Hatutan.com, (13 Fevereiru 2024), Díli-Reprezentante povu iha Parlamentu Nasional (PN) husu Ministra Justisa foun Sergio de Jesus Fernandes da Costa Hornai, atu hala’o knaar ho responsabilidade no garante justisa bá ema hotu.
Lee Mós: Sergio Hornai, Ministru Justisa Períodu 2024-2028
Ministru Justisa foun, Sergio Hornai. Foto/dok.Hatutan.com
“Governu maka hatene ema sé maka kompotente no kualifikadu duni atu subtitui saudozu Amandio de Sá Benevides nu’udár Ministru Justisa. Bá ami importante, ema ne’ebé bá atu serbí duni estadu no povu ida-ne’e atu bele garante justisa bá ema hotu liu-liu, papél Ministru Justisa nian oinsa atu bele dilibera ka atu fó kontinuadade bá programa prioridade sira ne’ebé IX Governu iha, inklui problema boot ida ne’ebé Governu hasoru hela maka asuntu kaderneta pasaporte no mós Billete Identidade,” Xefe Bankada PLP, Maria Angelina Sarmento hateten bá jornalista sira iha PN, Tersa (13/02/2024).
Deputada ne’e mós haktuir, Ministru Justisa foun ne’ebé hetan nomeasaun ho konfiansa husi Primeiru-Ministru bele fó kontinuadade ho sériu bá kestaun sira ne’ebé pendente iha tempu barak nia laran.
Xefe Bankada KHUNTO, António Verdial de Souza husu Ministru Justisa foun Sergio Hornai atu labele lori partidu tama iha entidade Governaméntal nian.
“Ha’u hatete de’it personalidade Sergio Hornai, ema ne’e Ministriu Justisa ninian kedan ne’ebé ami laiha duvida no haksolok tebes bainhira Primeiru-Ministru nomea Sergio Hornai ba asumi pasta Ministru Justisa. Tanba ha’u rasik husu bá Ministeriu Justisa, setór Judisariu, no iha entidade governaméntal sira hotu atu fó liman bá malu no respeita bá malu,” Deputadu António Verdial hateten.
Hosi sorin seluk, membru PN hosi Bankada FRETILIN, Joaquin do Santos afirma Ministru Justisa Sergio Hornai nia iha esperiénsia iha área justisa nia no nia parte aprésia bá Primeiru-Ministru nia nomeasaun bá Ministru Justisa (MJ) foun.
Nia dehan, figura ne’ebé hili dadaun ne’e iha esperiénsia bá área justisa nian dezde primeiru Governu, tanba Sergio Hornai hala’o nia knaar iha área justisa kle’ur tebes.
Jornalista Estajiária: Zita Menezes