Hatutan.com, (25 Janeiru 2024), Díli— Delegasaun hosi Sekretariadu Organizasaun Mundiál Komérsiu (OMK), lidera hosi Maika Oshikawa, Diretora Divizaun Adezaun OMK nian, hamutuk ho Anna Varyanik, Ofisiál Assuntu Jurídiku hosi Divizaun Adezaun nian, oras-ne’e hala’o hela vizita ofisiál mai Timor-Leste hahú hosi loron 22-25 janeiru 2024.
Delegasaun hosi Sekretariadu Organizasaun Mundiál Komérsiu (OMK), lidera hosi Maika Oshikawa, Diretora Divizaun Adezaun OMK nian, hamutuk ho Anna Varyanik, Ofisiál Assuntu Jurídiku hosi Divizaun Adezaun nian, oras-ne’e hala’o hela vizita ofisiál mai Timor-Leste hahú hosi loron 22-25 janeiru 2024. Foto: Ekipa OMK.
Objetivu prinsipál hosi vizita ne’e hodi halo diskusaun intensiva ho interveniente importante sira iha Timor-Leste relativamente kona-bá prossesu adezaun Timor-Leste nian bá OMK.
Lee Mós: Xanana Agradese Ngozi Okonjo-Iweala Ne’ebé Aseita TL Sai Membru OMK
Formalmente, Timor-Leste nia adezaun ba OMK sei akontese durante Konferênsia Ministerial (MC13) iha Abu Dhabi, loron 26-29 Fevereiru 2024.
“Durante vizita ne’e, delegasaun sei konsentra bá aspeitu krusiais kona-bá prossesu pos- adezaun nian, inklui oinsa reforsa kuadru polítiku, reforsa estrutura no liña koordenasaun institusionál, estabelesimentu kuadru lejislativu ho nia implementasaun, garante transparênsia no asistênsia téknika inklui reforsa kapasidade,” Hatutan.com sita komunikadu, Kinta (25/01/2024).
Estratéjia hodi enfatiza sensibilizasaun públiku através husi envolvimentu várius segmentu sosiedade hodi bele iha partisipasaun ativa haktuir hosi kuadru OMK nian.
Liuhosi tulun Gabinete Vise-Primeiru Ministru, Ministru Koordenadór Assuntu Ekonómiku, Ministru Turizmu no Ambiente, delegasaun sei realiza reuniaun importante ho pessoál importante sira hanesan ho Ministrus Transporte no Komunikasaun, Ministru Komérsiu no Indústria, Ministru Agrikultura, Pekuária, Peska no Floresta, Ministra Finansas, Vise-Ministra Assuntu ASEAN inklui membru Parlamentu Nasionál sira.
Importânsia adezaun Timor-Leste ba OMK subliña mós iha vizita delegasaun, tanba vizita ne’e reprezenta pasu krusiál kona-bá integrasaun país ne’e iha sistema komersiál globál.
Iha sorin seluk, delegasaun sei involve mós iha reuniaun ho Parseiru Dezenvolvimentu sira hodi ko’alia kona-bá Implementasaun depois pós-adezaun Timor-Leste nian ba OMK.
Diskusaun ne’e sei abranje ba área ne’ebé presiza apoiu hosi parseiru sira durante períodu pós-adezaun depois Timor-Leste integra sai membru OMK.
Adezaun Timor-Leste bá OMK sei mellora dezenvolvimentu ekonómika, promove assesu bá merkadu ne’ebé boot liu, promove prátika komersiais ne’ebé justas hodi insentiva investimentu rai liur.
Aseitasaun ofisial Timor-Leste ba OMK iha Konferênsia Ministerial ne’ebé sei hala’o iha Abu Dhabi, simboliza rekoñesimentu komunidade internasionál bá kompromisu país nian kona-bá norma komersiais globál.
Jornalista Estajiária: Zita Menezes