Hatutan.com, (20 Janeiru 2024), Díli—Hahú fulan Abríl tinan ne’e, Ministériu Juventude Desportu Arte no Kultura (MJDAK) liu hosi Komisaun Reguladora Artes Marsiais (KRAM) sei aplika sansaun todan bá membru Grupu Arte Marsiál (GAM), bainhira la obedese ka viola rezolusaun Governu númeru 45/2023, 10 novembru, kona-bá Suspensaun bá Prátika Arte Marsiál ho prazu tempu durante loron 90 no lei númeru 05/2017, kona-bá Arma Branka.

Prezidente KRAM, Octávio da Conceição. Foto: Elio dos Santos da Costa.

Sansaun ne’e sei aplika bá kualkér membru hosi GAM hotu-hotu ne’ebé utiliza farda hodi la’o bá mai iha fatin públiku no mós utilza farda hodi publika iha média sosiál, sei multa hahú hosi $50 to’o $200, tuir buat ne’ebé hateten iha rezulosaun Governu nian.

Lee Mós: PNTL-KRAM Konklui Re-fiskalizasaun bá Sentru 993 Hosi PSHT-IKS-KORK iha Munisípiu 11

Prezidente KRAM, Octávio da Conceição esplika, rezolusaun ne’e órden Estadu nian no nu’udár regra normativa ne’ebé ema hotu-hotu tenke halo tuir.

Tanba ne’e, nia dehan, Organizasaun ka membru Grupu Artes Marsiais ne’ebé falta dixiplina, sei kontinua halo prátika subar-subar, sei kontinua uza farda subar-subar, ne’e falta dixíplina membru organizasaun artes marsiais sira no tuir Lei númeru 05/2017 mós regula duni atividade no atitude sira hanesan ne’e.

“Pozisaun KRAM maka ne’e. Depois de rezolusaun númeru 45/2023 remata iha dia 10 Abríl, kuandu Governu re-ativa prátika artes marsiais, KRAM sei foti sansaun rigorozu bá membru GAM hotu-hotu ne’ebé la kumpri Lei númeru 05/2017, la kumpri segunda diretiva KRAM. Ne’e sansaun sei todan tebes bá sira,” Octávio da Conceição hateten liu hosi konferénsia imprénsa iha salaun KRAM-MJDAK, Lecidere-Díli, Sesta (19/01/2024).

KRAM simu ona orientasaun hosi Ministru Juventude Desportu, Arte no Kultura (MJDAK), Nélio Isaac Sarmento atu hamosu Dekretu-Lei kontra ordenasaun iha tinan ida-ne’e.

KRAM mós preparadu atu halo aprezentasaun iha fulan-Marsu tinan ne’e ninia laran bá Konsellu Ministru liu hosi Ministru Juventude Desportu atu halo aprezentasaun, bainhira Governu re-ativa maka KRAM sei aplika mós Dekretu-Lei kontra ordenasaun ne’e.

“Sé mak bele. Iha Dekretu-Lei ne’e sansaun sei todan tebes. Ezemplu, sé mak hatais farda hodi la’o bá la’o mai, polísia kaer kona, autoridade sira halo keixa, ami hatene nia sei multa $50 to’o $200. Ne’e hatais farda la’o bá la’o mai de’it,” Octávio da Conceição esplika.

La’ós ne’e de’it, membru GAM sé de’it mak halo publikasaun fotografia iha média sosiál hanesan iha facebook, WhatsApp, iha ne’ebé de’it mak KRAM hatene, sei buka-tuir ninia identidade hanesan naran iha baze de dadus.

“Ami hatene nia mai hosi ranting ida-ne’e, sentru ida-ne’e, klube ida-ne’e, sei kona sansaun no sansaun mós bá ninia treinadór sira hosi ranting ka klube ka sentru sira ne’ebé nia hola parte bá,” Octávio tenik.

Iha tinan ida-ne’e, sei iha duni regra ida-ne’e no KRAM durante mandatu ida-ne’e, komprometidu atu dezenvolve organizasaun artes marsais bazeia bá vizaun KRAM nian, katak, Orgazaniasaun Artes Mrsiais dezenvolvidu, saudável, síviku no responsável.

“Sé mak laiha responsábilidade, automátikamente ó hetan sansaun,” Prezidente KRAM ne’e hateten.

Hatán kona-bá durante ne’e, karik KRAM mós simu relatóriu ruma hosi PNTL bá dezobediénsia hosi membru GAM sira, Prezidente KRAM dehan, aktu violasaun bá rezolusaun númeru 45/2023 iha terrenu, ne’e kompeténsia própria hosi Komandu Jerál PNTL nian atu halo seguransa.

Maibé mós iha responsábilidade Administrativa hosi KRAM atu koopera ho komandu jerál PNTL ho autoridade polisiál sira seluk, identifika no kontrola oinsá mak bele halo Lei atu regula membru GAM sira ninia falta dixiplina sira ne’e, hosi membru ida-idak ne’ebé komete violasaun, ka la halo tuir rezolusaun ne’ebé Governu hasai.

Prezidente KRAM Timor-Leste ne’e hatutan, responsabilidade organizasaun nian, ne’e mai hosi estrutura organizasaun ka lideransa sira.

Maibé, KRAM mós konsidera nafatin atitude individuál sira ne’ebé maka la respeita sira ninia estatutu organizasaun sira, rejimentu organizasaun sira no pior liután la kumpri lei ne’ebé Governu hasai.

Jornalista: Rogério Pereira Cárceres