Hatutan.com, (25 Janeiru 2024), Díli—Maestro bá múzika litúrjika iha Kreda Timor nian, Padre Ildefonso Xavier remata peregninasaun iha mundu (mate).

Maestro bá múzika litúrjika iha Kreda Timor nian, Padre Ildefonso Xavier. Foto: Isco Bosy.

Padre Ildefonso hakotu-iis iha Hospital Nasionál Guido Valadares (HNGV)  Díli iha Kinta (25/01/2024), iha dader, hafoin hala’o tratamentu durante fulan ida nia laran, tanba sofre moras ran midar.

Lee Mós: Mgr. José António da Costa Remata Peregrinasaun iha Mundu

Molok halo’ot iha semitériu Padre sira nian iha Maloa Ailok-laran, parte Arkedioseze Díli nian liu hosi Padre Tadeu da Silva, prepara ona oráriu misa no velada bá mate-isin iha Igreja Katedrál Vila-Verde durante kalan tomak, hosi komunidade relijioza sira, parokianu sira mai hosi Parókia sira iha Díli laran no mós Seminarista sira.

Tuir oráriu velada ne’e, sei taka ho misa funerál prezidida hosi Arsebispu Arkedioseze Metropolitana Dili, Dom Virgílio Cardeal do Carmo da Silva, SDB iha loron 26 fulan Janeiru, tuku 14:00.

Padre Ildefonso moris iha Maulau, Ainaro iha loron 17 fulan Maiu tinan 1952 no simu ordenasaun saserdotál iha Arledioseze Braga, Portugál iha tinan 1977.

Padre Ildefonso hanesan espesialista iha múzika Litúrjika Kreda nian, ne’ebé durante tinan barak nia laran kontribui kompoen múzika Litúrjika sira hanesan rikusoin Kreda Timor nian hodi hahi no hanai Maromak.

Obra boot ne’ebé Padre Ildefonso Xavier husik hela maka kompoen livru Salmo tolu hosi Ano A, B no C ne’ebé sarani sira hananu iha misa Domingu-Domingu, inklui hanorin múzika iha Seminário sira.

Sarani Katólika, liuliu komunidade Relijioza iha Timor-Leste sente lakon no espressa sira nia sentimentu triste iha mundu virtuál.

Jornalista Estajiária: Zita Menezes