Hatutan.com, (25 Janeiru 2024), Jakarta—Primeiru-Ministru (PM), Kay Rala Xanana Gusmão ho delegasaun to’o ona Jakarta Indonézia iha oras 14:55 oras lokál, no sekuénsia vizita ne’ebé Hatutan.com assesu katak, Xefe Governu ho Prezidente Joko Widodo laiha ajenda bá asinatura finalizasaun assuntu Fronteira Terrestre entre Timor-Leste (TL) ho Repúblika Indonézia (RI).

Primeiru-Ministru (PM), Kay Rala Xanana Gusmão to’o iha salaun VIP Aeroportu Internasionál Soekarno Hatta, simu kedan ho formatura parada militár. Foto: Média GPM.

Iha sekuénsia ne’e deskreve katak, Xanana Gusmão to’o iha salaun VIP Aeroportu Internasionál Soekarno Hatta, simu direta hosi Vise-Ministru Saúde Indonézia, Dante Saksono Harbuwono, akompaña hosi Embaixadór Indonézia iha Timor-Leste, Okto Dorinus Malik, Adido Seguransa Timor-Leste iha Indonézia, Superintendente Xefe Armando Monteiro, Adido Defeza, Kolonel Maubuti no tama salaun simu kedan ho formatura parada militár.

Lee Mós: Ramos-Horta Deklara Tratadu Fronteira Terrestre TL-RI Seidauk Bele Assina Tanba “Laiha Konsensu”

Delegasaun kontinua kedan bá Otél Kempinski, Jakarta hodi hala’o enkontru ho ekipa Gabinete Fronteira Maritima no Terrestre mo mós ekipa MNRK nian hodi atualiza ajenda ekontru Xefe Governu no Prezidente Repúblika Indonézia, Joko Widodo.

Ajende ba loron 26 fulan Janeiru, molok hala’o enkontru bilaterál iha tuku 09:00 dadeer oras lokál,  sei hala’o vizita bá simitériu erois Kalibata, hodi presta omenazen.

Hosi Kalibata, PM Xanana ho delegasaun kontinua bá Palásiu Prezidente Repúblika Bogor-Jakarta, ne’ebé sei simu ho parada militár akompaña ho Hino Nasionál rai rua nian, PM Xanana akompaña hosi PR Jokowi sei hala’o passa revista bá formatura parada militár nu’udár onra hosi Estadu Indonézia.

Hafoin passa revista bá formatura, Prezidente Joko Widodo sei fó koñese membru Govenru Indonézia nian tomak, kaer liman ho delegasaun Timor-Leste nian, kontinua bá palku Palásiu Preziente hodi asina livru vizita.

Iha tuku 10:30 oras lokál, Xanana ho membru Governu sira sei hala’o enkontru bilaterál ho Prezidente Joko Widodo ho nia membru Governu sira iha minutu 30 nia laran, hodi diskute kooperasaun bilterál rai-rua nian ne’ebé estabelese durante ne’e.

“Hafoin ida-ne’e, Xanana ho Xefe Estadu Indonézia assiste direta asina akordu formál iha área kooperasaun bilaterál hosi Ministru reprezentativu. Hafoin asinatura kontinua kedan ho konferénsia imprensa hosi líder rai rua,” Hatutan.com sita sekuénsia vizita delegasaun.

Xefe Governu akompaña hosi Ministru Planeamentu Investimentu Estratéjiku (MPIE), Gastão de Sousa, Ministru Transporte no Telekomunikasaun, Miguel Marques Manetelu, Sekretáriu Estadu Komunikasaun Sosiál (SEKOMS), Expedito Dias Ximenes no ekipa Gabinete Fronteira Maritima no Terrestre.

Lere Fiar Xanana Defende Naktuka

Tenente Jenerál Reformadu, Lere Anan Timur fiar katak, Xefi negosiadór Kay Rala Xanana Gusmão sei defende hodi rezolve fronteira Naktuka, Citrana, sub Rejiaun Nitibe, RAEOA, bazeia bá mapamentu Portugál no Holanda.

“Ha’u la fiar katak ita nia maun Xanana nu’udár Komandante em Xefe das FALINTIL no atuál Primeiru Ministru atu muda fronteira mai tiha laran. Ita bele fó rai hektares 200 bá Indonézia, ne’e ha’u la fiar Maun Xanana atu halo ida-ne’e. Ha’u hanoin nia la brani atu halo tanba nia uluk funu, terus no nia soldadu sira barak mate bá soberania ida-ne’e,” Lere Anan Timur hateten iha rezidénsia Faról, Díli, Sesta (25/01/2025).

Lere dehan, Oecusse ne’e  iha pilár duni, ezemplu illa Fatuk-Sinai loloos ne’e Timor-Leste nian, maibé Primeiru Governu, la tau iha Konstituisaun ida-ne’e mos sala boot, atu ko’alia oinsa mós la di’ak tanba la tau iha konstituisaun RDTL, maibe atu ko’alia kona-ba kestaun soberania nian, neen fatuk ida mós laiha ema ida atu hadau.

“Ha’u nu’udár gerileiru ida, nu’udár mós Timor-oan, ha’u dehan katak Indonézia tenke respeita soberania Timor-Leste nian, hanesan mós ita tenke respeita sira. Se Timor-Leste fó Rai hektares 200, entaun Indonézia mós tenke fó tán rai hektares 200 hodi iha liñaa klaran ne’e sira bele mai no ita mós bele asesu bá. Ida-ne’e mak solusaun entre soberanu rua, maibé sira atu hadau de’it ne’e ha’u sente labele, tanba órgaun soberania ne’e independente,” nia husu.

Lere mós dehan katak, kona-bá ekipa tékniku sira bá hala’o sira servisu ne’e la presiza tán iha liña koordensaun entre líder lokál no komunidade sira iha Naktuka rasik, tanba liña fronteira iha ona.

“Atu koordena tán kona-bá saida, koordena atu muda liña fronteira tama nai laran, ne’e labele tanba viola regra konstitusionál, ó atu lia-na’in ka rai-na’in, laiha koordenasaun bá malu ona,” funu na’in ne’e hateten.

Jornalista: Rogério Pereira Cárceres /Quefi