Hatutan.com, (19 Janeiru 2024), Díli—Ministériu Juventude Desportu Arte no Kultura (MJDAK), liuhosi Komisaun Reguladora Artes Marsiais (KRAM) ho Komandu Polísia Nasionál Timor-Lorosa’e (PNTL) konklui ona re-fiskalizasaun bá sentru ka “ranting” sira Grupu Arte Marsiál PSHT, IKS no KORK nian hamutuk 993, iha munisípiu 11.

Prezidente Komisaun Reguladora Arte Marsiál (KRAM), Octávio da Conceição. Foto/Elio dos Santos da Costa.

Re-fiskakizasaun ne’e bazeia bá Rezolusaun Governu númeru 45/2023, 10 Novembru kona-bá suspensaun bá Atividade Prátika Arte Marsial iha Timor-Leste, durante loron 90.

Lee Mós: Taka Atividade GAM-GAR, KRAM Hein Desizaun Governu

Hafoin rezolusaun ne’e publika iha Jornál Repúblika, iha tempu ne’ebá kedan KRAM ho komandu PNTL halo kedan atividade re-fiskalizasaun bá munisipiu 11 ne’ebé konklui ona iha semana kotuk.

Prezidente KRAM, Octavio da Conceição hateten, rezolusaun Governu númeru 45/2203, 10 novembru, ida-ne’e fó mós órden servisu bá KRAM no Komandu Jerál PNTL atu halo re-fiskalizasaun bá sentrus, Eskolas, no mós klube sira ne’ebé prátika atividade artes marsiais iha territóriu timor laran tomak.

Iha 2022, KRAM hasai segunda diretiva ne’ebé publika ona iha Jornál Repúblika hatuur pontu 18 sai nu’udár kritériu báziku bá re-estabelesimentu sentru, klubu no eskola sira ne’ebé prátika artes marsiais iha TL. Ho ida-ne’e duni mak sei sai sasukat bá atividade re-fiskalizasaun ne’ebé sira hala’o tiha ona.

Atividade re-fiskalizasaun ne’e involve hosi ekipa KRAM nasionál no sub-KRAM iha munisipiu sira, hamutuk ho komandante Komandu PNTL Munisipiu, Eskudra no Ofisial Polsia Suku (OPS) no apoiu hosi Komandu FALINTIL Forsa Defeza Timor-Leste (F-FDTL) ninia destakamentu sira iha munisipiu, autoridade seguransa sira seluk, hotu-hotu ninia apoiu maka re-fiskalizasaun iha munisipiu 11 remata iha semana kotuk.

“Hosi 1.042 ranting organizasaun artes marsiais PSHT, IKS no KORK, 993 ranting mak ita kobre hotu ona. Falta de’it iha Dili ho RAEOA,” Octávio da Conceição informa liuhosi konferénsia imprensa iha salaun KRAM-MJDAK, Lecidere, Dili, Sesta (19/01/2024).

Tuir oráriu, hahú sábadu 20 janeiru 2024 KRAM ho Komandu PNTL Munisipiu Dili hosi Postu Administrativu Metinaro no Cristo Rei sei kontinua hala’o atividade re-fiskalizasaun bá “ranting” hosi  Oragzanisaun tolu nian iha kapitál Dili no mós iha RAEOA, ne’ebé mak nia totál ne’e iha sentrus atus-ida resin mak prátika artes marsiais.

Baze dadus ne’ebé KRAM iha katak, totál klube sira ne’ebé mak durante eziste iha kapitál Dili rasik, PSHT iha 96, IKS-PTL iha 70-resin no KORK iha 28. Nune’e, KRAM ho PNTL sei halo atividade re-fiskalizasaun durante semana ida nia laran.

Prezidente KRAM ne’e informa, bainhira sira konklui atividade re-fiskalizasaun iha territóriu nasionál, sira sei aprezenta relatóriu finál bá Governu liuhosi Ministru Juventude, Desportu Arte no Kultura (MJDAK), Nélio Isaac Sarmento, Ministru Interior (MI), Francisco da Costa Guterres, hafoin ida-ne’e, sei aprezenta fali bá iha sorumutu Konsellu Ministrus nian, hodi hetan apresiasaun no desizaun.

“Rezolusaun fó loron 90 ida-ne’e, ami sei entrega relatóriu fiskalizasaun iha 10 fevereiru 2024 bá Ministru na’in-rua, depois sei aprezenta bá Konsellu Ministrus hodi hetan avaliasaun nomós bele iha desizaun ikus,” Octávio da Conceição hateten.

Iha atividade re-fiskalizasaun ne’e, ho baze bá rezolusaun númeru 45/2023, 10 novembru, KRAM ho PNTL haree liubá pontu importante sira mak hanesan;

Ida, identifika sé mak responsável bá klube, sentru no skola sira. Rua, identifika sé maka treinadór ka sé mak fó treinu bá ema iha fatin prátika ne’e. Tolu, sé maka hala’o treinamentu ne’e, atleta hira, feto hira, mane hira.

Haat, sé maka rai-ni’an, rai estadu ka rai eransa ka rai aluga. Lima, fatin treinamentu ne’e, merese atu halo treinamentu ka lae. Iha hariis fatin ka lae, no rai nia luan ne’e hira.

Fatin treinamentu ne’e asesu bá estrada ka la’e. Fatin treinamentu ne’e nakloke bá ema hotu atu bele haree ka la’e ka subar de’it. Fatin treinamentu ne’e iha autorizasaun hosi autoridade lokál, hanesan xefe aldeia, xefe suku to’o OPS suku ka lae.

“Ida ne’e mak ita atu bá haree. Identifika prosedimentu administrativu hothotu, tuir segunda diretiva KRAM, ita tau ona iha ne’ebá kritériu 18,” nia esplika.

Iha prosedimentu bá lejitimasaun no legalidade atu hetan fatin treinamentu, ka fatin sira bá formasaun nian, KRAM hatuur ona kritéria sira iha ne’ebá.

Iha rezolusaun ne’e mós esplika katak, organizasaun arte marsial ka sé mak la priénxe kritéria ne’ebé mak tau ona iha diretiva KRAM, sei kontinua hetan suspensaun.

Sira ne’ebé priénxe kritériu, KRAM sei rekomenda bá Governu liu-liu bá Ministru Juventude Desportu Arte no Kultura, no Ministru Interior, hodi aprezenta bá konsellu ministrus, hodi hetan apresiasaun, nomós iha desizaun ikus.

Hosi relatóriu ne’ebé KRAM sei aprezenta, sei hamosu rekomendasaun rua. Ida ne’ebé priénxe, Sufisiente, no La’e liu, depois ida-ne’e sei fó-sai rezultadu iha fulan-marsu tinan ne’e.

Jornalista: Rogério Pereira Cárceres