Connect with us
Pakote Ahi

Nasionál

Governu Nomeia Ona Rogério Lobato Prezidente Autoridade RAEOA ho João Gonçalves Koordenadór Komisaun ZEESM

Published

on

Hatutan.com, (24 Janeiru 2024), Díli–Konsellu Ministru  hala’o sorumutuk iha Palásiu Governu, Kuarta (24/01/2024), hodi aprova  projetu Rezolusaun Governu tolu, ne’ebé aprezenta husi Primeiru-Ministru, Kay Rala Xanana Gusmão, kona-ba RAEOA no hala’o auditoria interna iha servisu Administrasaun Públika nian.

Lee Mós: Posivel, Rogério Lobato Prezidente Autoridade RAEOA no João Mendes Gonçalves Koordenadór Komisaun ZEESM

Reuniaun Konsellu Ministru iha Palásiu Governu, Kuarta (24/01/2024). Foto/Tome da Silva

Sita hosi komunikadu ne’ebé Hatutan.com asesu hosi Konsellu Ministru,  katak Rezolusaun Governu dahuluk ne’ebé aprova ona ho nia objetivu atu nomeia Prezidente no membrus Autoridade Rejiaun Administrativa Espesiál Oé-Cusse Ambeno (REAOA) nian.

Rezolusaun Governu ne’e ko’alia liu kona-bá nesesidade reestruturasaun no autonomia bá RAEOA tuir proposta iha Programa Governu nian, ho objetivu atu rekupera konfiansa populasaun nian, rekupera dinamizmu iha dezenvolvimentu ekonómiku no estabelese relasaun konfiansa ho interveniente sira hotu, populasaun, parseiru no parte interesada sira seluk.

Advertisement

Tanba ne’e, Governu nomeia Rogério Tiago Lobato hanesan Prezidente Autoridade RAEOA, bá mandatu ida tinan-lima (5) nian, ho misaun prinsipál atu superviziona atividade sira desentralizasaun nian, eduka no mobiliza populasaun lokál ba envolvimentu konxiente ida iha dezenvolvimentu ekonómiku Enklave Oe-Kusi Ambenu nian.

Nomeia mós sidadaun sira bá membru Autoridade RAEOA nian bá mandatu tinan-lima maka hanesan;  

  • André Lao, hanesan Sekretáriu Rejionál ba Administrasaun;
  • Elvira Manat, hanesan Sekretáriu Rejionál ba Finansas;
  • Luís de Jesus Neno, hanesan Sekretáriu Rejionál bá Saúde;
  • Inácia Tamele, hanesan Sekretária Rejionál bá Edukasaun no Asuntus Sosiál;
  • Filomena Sila, hanesan Sekretária Rejionál bá Agrikultura;
  • Marcelino Marques Coro, hanesan Sekretáriu Rejionál bá Terras no Propriedades, Rejistu no Notariadu.

Projetu daruak Rezolusaun Governu nian, ho Objetivu atu kria Komisaun Ezekutiva ida hodi haree bá estabelesimentu Zona Ekonómika Dezenvolvimentu Espesiál ida iha Oé-Cusse Ambeno.   

Rogério Tiago Lobato ho João Mendes Gonçalves. Foto/Repro Espesiál

Desizaun hodi kria komisaun ida-ne’e, atu konsidera katak, hafoin kuaze dékada ida dezde ninia kriasaun, projetu atu estabelese Zona Espesiál Ekonomia Sosiál Merkadu ida, hatudu inkapasidade atu kumpre objetivu sira ne’ebé propoin ona iha inísiu, hodi kria beibeik dúvida kona-bá ninia natureza, finalidade, kompeténsia no podér sira to’o ninia estinsaun.    

Tuir KM nia rezolusaun ne’e katak populasaun la haree-hetan Zona Espesiál ne’e hanesan realidade ida ne’ebé bele atende sira-nia nesesidade, laiha dinamizasaun ekonómika, atinje ekuidade sosiál no partisipasaun efetiva komunidade lokál nian. Aleinde ne’e, jestaun Zona Espesiál dala barak konfunde ho administrasaun Rejiaun Administrativa Espesiál Oé-Cusse Ambeno nian, nune’e hamosu inserteza kona-ba ninia papél no impaktu efetivu.

Komisaun ne’e iha responsabilidade atu prepara no aprezenta ba Governu, ho prazu fulan 12, estudu detalladu ida ho objetivu atu implementa Zona Ekonómika Espesiál ida iha Oe-Kusi Ambenu, liuliu ho deskrisaun pormenorizada kona-ba ninia objetivu sira, planu implementasaun nian no orsamentu nesesáriu ba efeitu ne’e.

KM nomeia João Mendes Gonçalves hanesan Koordenadór Komisaun, enkuantu dezigna Régio da Cruz Salu no Herculano de Sousa hanesan Vise-Koordenadór.

Advertisement

Auditoria Interna Servisu Administrasaun Públika

Projetu datoluk Rezolusaun Governu nian ne’ebé aprezenta husi Primeiru-Ministru, estabelese atu hala’o auditoria interna iha servisu sira Administrasaun Públika nian.

Tuir Programa Governu, ne’ebé promove transparénsia, responsabilidade no integridade, Rezolusaun ida-ne’e ho objetivu atu hametin órgaun inspesaun no auditoria interna nian, liuliu Inspesaun Jerál Estadu, hodi promove kultura dezempeñu no responsabilidade ida ne’ebé di’ak.

Objetivu maka atu kria mekanizmu sira hodi monitoriza, avalia no kontrola funsionamentu servisu hodi kontribui ba administrasaun ida ne’ebé efisiente liután. Rezolusaun ne’e determina atu hala’o auditoria ba ministériu hotu no servisu sira administrasaun indireta Estadu nian, ne’ebé tenke remata iha prazu fulan neen. Relatóriu preliminár sira tenke aprezenta iha fulan ida, ne’ebé haree liuba violasaun ba regra legál sira.

Ministru Prezidénsia Konsellu Ministrus maka responsavel atu asegura hodi implementa auditoria no dezenvolve, kolabora hamutuk ho Inspesaun Jerál Estadu no Komisaun Funsaun Públika, planu ida atu padroniza no garante kualidade no efikásia husi mekanizmu sira-ne’e.

Advertisement

Tuir projetu ne’ebé aprezenta husi Vise-Ministra ba Asuntus ASEAN, Milena Maria da Costa Rangel, Konsellu Ministru delibera hodi fó podér tomak ba Embaixadór Timor-Leste iha Repúblika Filipina hodi asina Akordu entre Repúblika Demokrátika Timor-Leste no Repúblika Filipina bá izensaun vistu bá titulár sira ho pasaporte diplomátiku no servisu nian.

Ikusliu, tuir projetu ne’ebé aprezenta husi Ministru Obras Públikas, Konsellu Ministrus delibera hodi autoriza prosedimentu ba aprovizionamentu hodi halo despeza ba reabilitasaun estrada iha munisípiu sira, Pakote 6- Alas ba Wedauberek, Seg. Seg. 0+000-23+000, ICB/108/MOP-2022. 

Jornalista: Tome da Silva

 

 

Advertisement

Kontinua Le'e
Advertisement
Hakarak Hato'o Komentariu?

Husik Hela Komentariu

Your email address will not be published. Required fields are marked *

Nasionál

CI ho ABC-ID Lansa Matadalan Jornalizmu Inkluzivu

Published

on

Hatutan.cm, (16 Abríl 2024), Díli—Conselho de Imprensa (CI) servisu hamutuk ho Australia Broadcasting Coorporation-International Development (ABC-ID) hala’o lansamentu bá Matadalan Jornalízmu Inkluzivu.

(more…)

Kontinua Le'e

Nasionál

Projetu Reabilitasaun Estrada iha Díli Laran “La Obedese” bá Prinsípiu Transparénsia

Published

on

Hatutan.com, (16 Abríl 2024), Díli– Iha Rejime Jurídiku Aprovizionamentu (RJA) fó sentidu katak  projetu fíziku (projetu ho karater emerjénsia ka karater normal)  ne’ebé iha implikasaun bá Orsamentu Estadu nian tenke tane as no garante prinsípiu transparénsia.

(more…)

Kontinua Le'e

Nasionál

Prezidente Repúblika ho CCI-TL Diskute Dezafiu Investimentu iha TL

Published

on

Hatutan.com, (16 Abríl 2024), Díli Prezidente Repúblika (PR), José Ramos-Horta hamutuk ho Câmara Comercio Indústria Timor-Leste (CCI-TL) hala’o diskusaun kona-bá dezafiu investimentu iha Timor-Leste liuliu liga ho lejislasaun sira.

(more…)

Kontinua Le'e
Advertisement

Trending