Hatutan.com, (23 Janeiru 2024), Díli-Diretór Servisu Munisipál Saúde Bobonaro (SMSB), João Cardoso, konfirma katak, to’o oras ne’e Postu Saúde Cailaco seidauk iha pessoál saúde ne’ebé destaka permanente, atu fó atendimentu saúde bá komunidade sira iha Suku Daudo, Postu Administrativu Cailaco, Munisípiu Bobonaro.

Lee Mós: Polémika Sosa Ai-moruk, Ministra “Siik De’it” no CCI-TL Defende Empreza Sali-Magu

Postu Saúde Daudo, Suku Daudo, Postu Administrativu Cailaco, Munisípiu Bobonaro. Foto/Foti Hosi Facebook

Nia  hateten, iha tinan sanulu sira ikus ne’e, fasilidade foun mós harii barbarak, liuhsoi projetu PDIN, balu hosi ministériu sáude rasik, dala-ruma ajénsia sira mós apoiu harii postu saúde, tanba pedidu hosi autoridade lokál sira iha baze, buka apoiu oioin, hodi loke fasilidades barbarak, mais ema ka rekursu umanu mak ida ne’e de’it. Tanba ne’e maka, iha períodu pandemia globál Covid-19, ministériu foti desizaun ho fundu Covid nian kontrata ema lubuk ida, no liu-liu iha Munisípiu Bobonaro rasik, tempu ne’ebá rekruta pessoál saúde hamutuk 250-resin, hodi priénxe iha fatin sira ne’e. Maibé, ikus mai, kontratante sira ne’e ninian kontratu termina iha loron 31 fulan-Dezembru 2023, hodi hein polítika foun IX Governu konstitusionál nian desizaun tuir mai.

Iha semana dahuluk fulan-Janeiru 2024 nian, hosi loron 03 fulan-Janeiru sa’e mai, laiha ona atendimetu rutina ka diáriu iha postu saúde sira, no liu-liu iha Cailaco rasik, razaun pessoál saúde sira ne’e labele kontinua servisu.

Haree bá situasaun ne’e, ikus mai, Ministériu Saúde (MS) liuhosi nia ezekutivu sira iha nasionál, hatuun orientasaun bá diretór Servisu Munisipál Saúde Bobonaro nian atu jere lai rekursu sira ne’ebé iha sentru saúde hodi halo atendimentu sáude bá komunidade sira, semana ida dala-rua de’it.

“Semana primeiru iha fulan-Janeiru nian ne’e, ami la konsege loke, mais, tama tiha semana segundu, ami hetan orientasaun hosi boot sira hosi ministériu, katak, labele taka, sasán sira sei iha prosesu, imi haree jere took, ema sira hosi sentru saúde bá halo hela tratamentu,” diretór Servisu Munisipál Saúde Bobonaro, João Cardoso,  informa bá Hatutan.com iha via telefóne, Sesta (19/01/2024).

“La loke lorloron bá mós, mais imi tenke bá loke dala-ida, dala-rua, atu nune’e, atendimentu saúde bá komunidade ne’e labele para. Ne’ebé, ida ne’e mak ami halo. Agora dadaun, ami funsiona semana ida dala-rua,” João Cardoso informa.

Molok ne’e, postu saúde Cailaco, iha pesoal saúde na’in-rua (2), mane ida ho feto ida mak destakadu iha ne’ebá hodi fó atendimentu diáriu. Mais, tanba sira nian kontratu termina, nune’e atendimentu semana ida, la’o dala-rua de’it.

Diretór João Cardoso, saliente, problema kona-bá menus rekusu umanu iha fasilidade saúde sira ne’e, la’ós de’it iha Postu Saúde Cailaco, maibé, iha mós postu rua seluk tán ne’ebé mak enfrenta problema hanesan, no situasaun sira ne’e mosu kedan iha tinan-10 ikus ne’e.

“Iha postu saúde Daúdo, la’ós ne’e de’it, iha postu saúde tolu ka haat ida maka ninia kondisaun ne’e hanesan, tanba ema ne’ebé mak designadu bá iha ne’ebá, ema laiha. Ami jere halo nusá, para ema ruma, pesoal saúde hosi sentru saúde, para bele komunika, koordena ho lider lokál sira, para informa bá komunidade, oron ida ne’ebé imi atu bá vizita, sira mai konsulta. Ida ne’e mak ami la’o,” nia tenik.

Informasaun sira espalla iha media sosial kona-bá postu saúde abandona, tuir nia, parese foti imajen ne’e  hosi loron 03 fulan-Janeiru mai leten sira ne’e. Semana primeiru Janeiru sira ne’e mai, ne’e loos duni, taka. Mais, agora lae, ho pesoal saúde ne’ebé mak jere atu kontinua hlao atendimentu, maske lsemana ida dala ida.

Servisu Munisipál Saúde Bobonaro (SMSB), dadaun ne’e eziste ho totál hamutuk 216, kompostu hosi pessoál saúde to’o pessoál limpéza sira (cleaners). Enkuantu kontratadu hirak ne’ebé foin lalais termina sira-nian kontratu, hamutuk 200 resin. 

SMSB eziste postu saúde ho totál 30 no sentru saúde iha 7. Fasilidade saúde sira ne’e, balu laiha pesoal saúde, tanba pesoal permanente maka servisu iha ne’ebá. Maibé, ida ne’e laiha influensia ho kontratu sira ne’ebé termina iha loron 31 fulan-Dezembru foin lalais.

Kona-bá stóke ai-moruk, diretór João Cardoso, informa, iha fulan-Dezembru 2023 liubá, sira enfrenta problema ai-moruk ho item totál 10 maka laiha. Maibé, iha semana ne’e nia laran ne’e, ai-moruk item 5 ka 6 mak foin tama tán.

Jornalista: Rogério Pereira Cárceres