Hatutan.com, (01 Fevereiru 2024), Díli– Policia Ciêntíficia e de Investigação (PCIC) preokupa ho desizaun Ministériu Dezenvolvimentu Rural no Abitasaun Komunitária (MDRHC, sigla portugés) ne’ebé teki-teki de’it utiliza sira-nia propriedade  hodi harii coby house MDRCH nian.  

Lee Mós: Ministru Justisa Seidauk Simu Relatóriu Kazu Oknum PCIC Fó Pistola bá Oan

Terrenu futuru instalasaun edifisiu PCIC ne’ebé MDRCH harii coby house. Foto/Elio dos Santos da Costa

Iha tinan 2014, Governu liuhosi Ministériu Justisa, Diresaun Nasionál bá Terras no Propriedade (DNTP) legalmente atribui tiha ona diretu titular na’in bá rai  eis edifísiu Word Vision Timor-Leste, Caicoli,  iha besik Jardin 2006 nian, bá PCIC atu halo edifísiu permanente PCIC ni’an.

Hosi tinan sira 2015 mai oin, PCIC sempre submete provizaun  orsamentu ho montante hale’u millaun US$23 atu harii edifísiu PCIC nian, maibé hosi tempu ne’ebá mai,  Governu ida tuun no Governu seluk sa’e,   proposta PCIC nian ne’e la hetan aprovasaun.

Maske nune’e, PCIC bá harii tiha ona kuadru informasaun “Propriedade PCIC Futuru Edifísiu”  hosi kedas tempu ne’ebá. Maibé, laiha anin no udan, ka laiha informasaun bá parte PCIC,  hosi parte MDRCH bá utiliza tiha ona hodi harii daudaun coby house iha prioritáriu refere.

Xefe Departamento de Apoia da PCIC, Ricardo Soares, informa hafoin simu tiha sertifikadu rai ne’e hanesan na’in bá rai, iha tempu ne’ebá kedas, servisu hamutuk ho Comissão Nacional de Aprovizionamento (CNA) hahú loke prosesu tenderizasaun ida ne’ebé ho tipu internasionál.

Prosesu sira kona-bá atu hahú projetu konstrusaun bá PCIC nian edifísiu foun ne’e, liu-liu ligadu ho dezeñu  bill of Quantity (BoQ), inklui prosesu aprovizionamentu nian mós la’o besik atu konklui, maibé to’o iha Kamara Kontas pendente hela prosesu ne’e, ho razaun katak, PCIC rasik iha orsamentu hodi aloka bá projetu ne’e. Nune’e,  projetu konstrusaun bá edifiísiu foun PCIC nian ne’e seidauk bele la’o, no rai ne’e mós abandona hela de’it to’o ohin loron.

“Entermus legál, rai ne’e, até a-prezente data, atribuisaun ne’e sei legalmente mai PCIC. Rai ne’e atribui mai PCIC, tanba iha tiha ona prosesu aprovizionamentu ida bá konstrusaun edifísiu PCIC, ne’ebé inisia, sé ha’u la sala 2014,” Ricardo Soares, informa bá Hatutan.com, iha kna’ar fatin, Edifísiu  PCIC,  Caicoli, Díli, Kuarta (01/02/2024).

Terrenu futuru instalasaun edifisiu PCIC ne’ebé MDRCH harii coby house. Foto/Elio dos Santos da Costa

“Ha’u bele dehan, mai PCIC, lae, laiha, seidauk iha koordenasaun ruma. Tanba ne’e mak PCIC sei nafatin dehan, rai ne’e pertense bá PCIC to’o agora,” nia hateten.

Prosesu aprovizionamentu ne’e lidera direta hosi CNA, hodi lansa bá kompañia internasionál sira ne’ebé iha interesse atu konkore no prosesu ne’e konklui, no iha tiha ona kompañia manán na’in-ida, maka atu halo prosesu konstrusaun bá edifísiu PCIC ne’e.

Kontratu ne’e, asina direta hosi Primeiru-Ministru Kay Rala Xanana Gusmão, iha tempu ne’ebá, no prosesu ne’e agora iha hela Kamara Kontas  hein vistu préviu.

“Tanbasá mak seidauk hetan vistu préviu, tanba seidauk iha orsamentu bá konstrusaun ne’e. Tanba ne’e sei, la’os kansela. Sei suspende hela iha Kamara  Kontas. Entaun, prosesu ne’e la’o, depois Governu mós troka bá mai, entaun, seidauk iha orsamentu própriu, tanba ne’e mak konstrusaun seiduak inisia, tanba seidauk hetan vistu préviu, tanba osan laiha,” Ricardo Soares, informa.

Iha 2024 ne’e, ho IX Governu, konsege tiha ona aprovasaun orsamentu ida bá atu halo kontrusaun bá edifísiu ne’e. Ne’ebé, orsamentu aprovadu iha tinan ne’e, bá konstrusaun edifísiu PCIC, iha terrenu ne’ebé atribuidu mai PCIC.

Orsamentu Jerál Estadu (OJE) 2024 nian ne’ebé IX Governu konstitusionál liuhosi ministériu justisa prevee hodi aloka bá konstrusaun edifísiu foun PCIC nian iha tinan ne’e ho valór hamutuk US$500.000.00.
 

“Dezeñu, market, kontratu, buat hothotu kompletu. Hein de’it ezekusaun orsamentu ne’e. Kuandu Kamara Kontas  fó ona vistu préviu, konstrusaun, la’o,” Ricardo afirma.

Terrenu futuru instalasaun edifisiu PCIC ne’ebé MDRCH harii coby house. Foto/Elio dos Santos da Costa

Hatán kona-bá karik PCIC iha hanoin atu buka fali fatin ka rai seluk hodi harii edifísiu foun bá, Ricardo Soares, dehan, to’o iha momentu ida ne’e seidauk. Tanba iha planu estratéjiku dezenvolvimentu nasionál bá setór justisa nian, katak, terrenu sira besik malu iha área Caicoli ne’e parte setór justisa nian.

Ligadu ho asuntu ne’e, Hatutan.com, halo ona mós konfirmasaun ho Diretór Jerál bá Servisu Korporativus hosi Ministériu Dezenvolvimentu Rurál no Abitasaun Komunitária (MDRHC, sigla portugés), Flaviano Godinho, maibé, okupadu ho servisu seluk, nune’e la konsege entrevista.

Hatutan.com tenta konfirma ona mós ho Diretór nasionál bá Comissão Nacional de Aprovisionamento (CNA), Hermingardo Albano Soares, kona-bá prosesu sira aprovizionamentu nian bá projetu konstrusaun coby house ne’ebé harii iha terrenu PCIC nian ne’e, tuir duni regra no lei sira aprovizionamentu nian ka lae, maibé, laiha fatin, tanba sei hala’o viájen servisu bá Portugál.

Tuir observasaun Hatutan.com iha terrenu hatudu katak kuadru informasaun projetu nian ne’e ho títulu “New Construction Coby House Ministériu (DRHC).

Na’in bá Projetu mak “Dezenvolvimentu Rurál no Abitasaun Komunitária, no kompañia kontratór maka, “LI-SHI, LPS Hardware Unipessoal, L.da, parseria ho (joint venture/JV) Adijulcojam, L.da, Construction Civil & Supplier”.

Dadaun ne’e, kompañia kontratór kontrui hela obra refere no harii ona mós coby house hamutuk haat.

Jornalista: Rogério Pereira Cárceres