Hatutan.com, (31 Janeiru 2024), RAEOA—Koordenadór Zona Ekonomia Espesiál Sosiál no Merkadu (ZEESM), João Mendes Gonçalves sei halo planu integradu hodi fó prioridade bá povu Rejiaun Administrativa Espesiál Oecusse Ambeno (RAEOA) sai na’in bá dezenvolvimentu.

Koordenadór Zona Ekonomia Espesiál Sosiál no Merkadu (ZEESM), João Mendes Gonçalves.

Molok atu trasa no hatuur planu integradu ida ne’e, Koordenadór ne’e sei forma uluk ekipa tékniku ida atu halo uluk levantamentu dadus hodi hatene kona-bá progressu dezenvolvimentu to’o iha ne’ebé ona, ida ne’ebé mak seidauk dezenvolve no prezisa tau iha planu integradu ne’e.

Lee Mós: Rogério Lobato iha Programa Prioridade Hitu Durante Mandatu iha RAEOA

“Levantemenru dadus ne’e importate, tanba bele iha relatóriu ne’ebé loos atu ita hatene seitór hotu-hotu iha rejiaun dezenvolvimentu ruma mak la’o tiha ona to’o iha ne’ebé, saida tán mak presiza atu halo,” João Mendes Gonçalves hateten bá jornalista Hatutan.com hafoin serimónia posse iha otél Oe-upun, Palaban, Kuarta (31/01/2024).

Atu realiza planu sira ne’e ho susesu, Koordenadór ZEESM ne’e promote no fiar katak, presiza tebes atu servisu hamutuk ho Prezidente Autoridade RAEOA, Rogério Tiago Lobato.

“Ha’u ho Prezidente Rogério la’ós ema seluk. Ami uluk tropas hamutuk, kolega, juventude la’o hamutuk koñese malu di’ak kleur ona. Ne’ebe ha’u haree sei laiha problema ruma iha koordenasaun servisu entre ami na’in-rua tanba ami atu apoia malu, la’ós compete,” nia fiar.

João Gonçalves husu mós bá povu Atoni tomak atu tau fiar bá nia ho Prezidente Autoridade, la’o hamutuk hodi bele apoia servisu sira tanba tuir nia hamutuk mak bele implementa programa hirak ne’e ho sussesu.

Eis Ministru Ekonomia no Dezenvolvimentu ne’e ninia tarjetu bá programa hirak ne’e maka povu Atoni tenki sai na’in duni bá dezenvolvimentu Oecusse nian, la’ós haree na’in, tanba ne’e partisipasaun povu iha prossesu dezenvolvimentu importante no presiza iha konsulta intensiva ho povu Atoni.

“Sei servisu makas. Ami sei ba iha fatin-fatin, sei la’o hale’u Oecusse hodi identifika problema, nesesidade, atu bele buka planu no solusaun hodi rezolve nesesidades povu nian,” nia promote.

Hosi identifikasaun ne’e, João Gonçalves ho ekipa sei halo planu dezenvolvimentu ida bá rai Oecusse ne’ebé integradu, sustentável hodi bele assegura povu Oecusse bele hetan benefísiu hosi dezenvolvimentu ne’ebé mak sei halo iha RAEOA.

Kona-bá projesaun bá planu orsamentál, nia dehan, sei halo bazeia bá programa no planu durante tinan lima nia laran atu tau liu prioridade iha tinan dahuluk halo uluk saida, nune’e mós tinan sira tuir-mai.

João Mendes Gonçalves hetan nomeasaun hosi IX Governu no simu ona posse hanesan Koordenadór Komisaun ba ZEESM, no dezigna Régio da Cruz Salu no Herculano de Sousa hanesan Vise-Koordenadór.

Jornalista: Leopoldina de Carvalho