Hatutan.com, (19 Janeiru 2024), Díli—To’o agora Komisaun Permanente bá Rekrutamentu Kontratadu (CPRC sígla portugés) Ministeriu Saúde (MS), hein hela Ministra Sáude, Élia dos Reis Amaral atu halo aprovasaun bá pessoal saude kontratadus na’in 229 hodi bele selebra kontratu no destaka bá iha Hospital Nasionál Guido Valadares (HNGV).

Prezidente Komisaun Permante bá Rekrutamentu Kontratadu, Júlio dos Santos. Foto: Leopoldina de Carvalho.

Prezidente Komisaun Permante bá Rekrutamentu Kontratadu, Júlio dos Santos hateten, totál pessoál saúde ne’ebé pasa iha selesaun dokumentus hamutuk 1.749, hosi númeru ne’e presiza de’it na’in 229 hodi koloka bá HNGV no kandidatu 229 ne’e passa ona iha faze selesaun dokumetus no entrevista.

Lee Mós: Pessoál Saúde Rekrutadu Hosi MS Hahú Servisu iha Semana Ne’e

“Daudaun ne’e kandidatus na’in 229 ne’e hein hela atu selebra kontratu tanba CPRC aprezenta ona bá iha Ministra Saúde Elia Amaral iha loron 15 fulan Janeiru tinan ne’e nu’udár superiora másima iha MS hodi hetan aprovasaun no bele entrega bá Diretora ezekutiva HNGV,” Júlio dos Santos hateten bá jornalista Hatutan.com iha knaar fatin INFPM, Sesta (19/01/2024).

Prezidente Komisaun Permante bá Rekrutamentu Kontratadu ne’e rejeita ho informasaun balun ne’ebé fó-sai iha loron hirak bá kotuk hateten funsionáriu hirak ne’e hahú ona servisu, ne’e la loos.

“Ita tenki dehan buat ne’ebé loos katak ita hein aprovasaun hosi Ministra Elia Amaral hafoin bele publika iha kuadru avizu sira Palásiu Cinzas nian,” Júlio dos Santos klarifika.

Júlio dos Santos  informa, daudaun ne’e kandidatu sira ne’ebé passa ona ne’e servisu voluntáriu hela iha HNGV, klínika sira, sentru saúde sira no balun sei iha hela uma.

Komisaun Permante bá Rekrutamentu Kontratadu  planeia atu koloka pessoál kontratadu hirak ne’e iha HNGV, INFPM, SNAEM, Ospitál Referál sira no servisu saúde munisipál sira.

Kona-bá iha HNGV, CPRC halo selesaun prioridade hanesan médiku, enfermeiru, parteira no tékniku laboratóriu, dentaria, nutrisaun no tékniku apoiu seluk hanesan admistrasaun saúde públiku, motorista no assesór balun.

Tuir nia, rekrutadu sira ne’e nu’udár funsionáriu kontratadus la’ós kazuá.

“Kazuál ne’e ita presiza servisu mak ita bolu mai, maibé kontratadu ne’e karik posibilidade ba oin, superiór sira nia desizaun katak sira bele tuir fali teste bele sai funsionáriu permanente,” nia esplika.

Kona-bá preokupasaun públiku katak prossesu rekrutamentu la tranparánte, Júlio dos Santos rejeita tanba prossesu selesaun dokumentus no entrevista hetan akompañamentu hosi Komisaun Anti Korrupsaun (CAC).

Daudaun ne’e CPRC kontinua hela halo entrevista ho kandidatu sira ne’ebé sei koloka bá ospitál referál sira hanesan Maubisse, Suai, Maliana, Baucau no RAEOA.

CPRC halo servisu bazeia bá despaixu hosi Ministra Saúde Elia Amaral, liu hosi despacho hirak ne’e CPRC halo nia funsaun bá rekrutamentu kontratadus no timor-oan hotu-hotu, enfermeiru, parteira, médiku, ékniku aliadu sira seluk, sira hotu assesu ba informasaun hodi mai aplika ho total aplikantes 7.838.

Tuir tarjetu presiza pessoál saúde 200-resin bá ospitál referál sira.

Iha Segunda 15 Janeiru 2024, Ministra Saúde, Elia dos Reis Amaral  hateten iha aeroportu internasionál Prezidente Nicolau Lobato katak, pessoál saúde sira ne’ebé IX Governu liu hosi Ministériu Saúde (MS) halo rekrutamentu iha fulan Dezembru tinan kotuk, sei hahú hala’o servisu iha semana ne’e.

“Pessoál saúde sira ne’ebé aplika bá vaga ne’ebé Ministériu Saúde fó-sai iha Dezembru tinan kotuk, faze dahuluk nian remata ona no hahú aban ba oin bele hala’o ona servisu liu-liu sira ne’ebé kolokadu bá iha Hospitál Nasionál Guido Valadares,” Elia dos Reis Amaral hateten. 

Ministra ne’e argumenta katak, Governu la hapara pessoál saúde sira nia kontratu hanesan públiku nia preokupasaun, maibé sira nia kontratu mak termina duni.

Tanba ne’e, Governu iha planu ba kualkér atividade ne’ebé iha ho programa sira ne’ebé relevante iha área saúde nian maka Governu rasik halo hikas rekrutamentu no aviza bá sidadaun hotu-hotu inklui sira ne’ebé kontratu foin remata bele halo hikas aplikasaun hodi kompete bá vaga ne’e.

MS loke vaga ne’e iha loron 05 to’o 18 Dezembru 2023.

Jornalista: Leopoldina de Carvalho