kompañia Sali-Mago Unipesoal, Lda, hodi fornese  produtu farmaséutika no medikamentu, katak ema lamenta no deskonfia katak prosesu ne’e iha indísiu bá iha korrupsaun.

Iha keixa hosi fonte anónimu ne’e, tanba lamenta liu-liu kona-bá prosesu ninia prosesu adjudikasaun, ne’ebé, loloos bele liuhosi aprovizionamentu normál, maibé, mais realidade, Ministra Saúde, Élia Amaral  halo adjudikasaun direta.

Maske nune’e, José Verdial, esplika, CAC presiza halo mós prosesu ida, no CAC labele bazeia de’it bá saida mak ema hateten, depois foti ona konkluzaun. Tenke liuhosi prosesu ida, para depois CAC tenke haree duni katak, iha duni ka lae, indísiu bá iha krime korrupsaun ninian.

“Liga ho keixa ida ne’e, hanesan  ha’u hateten bá ita-boot sira, depois  ami simu tiha keixa sira ne’e, ami nia ekipa halo hela averiguasaun, agora daudaun iha hela prosesu averiguasaun. Entaun, tanba saida mak ha’u dehan iha prosesu averiguasaun, tanba prosesu sira hanesan ne’e, ita tenke halibur ninia dokumentu sira, halibur informasaun sira depois ekipa bele halo análize ida, hodi haree katak, iha ka lae, indísiu bá iha korupsaun nian,” Diretór Jerál bá Investigasaun CAC, José Verdial, informa bá Hatutan.com iha kna’ar fatin Farol-Dili, Tersa (16/01/2024).

Diretór José Verdial, hatutan, bainhira prosesu averiguasaun ne’e mak termina ona no haree katak iha indísiu bá iha korrupsaun nian, CAC sei halo preparasaun auto partisipasaun submete  bá Ministériu Públiku (MP), nu’udár na’in bá asaun penál.

“To’o agora sei nafatin iha hela faze averiguasaun, ita to’o ona iha faze análize informasaun, dokumentu sira ne’ebé mak investigadór sira halibur,” nia informa.

Hatán kona-bá, CAC ninia haree bá prosesu adjudikasaun ne’ebé MS estabelese ho empreza Sali-Magutuir duni lei sira aprovizionamentu nian, diretór jerál investigasaun CAC ne’e dehan, sira seidauk to’o iha faze konkluzaun tanba ne’e, nia labele lai adianta bá públiku.

Daudaun ne’e mós iha Ospitál sira, maioria ai-moruk stock out, katak laiha ona ai-moruk atu halo atendimentu bá pasiente sira ne’ebé moras, no situasaun ne’e, to’o rezulta ema lakon vida iha Ospitál sira no prosesu averiguasaun hosi CAC nian to’o ona iha faze ida ne’ebé, José Verdial, dehan, daudaun ne’e CAC haree hela, mais, agora instituisaun ida-idak ho nia kna’ar.

Kna’ar CAC ninian mak haree de’it katak, prosesu sira hanesan ne’e, sé iha duni indísiu bá krime korrupsaun, CAC tenke loke investigasaun no halo auto partisipasaun, hodi enkamiña bá iha Ministériu Públiku.

Diretór jerál investigasaun CAC ne’e salienta, normalmente kona-bá keixa sira laiha prazu. Maibé, CAC sempre ho ninia rekursu ne’ebé mak iha,  tenta bele finaliza prosesu ne’e iha tempu badak.

Jornalista: Rogério Pereira Cárceres